Kwọrọ Ikọ ye Ikike
1 Ndinyene ikike oyom ete nnyịn inyene ifiọk iban̄a mme owo ẹmi nnyịn ikwọrọde ikọ inọ. Ntak-a? Koro uforo nnyịn ke ndisịm esịt mme owo ọkọn̄ọ ke ukeme oro inyenede ndineme etop Obio Ubọn̄ ke usụn̄ oro edemerede mmọ udọn̄. Ke ọfiọn̄ January, nnyịn idinọ nsio nsio n̄wed ukpep Bible ẹmi esop ekemede ndisụk nnyene. Ke ẹsiode oro ẹfep, mme asuanetop ẹdikama n̄wed oro “Yak Obio Ubọn̄ Fo Edi.” Mme ekikere ẹtienede mi ẹkeme ndin̄wam.
2 Edieke afo emekde ndinọ n̄wed oro “Yak Obio Ubọn̄ Fo Edi,” emekeme ndikụbọde n̄ka ndise odude ke page 4 ye 5 ndien ekem ọdọhọ ete:
◼ “Ndise emi edi mbuwed emi aban̄ade se Bible ekpepde aban̄a uduak Abasi kaban̄a isọn̄. Afo ekere ke emi ediyom nso oto fi ye ubon fo man odụn̄ ke paradise isọn̄? [Bet ibọrọ.] Bible owụt ete ke ibịghike idaha paradise emi eyedi ata idem n̄kpọ ke idak Obio Ubọn̄ Abasi. [Kot Psalm 37:10, 11.] N̄wed emi ekeme ndiwụt fi se oyomde anam man ọbọ ufọn oto n̄kpọ emi Abasi edinamde. N̄kpama ndikpọn̄ enyeemi ye afo.” Nọ n̄wed ke etịbe oro ẹsinọde nyụn̄ diomi ndifiak n̄waha kaban̄a n̄kaiso nneme.
3 Ẹkeme ndida usụn̄ efen ndisobo ye owo ndinọ n̄wed oro “Yak Obio Ubọn̄ Fo Edi” ebe ke ndikama ntọn̄ọikọ oro odude ke page 12, ikpehe ekikere 5, ke n̄wed “Reasoning”:
◼ “Ke nnyenede nneme ye mbọhọidụn̄ mi, mmokụt nte ke ediwak owo ẹnyene udọn̄ ndidu uwem ke idak ukara emi ekemede ndinen̄ede n̄kọk ikpọ mfịna oro nnyịn isobode mfịn—ubiatibet ye ekọmurua n̄kpọ udu uwem ndidọk (m̀mê se ededi oro ediwak owo ẹnyenede ke ekikere). Oro ekpedi se ẹmade, nte afo unyịmeke? [Bet ibọrọ.] Nte utọ ukara oro odu mfịn? [Bet ibọrọ.] Ediwak owo ke akpanikọ ẹbọn̄ akam ẹyom utọ ukara oro. Nte eyịghe mîdụhe afo ọmọbọn̄ akam oyom enye, edi idịghe ediwak owo ẹkere ẹban̄a enye nte edide ukara.” Kot Daniel 2:44 nyụn̄ wụt nte Obio Ubọn̄ oro edide ata idem n̄kpọ. Kụbọde ka ekebe oro odude ke page 25 ke n̄wed “Obio Ubọn̄ Edi” nyụn̄ sio mme akpan n̄kpọ ẹmi Obio Ubọn̄ Abasi edinamde wụt. Diomi ndifiak n̄waha kaban̄a n̄kaiso nneme nyụn̄ nọ n̄wed ke etịbe oro ẹsinọde.
4 Edieke afo akamade n̄wed oro “Ndimek Mfọn N̄kan Usụn̄uwem,” emekeme nditọn̄ọ ke ndidọhọ ete:
◼ “Ndutịme ye unana iwụk ẹdu kaban̄a se inen̄ede idi mfọnn̄kan usụn̄ ndidu uwem nnyịn. Ediwak mbon esịt akpanikọ ẹkpema ndikụt usụn̄uwem oro adade emem ye uyụhọ edi idahaemi onyụn̄ ọnọde nsọn̄ọ aban̄a edidara ini iso emi enyenede ifụre. Edi nte usụn̄ edidu uwem ye unana editua n̄kpọfiọk odu? [Bet ibọrọ.] Idotenyịn emi enyenede nsọn̄ọ kaban̄a uwem ini iso oro ọfọnde akan eyenam uwem nnyịn enyene se ọwọrọde.” Kot 1 Peter 3:13 nyụn̄ buan. Nam an̄wan̄a nte ke edida mme edumbet Bible nsịn ke edinam idahaemi eyeda uyụhọ ye inemesịt edi. Neme mme akpan n̄kpọ ẹdude ke ikpehe ekikere 34 ye 35 ke ibuot 11 ke n̄wed Ndimek Mfọn N̄kan Usụn̄uwem, nyụn̄ nọ n̄wed ke etịbe oro ẹsinọde.
5 Afo emekeme ndidemede udọn̄ uyen ye ibio ibio nneme, akamade n̄wed oro “Uyen Fo—Ndibö se Itimde Ifön Ikan nto Enye” ke ndidọhọ ete:
◼ “Ewetn̄wed kiet ọkọdọhọ ete: ‘Ata n̄kponn̄kan ubak ubonowo ẹda mme akpa isua mmọ ndinam mme akpatre isua mmọ ẹdi n̄kpọ mfụhọ.’ Afo uyomke oro otịbe ọnọ fi, nte omoyom? [Bet ibọrọ.] Abasi inyụn̄ iyomke oro otịbe. N̄wed emi, Uyen Fo—Ndibö se Itimde Ifön Ikan nto Enye, eyen̄wam fi efep mme n̄kpọ iduọ ẹmi ẹdide ọsọ n̄kpọ ẹnọ mme uyen.” Nọ n̄wed ke etịbe oro ẹsinọde nyụn̄ diomi ndifiak n̄waha.
6 Ndinyene eti ikike eyen̄wam nnyịn ifiọk udọn̄ mme owo oro nnyịn isobode. Mme N̄ke 16:23 ọn̄wọn̄ọ ntem ọnọ nnyịn, ọdọhọde ete: “Esịt owo eti ibuot anam inua esie edi ọniọn̄: enye eyenyụn̄ ọbọrọ ke se n̄kpọkinua esie ekpepde.”