Edinọ Eti Mbụk ye Ifiọk nte ke Oyom Ẹnam N̄kpọ Usọp Usọp
1 Nnyịn iwụt ntotụn̄ọ esịtekọm oro inyenede inọ Obio Ubọn̄ Abasi ebe ke ndibuana ke utom ukwọrọikọ Christian ke ofụri esịt. Oyom nnyịn ibuana ke utom emi ye ifiọk nte ke oyom ẹnam n̄kpọ usọp usọp. Ntak-a? Koro mme anamutom iwakke, utịt editịm n̄kpọ emi ke asan̄a ekpere, ndien uwem mbon oro ẹdude ke efakutom nnyịn odu ke itiendịk. (Ezek. 3:19; Matt. 9:37, 38) Utọ ndodobi mbiomo oro oyom mfọnn̄kan ukeme nnyịn ke utom ukwọrọikọ. Didie ke nnyịn ikeme ndiwụt ke imọfiọk nte ke oyom ẹnam n̄kpọ usọp usọp kaban̄a utom an̄wautom nnyịn? Ebe ke nditịm nti nneme ke mbemiso, ebe ke nditịn̄ enyịn ke ndiyom mme owo ke ebiet ekededi emi ẹkemede ndikụt mmọ, ebe ke ndinyene mme n̄wetnnịm n̄kpọ nnọ kpukpru mbon oro ẹwụtde udọn̄ nnyụn̄ mfiak usọp usọp n̄ka man akanam n̄kpọ aban̄a udọn̄ oro, onyụn̄ ebe ke nditi nte ke sia uwem abuanade, nnyịn ikpenyene ndida utom ukwọrọikọ nnyịn ke akpan n̄kpọ. Mme ekikere ẹtienede mi ẹkeme ndidi n̄kpọ un̄wam nte nnyịn itịmde idem ndinọ eti mbụk ye ifiọk nte ke oyom ẹnam n̄kpọ usọp usọp ke February. N̄wed ẹnọde edidi Afo Emekeme Ndidu Uwem ke Nsinsi ke Paradise ke Isọn̄.
2 Afo emekeme nditọn̄ọ nneme ebe ke nditịn̄ ibio ibio mban̄a mme mfịna ẹmi ẹsobode ke n̄kann̄kụk, ndien ekem afo emekeme ndidọhọ:
◼ “Ediwak owo ẹnịm ke akpanikọ ẹte ke Abasi odu, edi mmọ ẹsikere ẹte: ‘Nso orụk ini iso ke enye oyom ọnọ nnyịn?’ Didie ke afo ọkpọbọrọ oro? [Bet ibọrọ.] Ndi afo ama ọdiọn̄ọ ke Bible enen̄ede anam uduak emi Abasi enyenede ọnọ ubonowo ye se enye edinamde man ọyọhọ enye an̄wan̄a?” Kûbọde ka page 8 ke n̄wed Ndidu Uwem ke Nsinsi. Kot Isaiah 45:18 ke ikpehe ekikere 5 ye edinam an̄wan̄a oro ẹnọde ke ikpehe ekikere 6. Kûbọde ka ndise odude ke page 12 ye 13 ndiwụt se emi ọwọrọde ọnọ ini iso nnyịn. Kot Isaiah 11:6-9 ke ikpehe ekikere 12. Nọ n̄wed ke etịbe edide ₦80 nyụn̄ diomi ndifiak n̄ka ke ini oro eferede owo ke idem man aka iso ke nneme.
3 Emekeme ndida ibio ibio nneme emi n̄ka iso ke akpa nneme emi akadade Isaiah 45:18 eneme:
◼ “Ke isan̄ oko n̄kedide, nnyịn ima ineme iban̄a un̄wọn̄ọ Abasi nditịm obufa n̄kaowo eke isọn̄ nnọ ubonowo. [Fiak dụri ntịn̄enyịn ka ndise oro odude ke page 12 ye 13 ke n̄wed Ndidu Uwem ke Nsinsi.] Nte afo akpama ndikụt ubon fo adarade mme utọ akama-idatesịt idaha oro? [Bet ibọrọ.] Mbụme edi, Mme un̄wọn̄ọ Abasi ẹdi se ẹberi edem adan̄a didie? Mbọk tịm fiọk se enye ke idemesie ọdọhọde.” Kot Isaiah 55:11 ke ikpehe ekikere 8 ke page 9. Bụp mbụme oro ẹmịn̄de-mịn̄ ẹnọ ikpehe ekikere 8 ke page 9, nyụn̄ kot ibọrọ, esịnede akpatre udịmikọ ke ikpehe ekikere oro. Tịn̄ ban̄a edinọ ukpepn̄kpọ Bible mfọn. Diomi ndinam n̄wụt ke ukperedem.
4 Sia ediwak owo ẹkopde editịmede esịt ẹban̄a n̄kaiso mfịna oro ubonowo osobode, afo emekeme nditịn̄ n̄kpọ ntem ke akpa ediwaha:
◼ “Kpukpru owo oro nsobode ẹkop editịmede esịt ẹban̄a mme mfịna oro isobode ke n̄kann̄kụk nnyịn. [Siak ifan̄.] Ke ediwak isua mbon mbre ukara ẹmen̄wọn̄ọ ndida nsinsi usọbọ ndi, ndusụk ẹmenyụn̄ ẹdomo ndinam ntre. Afo ekere ke nso inam mme idaha ẹka iso ndidọdiọk? [Bet ibọrọ.] Bible ọnọ edinam an̄wan̄a oro akananam ekese owo mîkereke iban̄a. N̄wed Ediyarade etịn̄ aban̄a ekọn̄ akadade itie ke heaven. Tịm fiọk utịp, nte ẹwetde ke Ediyarade 12:9.” Kot ufan̄ikọ oro, ekem kûbọde ka page 20 ye 21 ke n̄wed Ndidu Uwem ke Nsinsi. Da ndise oro ndinam an̄wan̄a nte Satan esịnde idem ke mbubehe ererimbot. Nọ n̄wed ke etịbe edide ₦80 nyụn̄ diomi ndifiak ndi man eneme nte Abasi edikọkde mme mfịna ubonowo.
5 Edieke ọkọdọhọde ke iyafiak idinam mme usọbọ Abasi kaban̄a mme mfịna mfịn an̄wan̄a, afo emekeme ndidomo usụn̄ enyeemi:
◼ “Mmesịn akpan ukeme ndifiak ndi man otodo nnyịn ikeme ndika iso ke nneme nnyịn oro aban̄ade ata usọbọ ke mme mfịna oro ubonowo osobode. Ke isan̄ oko n̄kedide, nnyịn ima ikụt ke Bible owụt Satan kpa Devil nte enyeemi abian̄ade ofụri ererimbot. Sia enye edide edibotn̄kpọ eke spirit oro akande ukeme owo, ndi afo emekere ke usụn̄ odu ndisio odudu esie mfep? [Bet ibọrọ.] Mbọk tịm fiọk se Bible ọdọhọde.” Kot nyụn̄ tat Ediyarade 20:1-3. Ebede ke ndida ndise oro odude ke page 4-5 ke n̄wed Ifiọk, wụt nte mme idaha ẹditiede ke odudu Satan mîdụhe. Dọhọ ke iyenịm ukpepn̄kpọ Bible nyụn̄ domo nditọn̄ọ enye ke ebe oro.
6 Sia ata ediwak owo ẹnyenede udọn̄ ẹban̄a n̄kann̄kụk, afo emekeme nditịn̄ n̄kpọ ntem man ọtọn̄ọ nneme:
◼ “Nnyịn imokụt ite ke ekpere ndidi kpukpru owo ẹkop editịmede esịt ẹban̄a edisabade oro ẹsabarede ofụm, mmọn̄, ye udia. Ke ndusụk idụt idaha n̄kann̄kụk ke akam esesịn uwem ke itiendịk. Sia Abasi edide Andibot isọn̄, afo ekere ke enye edinam nso aban̄a emi? [Bet ibọrọ.] Bible ọdọhọ ete ke Abasi oyokot ete idinam ibat iban̄a usụn̄ emi nnyịn ikadade ekondo inam n̄kpọ. [Kot Ediyarade 11:18b.] Kere ise ban̄a edidụn̄ ke isọn̄ oro ọbọhọde kpukpru usabaden̄kpọ!” Sio un̄wọn̄ọ Abasi eke paradise wụt, nte ẹwụtde ke Ediyarade 21:3, 4. Wụt ndise oro odude ke page 12 ye 13 ke n̄wed Ndidu Uwem ke Nsinsi. Nọ n̄wed ke etịbe edide ₦80 nyụn̄ diomi ndifiak n̄ka.
7 Ke ini afiakde aka ebịne owo emi okowụtde udọn̄ ke Paradise isọn̄, afo emekeme ndidọhọ:
◼ “Ke isan̄ oko n̄kedide, nnyịn ima inyịme ite ke Abasi enyene ndisịbe ndụk ke mbubehe owo edieke anade ẹkọk mme mfịna isọn̄ emi ẹma ẹkesabade. Edi mbụme edi, Nso ke nnyịn inyene ndinam man ibọhọ idụk edinen obufa ererimbot Abasi? Kot John 17:3. Dọhọ enyeneufọk ọbọ ufọn oto ukpepn̄kpọ Bible mfọn nnyịn man enyene akpan ifiọk emi.
8 Nso ifetutom ke edi ntem ndidi se ẹdade ẹnam utom nte mbon idọk eyomfịn ndinyụn̄ nnam utom ukwọrọikọ unyan̄a uwem! Kpukpru nnyịn ikpakam ika iso ndisịn idem ke ndikwọrọ eti mbụk ye ifiọk nte ke oyom ẹnam n̄kpọ usọp usọp, ‘ifiọkde ite utom eke inamde idiwọrọke idi ikpîkpu.’—1 Cor. 15:58.