N̄wam Mmọ Ẹfiọk
1 Apostle Peter ama onyịme ete ke ndusụk n̄kpọ oro ẹwetde ke Bible ‘ẹsọn̄ owo nditịm mfiọk.’ (2 Pet. 3:16) Ediwak owo ẹma ẹkere ntre ẹban̄a n̄wed Ediyarade. Nte ededi, ẹnam se enye ọwọrọde ana ata in̄wan̄în̄wan̄ ke n̄wed oro Ediyarade—Ubọn̄ Ubọn̄ Ata-Utịt Esie Emekpere! Didie ke nnyịn ikeme ndin̄wam mbon oro ẹnyenede udọn̄ ndida enye nnam n̄kpọ ke usụn̄ oro ọfọnde akan?
2 Edieke afo ekenemede Ediyarade 1:3 ke akpa ediwaha fo, ekikere emi ekeme ndidemede obufa udọn̄:
◼ “Ke akpa ini nnyịn ima ineme nte edifiọk n̄wed Ediyarade ekemede ndida inemesịt ndi. Nte ededi, utọ inemesịt oro isidịghe ke mbuari. Ke nsụhọde n̄kaha ẹyom n̄kpọ iba ẹto nnyịn: Ana nnyịn ikpep Bible, ndien ana nnyịn ida se ikpepde isịn ke edinam.” Kot nyụn̄ tịn̄ ban̄a James 1:25. Kụbọde ka ikpehe ekikere 9 ke page 8, nyụn̄ wụt nte edifiọk n̄wed Ediyarade ekemede ndin̄wam nnyịn ikpep nte ikemede ndinyene inemesịt ke paradise obufa ererimbot.
3 Edieke afo ekenemede John 17:3 ke akpa ediwaha fo, afo emekeme ndisọn̄ọ ntịn̄ mban̄a ufọn edinyene ekese ifiọk Bible ke ndidọhọ ete:
◼ “Isan̄ oko n̄kedide mi, nnyịn ima ikot ke John 17:3 ite ke ndinyene ifiọk aban̄ade Abasi ekeme ndida n̄kosịm nsinsi uwem. Edi nte afo akpama ndidu uwem ke nsinsi ke utọ ererimbot oro nnyịn idụn̄de mfịn? [Bet ibọrọ.] Ekese owo ikpamaha. Ke ntak emi, nnyịn imekeme ndikop idatesịt ke ini nnyịn ikopde se Abasi ọn̄wọn̄ọde.” Kụbọde ka ikpehe ekikere 6 ke page 303, kot Ediyarade 21:4, ndien ekem nam nte ererimbot editiede an̄wan̄a ke ini “ebe-iso n̄kpọ ẹma ẹbe ẹfep.” Dọhọ ke iyefiak iwaha kaban̄a n̄kaiso nneme.
4 Edieke afo akadade ndise odude ke page 302 ndiwụt nte ke Obio Ubọn̄ Abasi eyeda utịt ọsọk mfụhọ, afo emekeme ndifiak n̄kụbọde n̄wed oro n̄ka page oro onyụn̄ ọdọhọ ete:
◼ “Nnyịn ima ineme iban̄a mme edidiọn̄ ẹwụtde mi oro mme owo ẹdidarade ke idak ukara Obio Ubọn̄ Abasi. Nso ke afo ekere ke ana nnyịn inam edieke nnyịn iyomde ndidu uwem ke idak Obio Ubọn̄ oro? [Bet ibọrọ.] Ndusụk owo ke ini Bible ẹma ẹnịm ata nti uwụtn̄kpọ oro nnyịn ikpanamde ọfọn ndikpebe.” Kot Utom 17:11, ọsọn̄ọde etịn̄ ufọn ‘edidụn̄ọde N̄wed Abasi ke usen ke usen.’ Nam an̄wan̄a nte ke Mme Ntiense Jehovah ke ẹn̄wam mbon esịt akpanikọ ke n̄kann̄kụk ndikpep Ikọ Abasi nnyụn̄ ntịm mfiọk enye ọfọn.
5 Edieke afo ọkọnọde enyeneufọk oro akananade ini etieti ndineme nneme tract oro “Nte Ererimbot Emi Eyebọhọ?,” afo emekeme ndikama usụn̄ enyeemi:
◼ “Ke ini n̄kedide ke ndondo emi, afo ama enen̄ede anana ini. Mma nnọ fi tract oro ekedemerede mbụme aban̄a ererimbot ndibọhọ mme ntịme ntịme ini ẹmi. Nnyịn ima ikot Ediyarade 21:4, emi ẹkotde ẹsịn mi ke n̄wed emi, Ediyarade—Ubọn̄ Ubọn̄ Ata-Utịt Esie Emekpere! [Tọn̄ọ ke ikpehe ekikere 6 ke page 303 kot.] Ndise emi [ke page 302] ọnọ fi ekikere aban̄a nte enye editiede ke ini ‘Abasi edikwọhọrede kpukpru mmọn̄eyet ke enyịn nnyịn efep.’ N̄wed emi ọnọ uyarade akpanikọ nte ke un̄wọn̄ọ emi eyesu ke ata n̄kpet n̄kpet ini iso. Edieke afo edimade ndikot enye, okwo edi emi ke etịbe ₦240.”
6 Edieke afo okụtde owo emi enyenede udọn̄, afo ke akpatre eyeyom ndidụri ntịn̄enyịn n̄ka n̄wed Ifiọk Oro Adade Osịm Nsinsi Uwem onyụn̄ ada enye ọtọn̄ọ ukpepn̄kpọ. Afo ke akpanikọ eyekụt ekese idatesịt ke ndin̄wam ‘ndisian mme ọkọi.’—Ps. 119:130.