Ndida N̄kani N̄wed Nnyịn Nnam N̄kpọ Nte Ọfọnde
1 Jehovah ọmọnọ nnyịn akpakịp nti udia eke spirit. Ata ediwak ke otu n̄kpọutom emi esidi ke uduot mme n̄wed oro ẹnyenede kere 192 oro ẹmịn̄de ke mme isua ndondo emi. Ke January nnyịn idinọ n̄wed ekededi oro enyenede kere 192 oro ẹkemịn̄de mbemiso 1982. Nte afo emenyene ndusụk ke otu ẹmi ke ufọk oro ẹsụk ẹdude ke eti idan̄a? Nte esop enyene ndusụk mmọ ke itie unịm n̄wed? Edieke edide ntre, ọyọfọn ndifiak ndụn̄ọde se isịnede ke mmọ nnyụn̄ mmek ndusụk akpan n̄kpọ ndida nnyene nneme oro ekemede ndikama ke nneme fo.
2 Edieke afo akamade n̄wed “Yak Obio Ubọn̄ Fo Edi,” afo emekeme nditọn̄ọ ke ndidọhọ:
◼ “Mme Christian ẹmebọn̄ akam ẹben̄e edidi Obio Ubọn̄ Abasi ke se ikperede ndisịm isua 2,000. Afo ekere ke Obio Ubọn̄ oro edinam nso ọnọ ubonowo? [Bet ibọrọ. Kụbọde ka ekebe oro odude ke kere 25, nyụn̄ wụt ndusụk edidiọn̄ oro ẹdikụtde ke idak ukara Obio Ubọn̄.) N̄wed emi eneme mme n̄kpọ oro Obio Ubọn̄ edinamde onyụn̄ anam an̄wan̄a nte afo ye mbonima fo ẹkemede ndibọ ufọn.” Ekem nọ n̄wed.
3 Edieke afo akamade n̄wed “Edikpan̄ Utöñ nö Aqua Andikpep, “ afo emekeme nditịn̄ n̄kpọ ebietde emi:
◼ “Ukeme owo ndida emem ye ifụre ndi ke ererimbot omokpu idiọk idiọk ndien mme idan̄a ke ẹkaiso nditotịm ndiọk. Nte nnyịn imenyene ntak ekededi ndidori enyịn nte ke ukpụhọde eyedu tutu amama? [Bet ibọrọ.] Itie kiet kpọt odu emi nnyịn ikemede ndikụt ibọrọ oro ẹkemede ndiberi edem, ndien oro edi ke Ikọ Abasi, kpa Bible. N̄wed emi nnyịn inọde fi mi ọkọn̄ọ ke Bible, emi esịnede etop idotenyịn ye ndọn̄esịt ọnọ kpukpru mbon oro ẹnyenede esịt akpanikọ.” Ekem nọ n̄wed.
4 Edieke afo akamade n̄wed “Ata Emem ye Ifure—Oto Itie Ewe?,” afo emekeme ndidomo emi nse:
◼ “Kpukpru owo ẹkpema ndidụn̄ ke ererimbot oro emem ye ifụre odude. Ke mfụhọ, nnyịn inyeneke oro ke eyouwem nnyịn. Afo ekere ke oyom nnyịn inam nso man emem ye ifụre enen̄ede odu? [Bet ibọrọ.) Abasi enyene odudu ndida emem ndi isọn̄ emi, ndien enye ọn̄wọn̄ọ ke imọ iyenam oro.” Kot Micah 4:3,4. Nam idotenyịn Obio Ubọn̄ enen̄ede an̄wan̄a, nọ n̄wed, nyụn̄ nam ndutịm nnọ mfiakn̄ka.
5 Afo emekeme ndimek ndikama ediye uduot ekpri n̄wed “Nte Abasi Enen̄ede Ekere Aban̄a Nnyịn?” Ke edide ntre, afo emekeme nditịn̄ emi:
◼ “Ediwak owo ẹsiyịk ntak emi Abasi ayakde ekese ndutụhọ odu ke ererimbot. Sia enye edide ata ọkpọsọn̄, ntak emi enye mînamke n̄kpọ man ada utịt ọsọk mfụhọ nnyịn-e? Afo ekere didie? [Bet ibọrọ.] Bible ọsọn̄ọ ọnọ nnyịn ete ke enye ikpọn̄ke nnyịn.” Kụbọde ka kere 27, ikpehe ekikere 22, nyụn̄ kot Psalm 37:11, 29. Wụt ndise oro edemerede owo udọn̄ emi ẹwụtde se nnyịn ikemede ndidori enyịn mban̄a. Edieke ẹbọde ediye uduot ekpri n̄wed oro, dọhọ ke iyefiak idi man idiwụt nte ẹkemede ndida enye n̄kpep Bible.
6 Mme n̄wed nnyịn ẹnụk ediwak tọsịn owo ndidụn̄ọde Bible ata ntotụn̄ọ, ntotụn̄ọ. Se mmọ ẹkpepde ọnọ mmọ idotenyịn aban̄a inem inem ini iso. (Ps. 146:5) Edi ifet nnyịn ndin̄wam mmọ.