Jehovah Edi Andibot Nnyịn
1 Ediwak miliọn owo ẹnịm ke akpanikọ ẹte ke Abasi odu, ye nte ke enye edi Andibot uwem nnyịn. Ndien odu mbon oro mîfiọkke m̀mê Abasi odu ye nte un̄wọn̄ọ esie ndinam isọn̄ emi akabade edi paradise edide se ẹkemede ndiberi edem. Didie ke ẹkeme ndin̄wam mmọemi? N̄wed oro Afo Emekeme Ndidu Uwem ke Nsinsi ke Paradise ke Isọn̄ enyene mme utọ owo oro. N̄wed emi enen̄ede anam edidu Abasi n̄wan̄a ye se emi ọwọrọde ọnọ ini iso nnyịn. Ke June, nnyịn idinọ ediye n̄wed emi.
2 Ediwak owo ke ofụri ererimbot ẹnyịme ke n̄wed emi edi n̄wọrọnda. N̄wan kiet ekewet ete: “Idahaemi ke nsụk n̄kụre ndikot Afo Emekeme Ndidu Uwem ke Nsinsi ke Paradise ke Isọn̄. Ke adianade ye Bible ke idemesie, mmokụt n̄wed emi nte edide ata nnennen, omụm owo udọn̄, onyụn̄ edi n̄wed oro onụkde owo ndinam n̄kpọ, oro akanam n̄kotde.” Owo efen ọkọdọhọ ete: “Afo Emekeme Ndidu Uwem ke Nsinsi ke Paradise ke Isọn̄ edi n̄wed oro akande kpukpru n̄wed, emi Bible kpọt akande enye. Afo ukemeke ndinyan̄a edi enyene ndima enye ke ofụri esịt ye ukpọn̄ fo. Mmokokot n̄wed oro mma utịm ikaba kan̄a, edi osụk ọdọdọn̄ mi ndifiak n̄kot enye. Adan̄a nte afo okotde enye, ntre ke afo ama enye. Enye enen̄ede ọdọn̄ọ item. . . . N̄wed emi, edieke ẹdade ẹsịn ke edinam, ekem ndikpụhọde ererimbot ofụri ofụri.” Ntre nnyịn imekeme ndinyene mbuọtidem nte ke mbon efen efen ẹyema n̄wed emi.
3 Afo emekeme ndimek ndinyene ibio ibio nneme nte enyeemi:
◼ Kụbọde ka page 158, nyụn̄ dọhọ ete: “Ediwak owo ẹkere ke owo ikemeke ndinam isọn̄ emi akabade edi paradise. Ke ikerede iban̄a ndiọi idaha ẹmi nnyịn isobode mfịn, nte afo emekere ke isọn̄ emi tutu amama eyetie ntem? [Wụt ndise oro nyụn̄ bet ibọrọ.] Ediwak uyarade ẹsọn̄ọ akpa uduak Abasi ke ndibot isọn̄ ye ubonowo. Ikụreke ke Abasi ndinen̄ede n̄kop odudu, edi enye eyesu un̄wọn̄ọ esie koro enye enen̄ede ama nnyịn. Enye edi ata Abasi, ndien enyịn̄ esie edi Jehovah.” Kot Psalm 83:18 ye Isaiah 55:10, 11. Nam an̄wan̄a ibio ibio nte edide uduak esie ndinam ofụri isọn̄ akabade edi paradise. Ekem nọ n̄wed.
4 Edieke afo oyomde nditịn̄ akpan n̄kpọ inikiet inikiet, afo emekeme ndidọhọ:
◼ “Nte akanam afo emeyịk ikọ emi: ‘Ntaifiọk ke anyanini ẹma ẹdiọn̄ọ ẹban̄a odudu oro idemowo enyenede ndifiak ndiọn̄ idemesie’?” Kụbọde ka ibuot 1, page 7; kot ikpehe ekikere 4, nyụn̄ nam an̄wan̄a nte ke n̄wed emi ọnọ ibọrọ ẹmi ẹnọde uyụhọ oro ẹtode Bible kaban̄a ntak emi nnyịn ikemede ndinịm ke akpanikọ ke ẹkebot nnyịn ndidu uwem ke nsinsi. Nọ n̄wed Ndidu Uwem ke Nsinsi.
5 Mîdịghe afo emekeme ndidomo emi nse:
◼ “Nte akwa ekondo emi akakam ọwọrọ edidu ke mbuari? Ke ndusụk ebiet ọsọ ekikere edi ke kpukpru n̄kpọ ẹmi nnyịn ikụtde ẹkekam ẹwọrọ ẹdidu ke idemmọ; nte ke ẹkewọrọ ẹdidu ke mbuari. Nso idi ekikere fo? [Bet ibọrọ.] Bible ekpep ke Abasi okobot isọn̄ nte nsinsi ebietidụn̄ nnyịn.” Wọn̄ọde ka page 70 ke n̄wed Ndidu Uwem ke Nsinsi. Dụn̄ọde ikpehe ekikere 3 ye 4 ndien, ye un̄wam ndise oro odude ke page 70, nam n̄wan̄a ntak emi anade edi isọn̄ edi ubọkutom Akwa Ọdiọn̄-Ndudiọn̄.
6 N̄wed emi ekeme ndidi edidiọn̄ nnọ mme owo oro ẹnyenede esịt akpanikọ oro mbon ẹmi mînyeneke mbuọtidem ke Jehovah m̀mê ke Ikọ esie ẹbian̄ade. Ntọt akpanikọ ọdọn̄ọde ke n̄wed Ndidu Uwem ke Nsinsi ekeme ndin̄wam mme utọ owo oro ndikọri esịtekọm nnọ Andibot nnyịn, emi ke ima ima usụn̄ ekerede aban̄a nnyịn.