Ndinọ N̄wed Oro Akakan Owo Oro Akanam Odude Uwem
1 December edi eti ọfiọn̄ ndinọ n̄wed oro Akakan Owo Oro Akanam Odude Uwem. Mbon oro ẹdọhọde ke idi Christian ẹsikere ẹban̄a Jesus ke ọfiọn̄ emi ẹkan ini efen ekededi ke isua. Kpukpru nnyịn ikpenyene ndida ọfiọn̄ emi nnam n̄kpọ ọyọhọ ọyọhọ ke ndinọ ediye n̄wed emi ọyọhọde ye ndise mi, oro aban̄ade Jesus Christ ke kpukpru ifet. Ekeme ndidi mmemmem nneme edidi n̄kukụre se iyomde man idemede udọn̄ ke n̄wed emi.
2 Ke ama ọkọkọm enyeneufọk, afo emekeme nditịn̄ se ikade ntem:
◼ “Ererimbot omosion̄o ikpọ owo ẹmi ẹma ẹkenam n̄kpọ ẹnịm ke mbụk edi. Ẹsidomo akwa idaha mme owo ẹbe ke se mmọ ẹkpọn̄de ẹnịm man ọkọri oro akade-kaiso ọkọri ke mmọ ẹma ẹkekpan̄a. Ke ekikere fo, anie edi akakan owo oro akanam odude uwem? [Bet ibọrọ.] Edidem kiet ama etịn̄ inikiet aban̄a Jesus Christ ete: “Se Enye owo oro do.” (John 19:5) Ke eyouwem esie ẹkediọn̄ọ enye nte akakan owo oro akanam odude uwem. Edi nso kaban̄a eyo nnyịn? Nte enye ke osụk ededi akakan owo oro akanam odude uwem?” Kụbọde ka ntọn̄ọikọ n̄wed emi nyụn̄ kot ikpehe ekikere 2 ye 3. Nam an̄wan̄a nte ke mme ewetmbụk ye ikpọ ndidem ẹma ẹsọn̄ọ ẹte ke Jesus ekedi akakan owo oro akanam odude uwem. Man otodo enyeneufọk ekeme ndikpep ekese mban̄a ntak emi Jesus ekedide utọ akwa owo oro, nọ n̄wed emi ke etịbe oro ẹsinọde. Diomi ndifiak n̄waha kaban̄a n̄kaiso nneme.
3 Ke ama eketịn̄ owo emi afo edide, afo emekeme ndidọhọ:
◼ “Ekikere ẹban̄ade Jesus Christ ẹdu ke ibuot ediwak owo. Ẹwụt esịtekọm ẹban̄a ẹnyụn̄ ẹma enye ke ntak eti ido esie. Nso idi ekikere fo—edieke Jesus Christ ekpedide andikara ererimbot emi, nte enye ikpedịghe mfọnn̄kan itie ndidụn̄? [Bet ibọrọ.] Nte Jesus Christ eyekeme ndikara nnyịn nnennen nnennen tutu amama? (Kot Isaiah 9:6, 7.) Ẹma ẹbemiso ẹtịn̄ ẹte ke Jesus Christ edidi enyeemi edidade nsinsi ye ata emem isọk ubonowo. N̄wed emi, Akakan Owo Oro Akanam Odude Uwem, ọyọnọ fi nsọn̄ọ nte ke ukara Jesus ke mîbịghike eyekpụhọde isọn̄ esịn ke inem inem ebiet.” Tịn̄ tụk ibuot 132 nyụn̄ nọ n̄wed ke etịbe oro ẹsinọde.
4 Afo emekeme ndimek ndida ntọn̄ọikọ enyeemi:
◼ “Nnyịn ibụp mme mbọhọidụn̄ nnyịn iban̄a se idide ekikere mmọ: Nte odu usụn̄ ẹmi nnyịn ikemede ndinen̄ede nsan̄a n̄kpere Christ? [Bet ibọrọ.] Oyom ẹnyene ọyọhọ ifiọk ẹban̄a mbon efen man ẹnyene n̄kpet n̄kpet itie ufan. Iyomke se isụhọrede ikan oro man inen̄ede isan̄a ikpere Jesus Christ. Oyom nnyịn ifiọk enyeemi enye ekenen̄erede edi nte owo, mme edinam esie eke usen ke usen, mme ndutụhọ esie, mme ntụk esie, ye kpukpru ikpehe utom ukwọrọikọ esie. Oyom inyene utọ ifiọk oro iban̄a Jesus Christ edieke anade nnyịn inyene nsinsi uwem. (Kot John 17:3.) N̄wed oro, Akakan Owo Oro Akanam Odude Uwem, edi ọyọhọ mbụk aban̄ade Jesus oro edin̄wamde fi enyene utọ nnennen ifiọk oro aban̄a enye.” Nọ n̄wed emi ke etịbe oro ẹsinọde nyụn̄ nam ndutịm oro enyenede iwụk nọ mfiakn̄ka.
5 Ẹkeme ndida nnennen edisobo ye owo ntọn̄ọ ukpepn̄kpọ Bible ye ibio ibio ntọn̄ọikọ emi:
◼ “Nnyịn iwụt mme mbọhọidụn̄ nnyịn un̄wam ukpep Bible emi. Enye etịn̄ n̄kpọ aban̄a Jesus Christ. Nte akanam afo omokụt enye? [Bet ibọrọ.] N̄kpama ndida minit ifan̄ kpọt n̄wụt nte ẹkemede ndida enye nnam n̄kpọ ye ọkpọkpọ Bible fo.” Kụbọde ka ibuot 59 nyụn̄ neme ikpehe ekikere 1 osịm 4. Nọ n̄wed emi.
6 Edieke nnyịn itịmde idem mfọn mfọn, nnyịn iyen̄wam mbon efen ẹnam esịtekọm oro mmọ ẹnyenede ẹnọ Jehovah ye Eyen esie Jesus Christ otụn̄ọ. Da kpukpru ifet oro afo enyenede nọ n̄wed Akakan Owo ke ọfiọn̄ December emi.