N̄wam Mbon En̄wen ‘Ẹnịm Mme N̄kpọ eke Ẹwetde’
1 ‘Ndikop’ mme ikọ prọfesi oro ẹdude ke n̄wed Ediyarade ikemke. Man owo ọbọ ufọn ọyọhọ ọyọhọ, ana enye ‘onịm’ mme n̄kpọ oro ẹwetde. (Edi. 1:3) Ndinịm n̄wed edi sụk akpa usio-ukot ke ndinam mme mbet. Ndondo oro nnyịn ikụtde mbon oro ẹnyenede udọn̄ ẹmi ẹnyịmede ndikop, nnyịn ikpenyene ndifiak n̄ka usọp usọp man ikan̄wam mmọ ẹkpep n̄kpọ efen efen. Nso ke nnyịn ikeme nditịn̄ mban̄a ke edifiak n̄waha nnyịn?
2 Edieke afo eketịn̄de aban̄a mme ndamban̄a awat enan̄-mbakara inan̄ ke akpa ediwaha fo, afo emekeme nditọn̄ọ nneme fo ke usụn̄ emi:
◼ “Isan̄ oko nnyịn ima ineme iban̄a n̄wed Ediyarade ye nte mme prọfesi esie ẹsude mfịn ke mme n̄kpọntịbe ererimbot. Ediyarade ibuot 6 ama ebem iso etịn̄ aban̄a uwat mme ndamban̄a awat enan̄-mbakara inan̄, emi edisụn̄ọde ke ekese afai ye nnanenyịn ke isọn̄. Nnyịn imenen̄ede ikụt emi adade itie. Ediwak owo ẹsiyịk m̀mê nnanenyịn emi editre ini ewe man nnyịn idara uwem ke emem emem obufa ererimbot. Nso idi ekikere fo? [Bet ibọrọ.] Mme mbet Jesus ẹma ẹnyene udọn̄ ke ibọrọ mbụme emi.” Kot Matthew 24:3, emi ẹbụpde mbụme oro, ndien ekem kot Mt 24 ufan̄ikọ 34, emi Jesus ọnọde ibọrọ. Edieke ẹwụtde udọn̄, nam ukperedem ini otịm n̄wan̄a.
3 Edieke afo ekenemede abana Obio Ubon Abasi ke akpa ediwaha, afo emekeme ndibiere ndikaiso ke ndibụp mbụme emi:
◼ “Ke ekikere fo, nso orụk ukara ke oyom man ẹyụhọ kpukpru udọn̄ ubonowo? [Bet ibọrọ. Kot Jeremiah 10:23.] Nte afo ekemede ndikụt, akananam Abasi iyomke owo ọnọ idemesie ndausụn̄. Ndidomo ndinam ntre ye unana un̄wam Abasi edi ntak ekese mfịna oro nnyịn inyenede. Obio Ubọn̄ Abasi edi n̄kukụre ukara oro ekemede ndinọ se nnyịn iyomde.” Kụbọde ka page 230 ke n̄wed Reasoning, nyụn̄ neme mme itien̄wed ẹmi ẹdude ke idak akpa ekpri ibuotikọ. Kaiso ke nneme ebe ke ndinam n̄wan̄a ntak emi nnyịn ikemede ndikọn̄ ọyọhọ mbuọtidem nnyịn ke Abasi.
4 Afo emekeme ndidomo usụn̄ enyeemi man ọtọn̄ọ nneme N̄wed Abasi:
◼ Wụt ndise emi odude ke page 302 ke n̄wed Ata-Utịt Ediyarade, nyụn̄ nam an̄wan̄a ntem: “Ubonowo eyedara mme idaha ẹmi ke ini ẹdinamde uduak Abasi ke isọn̄ nte ẹnamde ke heaven. Nte ededi, ndusụk owo ẹkop ndịk nte ke mme idiọk idaha ẹyefiak ẹdu. Oro idikemeke nditịbe koro kpukpru mme idiọkowo mîdidụhe aba.” Kot Psalm 37:10,11. Sịn udọn̄ nọ enyeneufọk ndibọ ufọn nto ndutịm ukpepn̄kpọ Bible nnyịn man ekpep n̄kpọ efen efen.
5 Edieke afo ọkọnọde tract oro “Uwem ke Emem Emem Obufa Ererimbot,” wụt ndise odude ke edem ndien ekem kot ikpehe ekikere 1 ke idak ibuotikọ oro “Uwem ke Obufa Ererimbot Abasi. “ Ekem dọhọ ete:
◼ “Edieke nnyịn iyomde ndidụn̄ ke utọ ererimbot oro, odu akpan n̄kpọ oro anade nnyịn inam.” Kot akpatre ikpehe ekikere, ndien nọ n̄wed Ata-Utịt Ediyarade.
6 Sia uduak nnyịn edide nditọn̄ọ mme ukpepn̄kpọ Bible, oyom nnyịn inam mme mfiakn̄ka oro ẹnyenede uforo. Diomi ini nọ mmọ, nyụn̄ tịm idem mfọn mfọn. Ke usụn̄ emi nnyịn imekeme ndinen̄ede n̄n̄wam mbon esịt akpanikọ.—Edi. 22:6, 7.