Ediyarade—Ukpọhọde Ata Inemesịt
1 Mme ikọ apostle John ke Ediyarade 1:3 ẹdi eti mbụk ẹnọ nnyịn koro enye asiande nnyịn nte ẹkemede ndikụt inemesịt. Enye ekewet ete: “Ọfọfọn ọnọ andikot n̄wed, ye mmọ ẹmi ẹkopde ikọ prophecy emi, ẹnyụn̄ ẹnịmde mme n̄kpọ eke ẹwetde ke esịt.” N̄wed oro Ediyarade—Ubọn̄ Ubọn̄ Ata-Utịt Esie Emekpere! aman̄wam ediwak owo ndikụt ekese inemesịt. Nnyịn imenyene eti ntak ndinọ mbon en̄wen enye.
2 Afo emekeme nditọn̄ọ nneme ye mbụme emi:
◼ “Nte afo emekere ke ẹkewet n̄wed Ediyarade eke Bible man an̄wan̄a owo, mîdịghe nte enye ekenyene ndidi ndịben̄kpọ kpukpru ini? [Bet ibọrọ.] Ediwak owo ẹnyene ukem ekikere fo. Tịmfiọk se Bible etịn̄de ke Ediyarade 1:3. [Kot.] Ntre Ediyarade ekeme ndin̄wan̄a owo, ndien ifiọk oro enye ọdọn̄ọde ekeme ndida inemesịt nsọk nnyịn. Didie ke emi ekeme nditịbe?” Fiak dụn̄ọde mme ekikere oro ẹdude ke ikpehe ekikere 2 ke page 6, ndien ekem dọhọ ete: “N̄wed emi eneme ufan̄ikọ kiet kiet ke n̄wed Ediyarade. Eyetịm odot ndida ini fo n̄kot enye. N̄kpama ndikpọn̄ enyeemi nnọ fi ke etịbe ₦240.”
3 Sia ediwak owo ẹkerede ẹban̄a edinyene n̄kpọ obụkidem oro mmọ ẹyomde, emi ekeme ndinam ẹnyene ndusụk udọn̄:
◼ “Afo ekere ke nso idi akakan udọn̄ nnyịn? [Bet ibọrọ.] Odu ediwak owo ẹmi ẹnịmde ke akpanikọ ẹte ke nnyịn imoyom ekese n̄kpọ obụkidem.” Kụbọde ka page 73 nyụn̄ dụn̄ọde mme akpan n̄kpọ ẹdude ke ekebe oro ẹkotde “Uyom Inyene Obụkidem ye Eti Ibuot.” Kaiso ke ndidọhọ ete: “Emi owụt ete ke ẹdori nsọn̄uyo ẹkaha ke mme n̄kpọ obụkidem; mme udọn̄ n̄kpọ spirit ẹkpedi se ibehede nnyịn ikan. Ata ifiọk edi se nnyịn inen̄ede iyom. Edi ifiọk aban̄ade nso?” Kot John 17:3, nyụn̄ nam an̄wan̄a nte ifiọk aban̄ade Abasi ekemede ndida nsịm nsinsi uwem. Nọ n̄wed ke etịbe oro ẹsinọde, nyụn̄ diomi ndifiak ndi nnyụn̄ ndiwụt nte enye ayarade utịbe utịbe ntọt aban̄ade uduak Abasi ndiyụhọ kpukpru udọn̄ ubonowo.
4 Sia ediwak owo ẹkopde editịmede esịt ẹban̄a ndutụhọ ke ererimbot, afo emekeme ndidomo emi nse:
◼ “Kpukpru owo oro ndade nnyene nneme ẹkop editịmede esịt ẹban̄a ini iso. Ndusụk mme adaiso ererimbot ẹkere ke nnyịn idu ke mben obufa eyo emem. Didie ke afo ekere aban̄a oro? [Bet ibọrọ.] Kpa ye ofụri ukeme owo, afai ye mfụhọ ẹkaiso ndikọri ke ofụri ererimbot. Bible ayarade n̄kukụre nsinsi usọbọ odude ọnọ mme mfịna ẹmi. [Kot 2 Peter 3:13. Kụbọde ka ndise oro odude ke page 302, nyụn̄ nam an̄wan̄a nte Obio Ubọn̄ Abasi eke heaven edidade nsinsi emem ye ifụre edi ke isọn̄ emi.] N̄wed emi eyen̄wam fi okụt nte afo ekemede ndidi ubak obufa n̄kaowo emi ẹdidarade nsinsi uwem ke idak ukara Obio Ubọn̄ Abasi.”
5 Edieke afo osobode owo emi anamde n̄kpọ onyụn̄ anade afo anam ibio ibio, afo emekeme ndidọhọ ntem:
◼ “Sia afo enyenede esisịt ini kpọt, nyema ndikpọn̄ tract [m̀mê ibuotikọ magazine] emi ẹkotde [mek tract m̀mê ibuotikọ oro odotde]. Mmesịn udọn̄ nnọ fi ndikot enye. Ini en̄wen oro ndiwahade, nyema ndifiọk se afo ekerede aban̄a oro.”
6 Ke ini ọnọde mme n̄wed nnyịn, nọ mbon en̄wen ifet ndiwụt esịtekọm mmọ ke ndinọ etịbe ke n̄wed oro nte ẹsinọde. Ntọt oro esịnede ke n̄wed oro eyedian n̄kpọ ke inemesịt oro mmọ ẹdinyenede ebe ke ndifiọk se mme utịbe utịbe prọfesi Ediyarade ẹwọrọde.—N̄ke 3:13.