N̄wam Mbon Oro Mînyeneke Mbuọtidem
1 Ke eyomfịn emi, eyedi ọsọ n̄kpọ ndise owo nte ọfiọkn̄wed emi anamde n̄kọri ke ekikere. Ẹtoro ukpepn̄kpọ akwaifiọk owo ye mme anana iwụk ukpepn̄kpọ, ke adan̄aemi ẹfụmide n̄kpọ eke spirit. Mbon esịt akpanikọ ẹmi ẹnyenede udọn̄ ke mmemmem akpanikọ ye akpanikọ ẹmi ẹn̄wan̄ade owo ẹyema ifet edidụn̄ọde n̄wed oro Afo Emekeme Ndidu Uwem ke Nsinsi ke Paradise ke Isọn̄. N̄wed emi ekeme ndin̄wam mbon oro ẹnanade mbuọtidem. (Rome 1:19, 20) Kụt ete ke imafiak ika ibịne kpukpru mbon oro ẹwụtde udọn̄.
2 Afo emekeme nditọn̄ọ nneme fo ke usụn̄ emi:
◼ “Mfịn, mme ubon ke ẹbahade, ndien ediwak oro ẹsụk ẹdụn̄de ọtọkiet ikopke inemesịt. Anam owo ekeme ndibụp ete: ‘Edieke edide Abasi okobot ubon ke akpanikọ, nte idịghe utịp ẹfọnde ẹkan ke nnyịn ikpokụt?’ Nso ke afo ekere aban̄a oro? [Bet ibọrọ.] Nte ededi, owo ikemeke ndiduọhọ Abasi kaban̄a edikpu eke ubon. Obotn̄kpọ ekeme ndidiọn̄ n̄kpọ onyụn̄ ọnọ mbet ke nte ẹkpekamade enye. Edi nte edidi ndudue obotn̄kpọ edieke n̄kpọ oro okpude sia andidep mîketieneke mme item ẹkenọde? N̄wan̄ansa-o.” Kụbọde ka page 238 ke n̄wed Ndidu Uwem ke Nsinsi nyụn̄ nam ikpehe ekikere 3 an̄wan̄a, nte ekemde ye N̄wed Mbon Ephesus 5:22-25. Se n̄ko page 243-244. Diomi mfiakn̄ka efen.
3 Afo emekeme ndida usụn̄ edisobo enyeemi ke ini afo anamde mfiakn̄ka:
◼ “Edi ọsọ n̄kpọ ndisobo mme owo oro mînịmke Abasi ke akpanikọ. Ke ediwak isua ẹmi ẹkebede, oro ikawakke nditịbe. Afo ekere ke nso idi ntak ata ediwak owo ẹnanade mbuọtidem ntre ke Abasi? [Bet ibọrọ.] Ediwak owo ẹdọhọ ke unana mbuọtidem mmimọ oto ntak enyene-ndịk n̄kọri ke afai ye nnanenyịn ke ererimbot nnyịn. Mmọ ẹdọhọ ẹte edieke Ata ọkpọsọn̄ Abasi okpodude, ntak emi enye mîdaha utịt isọk ofụri ndutụhọ emi? Mbon oro mînyeneke ibọrọ oro ọnọde uyụhọ ke mbụme oro ẹsiwak ndiwụt unana mbuọtidem ke Abasi. Edi akpakịp uyarade ẹdu ndiwụt nte ke Abasi odu ye nte ke ibịghike enye eyenam isọn̄ edi ebiet inemesịt ye emem.” Kaiso ke nneme ke ndiwọn̄ọde n̄ka ibuot 11, “Ntak Emi Abasi Ayakde Idiọkido Odu?” ke page 99 ke n̄wed Ndidu Uwem ke Nsinsi. Nam ikpehe ekikere 4 ke page 100 an̄wan̄a. Nam nte ukpepn̄kpọ Bible ofụri ini edide akpan n̄kpọ an̄wan̄a ibio ibio.
4 Ye Bible fo ke ubọk, afo emekeme nditọn̄ọ nneme ke ndidọhọ:
◼ “Nnyịn ifiak iwaha man iwụt ntak emi ukpepn̄kpọ Bible edide akpan n̄kpọ ke eyo nnyịn. Ata ediwak owo ẹnyene Bible, edi ibat ibat owo ẹsida ini ẹkot enye. Ndusụk owo ẹsitịn̄ ẹnọ nnyịn in̄wan̄în̄wan̄ ẹte ke mmimọ inyeneke aba ọkpọsọn̄ mbuọtidem ke Bible. Didie ke afo ekere aban̄a oro? [Bet ibọrọ.] Kiet ke otu n̄kpọ ẹmi ẹnamde nnyịn inịm ke akpanikọ nte ke Bible edi Ikọ odudu spirit Abasi edi edisu oro mme prọfesi esie ẹsude.” Kụbọde ka ibuot 5, “Nte Bible Enen̄ede Oto Abasi?” Nam ikpehe ekikere 27 ke page 56 an̄wan̄a, nte ke n̄kponn̄kan uyarade nte ke Bible enen̄ede oto Abasi edi mfọnn̄kan n̄wetnnịm n̄kpọ esie oro etịn̄de n̄kpọ aban̄a ini iso. Nam ndusụk prọfesi ẹban̄ade Jesus Christ ye nte mmọ ẹnyenede ebuana ye eyo nnyịn an̄wan̄a enyeneufọk. Sọn̄ọ tịn̄ ufọn edinyene ukpepn̄kpọ Bible.
5 Nnyịn imekeme ndidi edidiọn̄ nnọ mbọn efen ebe ke ndida n̄wed emi n̄n̄wam mmọ ẹkụt ata eti isọn̄ ndinyene mbuọtidem ke Andibot mmọ.—Ps. 100:2, 3.