Ekebe Mbụme
Nso n̄kpọ ke ikpada ika mme mbonoesop?
Ke urua kiet kiet nnyịn imesibọ item oro enyenede ufọn ye nsịnudọn̄ ke mme mbonoesop. (Isa. 48:17; Heb. 10:24,25) Nte ededi, adan̄a nte nnyịn ibọde ufọn ọkọn̄ọ akamba akamba ke m̀mê nnyịn ima itịm idem mbemiso ikade m̀mê ikotịmke.
Ọkpọfọn owo kiet kiet ke ubon enyene mme n̄wed ukpepn̄kpọ eke esie ye mme n̄kpọ eken ẹyomde kaban̄a mme mbonoesop. Emi eyesịne Bible, n̄wedikwọ, (mme) n̄wed oro ẹkpepde, n̄wed uwetn̄kpọ, ye eton̄wed m̀mê benetap.
Ke Ufọkn̄wed Utom Ukara Abasi, oyom Ndutịm Utom Ufọkn̄wed Ukara Abasi ye Ñwed-item Ufök-ñwed Utom Ukara-Abasi. Mme n̄kpọ ẹmi ẹn̄wam nnyịn ndinyene ibuotikọ utịn̄ikọ nditọ ufọkn̄wed ke ekikere nnyụn̄ nsan̄a ikpat kiet ye esenyịn ufọkn̄wed ke ini enye ọnọde item. Nnyịn imekeme ndida mme item ye mme ekikere oro ẹnọde nsịn ke edinam ke idem nnyịn man inam n̄kọri ke mme utịn̄ikọ nnyịn ye ke mme nneme an̄wautom. Ọtọn̄ọde ke March, ẹsio ikọ item ẹto mme utọ n̄wed nte Ndimek Mfọn N̄kan Usụn̄uwem, ndusụk nsiondi Enyọn̄-Ukpeme oro ẹsatde-sat, ye N̄wed-item Ufök-n̄wed Utom Ukara-Abasi. Ẹkpenyene n̄ko ndida mme n̄wed ẹmi ndi man ubon ekpenyene se adade anam ndụn̄ọde.
Kaban̄a Esoputom, oyom nnyịn inyene nsiondi Utom Obio Ubọn̄ Nnyịn eke ọfiọn̄ emi. Kama mme n̄wed ekededi oro ẹdisiode n̄kpọ ẹto ke ini mbonoesop, utọ ute mme n̄wed oro ẹdikamade ke mme nneme oro ẹdinamde ẹwụt. Mbiowo ẹkpenyene ndikama Organized to Accomplish Our Ministry.
Mme ete ye eka ẹkpenyene ndidomo ndinam nditọ mmọ ẹtie sụn̄ ẹnyụn̄ ẹkpan̄ utọn̄ ke mme mbonoesop. Ndinọ mmọ Enyọn̄-Ukpeme eke mmọ ye mme n̄wed eken, idem mbemiso mmọ ẹkemede ndikot n̄wed, esịn udọn̄ ọnọ mmọ ndinyene udọn̄. Ke ini ẹkpepde nditọwọn̄ ndiwụt ukpono nnọ mme n̄wed ukara Abasi nnyụn̄ nda mmọ nnam n̄kpọ, ẹnam mmọ ẹnyene nti edu eke spirit oro ẹdibịghide ke ofụri eyouwem.
Idatesịt ye uyụhọ oro nnyịn inyenede ito mme mbonoesop ẹyekọri akamba akamba ke ini nnyịn itịmde idem mfọn mfọn mbemiso idụkde. (2 Tim. 3:17) Emi edi mfọnn̄kan usụn̄ ndikụt ke nnyịn ‘imọyọhọ ye ifiọk uduak Abasi ke kpukpru eti ibuot ye ikike ke n̄kpọ eke spirit.’—Col. 1:9.