Nọ Kpukpru Owo Ẹmi Ẹkopde Nsatitọn̄ Ikot
1 Nte prọfet Amos ekebemde iso etịn̄, ekpụk ubonowo mfịn ke okop “nsatitọn̄ [idịghe eke] mmọn̄, edi eke edikop ikọ Jehovah.” (Amos 8:11) Man in̄wam mme owo ke idaha nsatitọn̄ eke spirit emi, ana nnyịn isian mmọ ndutịm Abasi ndifiak nnam mme okop-item ubonowo ẹbọhọ idiọkn̄kpọ ye n̄kpa, emi ẹwụtde ke akpatre ibuotikọ ke Ediyarade nte “akpa mmọn̄ uwem.” Nnyịn imenyene ifet ndinọ kpukpru owo ẹmi ẹkopde nsatitọn̄ edinen ido ikot “ẹdibọ mmọn̄ uwem ke ikpîkpu.” (Edi. 22:1, 17) Didie ke ikeme ndinam emi ke August? Ke ndinọ mbon oro ẹnyenede ata udọn̄ nsio nsio ndiye uduot n̄kpri n̄wed. Afo emekeme ndidomo mme nneme ẹmi nse:
2 Sia ediwak owo ẹtịmerede esịt ẹban̄a mme mfịna nsọn̄idem, afo emekeme ndikụt nte usụn̄ nneme enye emi enyenede uforo, akamade ediye uduot ekpri n̄wed oro “Nte Abasi Enen̄ede Ekere Aban̄a Nnyịn?”:
◼ “Ediwak owo ẹtịmede esịt ẹban̄a nte ekọmurua eti usọbọ ọdọkde. Eyedi afo emekere aban̄a n̄kpọ emi. [Bet ibọrọ.] Nte nsinsi usọbọ odu ọnọ mfịna emi? [Yak enye ọbọrọ.] Sese utịbe utịbe idotenyịn mi.” Kot Ediyarade 22:1, 2. Ekem kụbọde ka ndise ke page 24, nyụn̄ da ikpehe ekikere 11 nam enye an̄wan̄a. Beri ke ndidọhọ: “N̄wed emi eneme aban̄a usụn̄ edinam oro edin̄wamde fi asak iso ye mbuọtidem ese edidụn̄ ke utịbe utịbe obufa ererimbot Abasi.” Nọ ediye uduot ekpri n̄wed ke ₦15. Nam ndutịm ndifiak n̄ka.
3 Ke ini anamde mfiakn̄ka, afo emekeme nditọn̄ọ nneme ke ndidọhọ:
◼ “Isan̄ oko n̄kedide mi, nnyịn ima ineme iban̄a nsinsi usọbọ oro odude ọnọ mme mfịna nsọn̄idem. Nte afo emekere ke tutu amama ini eyedi emi owo ndomokiet mîdidọn̄ọke? [Bet ibọrọ.] Tịm fiọk n̄wọrọnda ikọ emi.” Kot Isaiah 33:24. Ekem kụbọde ka Ukpepn̄kpọ 5 ke ediye uduot ekpri n̄wed Oyom, nyụn̄ neme ikpehe ekikere 5-6, obụpde mme n̄kem n̄kem mbụme ke ntọn̄ọ ukpepn̄kpọ onyụn̄ okotde ibat ibat itien̄wed oro ẹsiakde ẹsịn. Tịn̄ nte ke edisio udọn̄ọ ye n̄kpa mfep edi edisu akpa uduak Abasi kaban̄a isọn̄. Diomi ndifiak n̄ka man ekeneme ikpehe ekikere 1-4 ye 7 ke ukem ukpepn̄kpọ oro.
4 Edieke edide mme owo ke ẹteti mbụk n̄kpọntịbe ndondo emi abuanade mbabuat n̄kpa, afo emekeme ndidomo usụn̄ edisobo enye emi nse, akamade ediye uduot ekpri n̄wed oro “Ke Ini Owo Oro Afo Amade Akpade”:
◼ “Eyedi afo omokop aban̄a [siak mbụk n̄kpọntịbe]. Ke ini n̄kpọ mmọn̄eyet esịbede uwem owo omụhọ, ediwak owo ẹsikere m̀mê nso ndọn̄esịt ke ẹkeme ndinọ mme ubon mbon unọmọ ẹmi. Afo ekere didie?” Bet ibọrọ. Ekem kụbọde ka page 30 nyụn̄ wụt ndise ediset ke n̄kpa oro ẹwụtde do. Ka iso ke ndidọhọ: “Ediwak owo ẹdu ke n̄kpaidem ndikpep nte ke ẹyenam nti owo ye mme idiọk owo ẹfiak ẹdidu uwem ke Paradise isọn̄. [Kot nyụn̄ nam Utom 24:15 an̄wan̄a.] Ediye uduot ekpri n̄wed emi eneme mme inem inem ọyọhọ ntọt efen aban̄a uduak Abasi kaban̄a ini iso. Edieke edimade ndikpep ekese mban̄a emi, afo emekeme ndinyene enye emi ke etịbe edide ₦15.” Nam ndutịm ndifiak n̄ka, etịmde ọfiọk akpan udọn̄ owo oro.
5 Ke ini afiakde aka, nam nneme fo ekem ye enyeneufọk. Ndusụk afo emekeme ndidọhọ:
◼ “Isan̄ oko ikenyenede nneme, mma ndara se afo eketịn̄de aban̄a uduak Abasi kaban̄a isọn̄. [Fiak tịn̄ se enye eketịn̄de.] Mma n̄kụt ibuotikọ oro n̄kerede nte ke afo ayama.” Kụbọde ediye uduot ekpri n̄wed Oyom ka Ukpepn̄kpọ 5. Kot nyụn̄ neme adan̄a ediwak ikpehe ekikere nte ekekeme ke ukpepn̄kpọ oro ẹmi ẹmụmde udọn̄ enyeneufọk. Ke ẹma ẹkenịm ini ndifiak n̄ka man aka iso ke ukpepn̄kpọ oro, nọ enyeneufọk oro n̄wedikot emi owụtde mme ini mbono esop. Nam An̄wan̄wa Mbono Esop an̄wan̄a, nyụn̄ nọ enye ikot ndidụk.
6 Edieke afo emekde mmemmem nneme oro owụtde tract, afo emekeme ndidọhọ:
◼ “Ami n̄kpama fi enyene tract emi Nso Idotenyịn Idu Inọ Mbonima Ẹmi Ẹkpade?” Yak enye nọ enyeneufọk, nyụn̄ dọhọ enye etiene ese nte okotde akpa ikpehe ekikere. Yak enye ọnọ ibọrọ ke mbụme oro ẹbụpde ke akpatre udịmikọ. Kot udiana ikpehe ekikere, ndien ekem kụbọde ka ndise oro ke page 31 ke ediye uduot ekpri n̄wed oro Nso Idi Uduak Uwem? Ka iso ke ndidọhọ: “N̄wed emi ọnọ ọyọhọ ntọt efen efen aban̄a ediset ke n̄kpa ye utịbe utịbe un̄wọn̄ọ Bible kaban̄a ini iso. Enye emi ekeme ndidi okwo ke etịbe ₦15.” Nam ndutịm ban̄a mfiakn̄ka.
7 Nnyịn ndinọ mbon efen ikot oro edemerede udọn̄ ekeme ndinam mmọ ẹnyene mmọn̄ uwem oro Jehovah anamde odu idahaemi. Ke ntre, ẹyak nnyịn idọhọ owo kiet kiet emi okopde nsatitọn̄ ite, “Di!”—Edi. 22:17.