Nditan̄a “Ikọ Prọfesi”
1 Nnyịn idu uwem ke ini oro mme prọfesi ẹmi ẹdude ke n̄wed Ediyarade ẹsude. Ediwak owo ke ẹyom usụn̄ nditịm mfiọk se mme n̄kpọntịbe oro ẹtịmerede owo ẹmi ẹdade itie ẹwọrọde. Mmọ ẹkeme ndibọ ufọn nto ‘edikop mme ikọ’ prọfesi eke Ediyarade. (Edi. 1:3) Ke ọfiọn̄ March, nnyịn imenyene ifet ndin̄wam mmọ ebe ke ndinọ n̄wed Ata-Utịt Ediyarade. Ke ini inọde enye nnyịn ikpenyene nditi nte ke ẹma ẹbebem iso ẹtịn̄ ẹban̄a mme mfịna oro ubonowo osobode mfịn ke n̄wed Ediyarade. Nso, ndien, ke nnyịn ikeme nditịn̄?
2 Usụn̄ edisobo ye owo enyeemi ekeme ndinyene uforo:
◼ “Ekọn̄, akan̄, ye udọn̄ọ ẹmetụhọde ubonowo ke ọyọhọ isua ikie 20 emi. Didie ke oro ekeme ndidi ntre ke ini owo ama akanam ekese n̄kọri ke ifiọk utom usọ? [Bet ibọrọ.] Akpa ediwak owo idem ndifiọk nte ke ẹma ẹbem iso ẹtịn̄ ẹban̄a mme idaha ẹmi ke Bible. Anaedi afo ememehe ye ikọ oro ‘mme awat enan̄-mbakara inan̄ eke Ediyarade.’ Se Bible etịn̄de aban̄a mme awat enan̄-mbakara ẹmi enen̄ede edi prọfesi emi osude ke mme n̄kpọntịbe ererimbot mfịn. [Kụbọde n̄wed Ata-Utịt Ediyarade ka ibuot 16, nyụn̄ wụt mme ndise ẹmi ẹdude ke page 91-97.] Ke adan̄aemi prọfesi emi ebemde iso etịn aban̄a ini akwa mfụhọ, enye n̄ko ọnọ idotenyịn. [Kot Ediyarade 6:2 ke ikpehe ekikere 3.] Andiwat afia enan̄-mbakara edi Jesus Christ. Enye ọn̄wọn̄ọ ndikan idiọkido nnyụn̄ nda ererimbot inemesịt ye emem ndi ebe ke Obio Ubọn̄ oro enye ekekpepde nnyịn ndibọn̄ akam mban̄a.” Ekem nọ n̄wed.
3 Ekeme ndidi mbụme emi eyedemede inem inem nneme:
◼ “Afo ekere ke oyom nso man ẹsio mme idiọk idaha ke ererimbot ẹfep? [Bet ibọrọ.] Ata ediwak owo ẹnyịme ẹte ke oyom ẹnam ikpọ ukpụhọde edieke anade ererimbot emi ọbọhọ. Bible owụt ete ke Abasi ọfiọk nte edikọkde mme mfịna nnyịn onyụn̄ ọn̄wọn̄ọ ndin̄wam nnyịn.” Kụbọde ka page 171 ke n̄wed Ata-Utịt Ediyarade, nyụn̄ kot Ediyarade 11:15 ke ikpehe ekikere 1. Kụbọde ka mme ndise ẹdude ke page 302 ye 308, nyụn̄ wụt mme edidiọn̄ oro ẹdinyenede ke idak Obio Ubọn̄ oro Christ edikarade. Ndien nam an̄wan̄a nte enyeneufọk ke idemesie ekemede ndibọ ufọn nyụn̄ nọ n̄wed.
4 Ekeme ndifere fi ke idem nditịn̄ n̄kpọ ebietde enyeemi:
◼ “Ọsọn̄ ediwak owo oro ẹkotde n̄wed Ediyarade eke Bible ndifiọk se enye ọwọrọde. Enye etịn̄ aban̄a nsio nsio esen esen ye mme n̄wọrọnda n̄kpọntịbe. N̄wed emi, Ediyarade—Ubọn̄ Ubọn̄ Ata-Utịt Esie Emekpere!, odụn̄ọde ufan̄ikọ kiet kiet ke ofụri n̄wed Ediyarade onyụn̄ owụt nte edisu oro mme prọfesi esie ẹsude ẹtụkde nnyịn owo kiet kiet.” Kụbọde n̄wed oro ka page 15, ikpehe ekikere 2, nyụn̄ wụt Ediyarade 1:1, oro ẹwetde ke ndodobi ubọkn̄wed. Nam an̄wan̄a nte ke ẹnọ mme akpan utịn̄ikọ ntem ke ufan̄ikọ kiet kiet ke n̄wed Ediyarade ye nte ke ntọt emi eyen̄wam enye nditịm mfiọk mme n̄wọrọnda prọfesi ẹmi. Kpọn̄ n̄wed emi nọ ke etịbe oro ẹsinọde.
5 Edieke owo oro mînyeneke ini, afo emekeme ndinọ magazine m̀mê tract. Ke ini afo afiakde aka kaban̄a nneme efen efen, emekeme ndinọ n̄wed oro.
6 Etop oro odude ke Ediyarade otụk ofụri ubonowo. Oyom kpukpru owo ẹkop mme ikọ prọfesi ẹmi. Akpakam nnyịn inam kpukpru se ikemede man itan̄a akpan etop emi.