Ndineme Eti Mbụk ye In̄wan̄în̄wan̄ Edu
1 Kpukpru nnyịn imama ndikop idatesịt nnyụn̄ n̄kụt unen ke se nnyịn inamde, akpan akpan ke utom edinam mbet. Nso isida utọ uyụhọ oro isọk nnyịn? Enye esitọn̄ọ ke nnyịn ndinyene in̄wan̄în̄wan̄ idaha ekikere ke adan̄aemi isịnde ifịk ke eti utom eke edin̄wam mmọ en̄wen. (N̄ke 11:25) Usụn̄ nte inemede eti mbụk ekpenyene ndiwụt ke imotịm inịm se itịn̄de ke akpanikọ. Edieke itịn̄de ikọ ito esịt, do esịt akpanikọ nnyịn ye nte inịmde ke akpanikọ ke idem nnyịn ẹyewụt idem. (Luke 6:45) Ebede ke ndidomo nneme nnyịn nse, iyetịm inyene mbuọtidem ikan ke ini itịn̄de ikọ ye mme owo ke efakutom. Emi eyenyene akpan ufọn ke September ke ini ibuanade ke san̄asan̄a ubịnikọt ke ndinọ n̄wed Ata Emem ye Ifure—Oto Itie Ewe? ke usụhọde etịbe edide ₦50. Owo idisịnke n̄wed Ata Emem eke Ikọmbakara ke edinọ eke usụhọde ekọmurua emi. Enye osụk edi ke etịbe oro ẹsinọde ke ₦80. Afo emekeme ndikụt mme ekikere ẹtienede mi nte ẹdide n̄kpọ un̄wam ke ndineme eti mbụk ye in̄wan̄în̄wan̄ edu.
2 Ke ini ọnọde n̄wed “Ata Emem,” afo emekeme nditịn̄ emi ke akpa ediwaha:
◼ “Ke ndinyene nneme ye mbọhọidụn̄ nnyịn, nnyịn imokụt ite ke ndusụk owo ẹkọn̄ mbuọtidem mmọ ke Abasi. Ọsọn̄ mmọ eken ndinịm enye ke akpanikọ. Afo ekere didie? [Bet ibọrọ.] Tịm fiọk nte Bible etịn̄de aban̄a n̄kpọ emi. [Kot Rome 1:20.] Nnyịn imekeme ndikụt uyarade ‘nsinsi odudu ye idaha esie nte Abasi’ ke ndise mme n̄kpọ ẹmi enye okobotde.” Kot ikpehe ekikere 5 ke page 59 ke n̄wed Ata Emem, nyụn̄ dụri ntịn̄enyịn ka ikpehe ekikere 11 ke page 62, ọsọn̄ọde owụt akpanikọ oro nte ke Abasi akanam ikpụho ndinam n̄kpọ ke ini edisu uduak esie oyomde edinam. Nam usio-ukot oro enye akanamde an̄wan̄a ke ini akpa ete ye eka nnyịn ẹkesọn̄de ibuot ye enye, ke ntre ẹtienede Satan ke edu nsọn̄ibuot esie. Tịn̄ ban̄a Genesis 3:15 ke ẹmende ẹdomo ye Ediyarade 12:9. Dọhọ ke iyenọ owo oro n̄wed oro ke usụhọde etịbe edide ₦50 nyụn̄ dọhọ ke iyefiak idi kaban̄a n̄kaiso nneme.
3 Ke ini afiakde aka ndise mbon oro afo akadade eneme ntak nnyịn ikpenyenede mbuọtidem ke Abasi, ekeme ndidi afo eyema ndidọhọ ntem:
◼ “Isan̄ oko n̄kedide, nnyịn ima ineme iban̄a uyarade emi odude kaban̄a edidu Abasi nte ẹwụtde ke utịbe utịbe edibotn̄kpọ esie ye mben̄eidem esie ndisu un̄wọn̄ọ esie. Nte ọsọn̄ fi ndinịm ke akpanikọ nte ke Enyeemi okobotde ekondo ayada ata emem ye ifụre n̄ko ọsọk ubonowo? [Bet ibọrọ.] Afo eyeti ete ke isan̄ oko n̄kedide, mma ntịn̄ ntụk n̄wed Genesis 3:15 emi ọsọn̄ọde etịn̄ aban̄a un̄wọn̄ọ Abasi kaban̄a mfri oro edisobode Satan akwa asua nnyịn man otodo ubonowo ekeme ndinyene ata emem ye ifụre. Ntre, edi n̄kpọ udọn̄ ndifiọk nte ke Andibot ama ebebiere ini iso nnyịn.” Kot Isaiah 46:9, 10. Ọkọn̄ọde ke udọn̄ owo kiet kiet, da ntọt oro odude ke page 66 nyụn̄ kot ikpehe ekikere 18 emi anamde an̄wan̄a udeme oro Jesus enyenede ke edisu uduak Jehovah kaban̄a nsinsi inemesịt ofụri ubonowo. Dọhọ ke iyenịm ukpepn̄kpọ Bible ndien, edieke ẹnyịmede, tọn̄ọ ukpepn̄kpọ ke n̄wed Ifiọk.
4 Afo emekeme ndikụt nneme enyeemi nte edide n̄kpọ un̄wam ke ini ọnọde n̄wed “Ata Emem.”
◼ “Ke nnyenede nneme ye mme owo ke mbọhọ emi, mmokụt nte ke ata ediwak owo ẹyom ifụre ifụre n̄kann̄kụk ye emem emem ererimbot. Nso idi ekikere fo kaban̄a ntak emi owo okpude ndinyene mme utọ idaha oro? [Bet ibọrọ.] Ndusụk mme adaiso ererimbot ẹkeme ndinyene esịt akpanikọ ẹnyụn̄ ẹnam ndusụk ufọn, edi tịm fiọk se Bible ke ọniọn̄ etemede.” Kot Psalm 146:3, 4; ekem bụp ete: “Nte odu owo emi ekemede ndiyụhọ mme udọn̄ owo?” Kot ufan̄ikọ 5 ye 6. Wụt n̄wed Ata Emem, nyụn̄ kûbọde ka ibuot 2 emi ibuotikọ edide “Nte Me Owo Ekeme Ndida Emem ye Ifure Ebigide Ndi?” Dụri ntịn̄enyịn wụt mme ufọn ukara Abasi. Nọ n̄wed oro ke usụhọde etịbe edide ₦50.
5 Edieke ẹkenemede ẹban̄a ukara Abasi ke akpa, afo emekeme ndidomo ekikere enyeemi ke mfiakn̄ka:
◼ “Ke ini n̄kedide mi usen ifan̄ ke edem, nnyịn ima ineme iban̄a edikpu oro owo okpude ndida ata emem ndi ke isọn̄. Eyedi afo emeti nte ke nnyịn ima ikụt ntak emi Bible ọnọde kaban̄a utọ edikpu oro. [Fiak kot Psalm 146:3.] Ndi afo ama okụt ntak emi Abasi ọdọhọde nnyịn ikûkọn̄ idotenyịn nnyịn ke mme owo? [Bet ibọrọ.] Eyedi afo omonyịme nte ke idotenyịn ekededi kaban̄a nsinsi usọbọ enyene ndito Abasi. Ẹnam ntak emi nnyịn ikemede ndinyene utọ mbuọtidem oro an̄wan̄a ke Psalm 146:10. [Kot.] Edieke nnyịn iyomde ndidu ke idak Obio Ubọn̄ Abasi, nso ke ana nnyịn inam?” Kûbọde ka page 21 ke n̄wed Ata Emem, kot ikpehe ekikere 40 ye 41, nyụn̄ tịn̄ akpan n̄kpọ ke John 17:3. Dọhọ ke iyanam iwụt nte ediwak miliọn owo ẹsan̄ade ẹnyene ifiọk oro adade osịm nsinsi uwem ebe ke ukpepn̄kpọ Bible. Edieke ẹnyịmede, wụt n̄wed Ifiọk nyụn̄ tọn̄ọ ukpepn̄kpọ.
6 Ke ndinam utom to ke ufọkurua sịm ufọkurua m̀mê ke urua, afo emekeme ndikama ibio ibio usụn̄ enyeemi ye n̄wed “Ata Emem”:
◼ “Mfịn nnyịn inam akpan utom inọ mme anam mbubehe ke n̄kann̄kụk emi. Kpukpru nnyịn imekere iban̄a n̄kọri ke ubiatibet ye afai ke n̄kann̄kụk nnyịn. Ndi afo emekere ke owo ndomokiet enyene ata usọbọ ọnọ mfịna emi? [Bet ibọrọ.] Abasi enyene usọbọ.” Kûbọde ka ibuot 9 ke page 98 eke n̄wed Ata Emem; kot nyụn̄ tịn̄ tụk Isaiah 45:18 ke ikpehe ekikere 4, nyụn̄ nọ n̄wed oro ke usụhọde etịbe edide ₦50.
7 Ke ini afiakde aka ebịne anam mbubehe emi afo okonịmde n̄wed “Ata Emem” ọnọ, afo emekeme ndidọhọ ntem:
◼ “Isan̄ oko n̄kedide, mma ntịn̄ nte ke Abasi edi n̄kukụre enyeemi enen̄ede enyene usọbọ emi ebịghide ọnọ ubiatibet ye afai. Nte ekemde ye un̄wọn̄ọ esie, nnyịn imekeme ndibuọt idem nte ke ẹyenyene emem emem isọn̄. Tịm fiọk edimek oro anade nnyịn owo kiet kiet ke iso.” Kot ikpehe ekikere 11 ke page 101 ke n̄wed Ata Emem, esịnede Isaiah 25:6. Dọhọ ke iyesinịm ukpepn̄kpọ Bible mfọn, edide ndinịm ke itie mbubehe mmọ m̀mê ke ufọk mmọ.
8 N̄wed efen oro ẹkemede ndinọ ke ini san̄asan̄a ubịnikọt emi edi n̄wed Afo Emekeme Ndidu Uwem ke Nsinsi ke Paradise ke Isọn̄. Afo emekeme nditịm mmemmem nneme ke ini ọnọde n̄wed emi. Nte ‘ekemmọ mme anamutom ye Abasi,’ nnyịn imenyene kpukpru ntak nditie in̄wan̄în̄wan̄ ke ini inemede eti mbụk. (1 Cor. 3:9) Nnyịn ndika iso nnyene edu emi eyesụn̄ọ ke akpakịp edidiọn̄ Jehovah.