Tịm Nịm
Ndi Afo ke Ada Ndiye Uduot N̄kpri N̄wed Emi Anam N̄kpọ?
Nso Idi Etop Bible?
Ẹtịm enye man edemede udọn̄ mbon emi mîtịmke ifiọk Bible, akpan akpan mbon oro mîkaha ido ukpono Christendom
Nte ẹdinọde n̄wed emi: “Ikpama ndifiọk ekikere fo ke se itie N̄wed Abasi emi etịn̄de (mîdịghe ke se ẹtịn̄de mi ke edisana n̄wed emi). [Kot Psalm 37:11, emi ẹtịn̄de ẹban̄a ke ikpehe 11.] Afo ekere ke ererimbot editie didie ke ini ntịn̄nnịm ikọ emi osude? [Bet ibọrọ.] Emi owụt idotenyịn ye ndọn̄esịt oro mme owo ke nsio nsio idụt, emi ẹnyụn̄ ẹnịmde nsio nsio n̄kpọ ẹkemede ndinyene nto Bible.” Kot ikpehe ekikere oro odude ke enyọn̄ page 3, ekem nọ ediye uduot ekpri n̄wed emi.
Afo emekeme ndidomo emi nse: Edieke afo adade n̄wed Bible Ekpep enịm ukpepn̄kpọ Bible ye owo emi mîkaha ido ukpono Christendom, da minit ifan̄ mbemiso ọtọn̄ọde m̀mê ke ama okokụre ukpepn̄kpọ neme ikpehe kiet ke ediye uduot ekpri n̄wed emi ye enye man enye ọfiọk se isịnede ke Bible.
Nso Itịbe inọ Nnyịn ke Ini Nnyịn Ikpade?
Ẹtịm enye man edemede udọn̄ mbon oro owo ima mmọ akpade
Nte ẹdinọde n̄wed emi: “Ke ini mbon emi nnyịn imade ẹkpade, nnyịn imesiyịk ebiet emi mmọ ẹdude ye m̀mê nnyịn iyafiak ikụt mmọ tutu amama. Ndi afo emesikere aban̄a utọ mbụme nte: Nso itịbe inọ nnyịn ke ini nnyịn ikpade?” [Bet ibọrọ.] Ekem kot Job 14:14, 15 nyụn̄ dọhọ ete: “Ediye uduot ekpri n̄wed emi etịn̄ ebiet emi mbon ima nnyịn oro ẹkpade ẹdude ye se iditịbede inọ mmọ ke ini iso.”
Afo emekeme ndidomo emi nse: Kụbọde ka akpa ukpepn̄kpọ nyụn̄ kot ikpehe ekikere 4, ekem dọhọ ete: “Mma mfiak ndi, iyeneme ibọrọ oro Bible ọnọde ke mbụme emi.” Neme ikpehe ekikere ifan̄ ke ukpepn̄kpọ 9 ke ini afiakde aka.
Afo Emekeme Ndidi Ufan Abasi!
Ẹtịm enye man edemede udọn̄ mbon emi mîtịmke ifiọk n̄wed m̀mê oro mîkemeke ndikot n̄wed ọfọn
Nte ẹdinọde n̄wed emi: “Ndi afo emekere ke nnyịn imekeme ndidi ufan Abasi? [Bet ibọrọ. Ekem kot James 2:23.] Ẹtịm ediye uduot ekpri n̄wed emi man an̄wam nnyịn idi ufan Abasi kpa nte Abraham ekedide.”
Afo emekeme ndidomo emi nse: Ke akpa ini emi awahade m̀mê ke ini afiakde aka, wụt nte isinịmde ukpepn̄kpọ Bible ke ndineme ukpepn̄kpọ 1 ofụri ofụri m̀mê ubak ubak ye enyeneufọk.
A Satisfying Life—How to Attain It
Ẹtịm man edemede udọn̄ mbon emi mînyeneke ido ukpono
Nte ẹdinọde n̄wed emi: “Nnyịn iwaha ibịne mme owo koro imọfiọk ke ediwak mmọ ẹkpema nditịm n̄kop inem uwem. Kpukpru nnyịn imesinyene mme mfịna oro ẹkemede ndinam nnyịn ikûkop inemesịt. Ke ini inyenede mfịna, imekeme ndika mbịne iman m̀mê ufan nnyịn oro iberide edem ikoyom item mîdịghe ika itie ubon n̄wed m̀mê Intanet. M̀mọ̀n̄ ke afo okụt ke ẹkeme ndinyene eti item? [Bet ibọrọ.] Idem amakpa ndusụk owo ndikụt nti item ke Bible. Se uwụtn̄kpọ kiet mi. [Wụt enyeneufọk ibuot 2, nyụn̄ kot kiet ke otu mme itie N̄wed Abasi oro ẹkotde esịn.] Ẹtịm ediye uduot ekpri n̄wed emi man anam nnyịn ifiọk nte ikemede nditịm n̄kop inem uwem.”
Afo emekeme ndidomo emi nse: Edieke enyeneufọk ọbọde ediye uduot ekpri n̄wed emi, dọhọ ete: “Ediwak owo ẹkop nte ẹdọhọde ke ndudue ọyọyọhọ Bible. Mma mfiak ndi, nyama ndiwụt fi n̄kpọ kiet emi owụtde ke Bible enen ke ini etịn̄de n̄kpọ aban̄a ifiọk ntaifiọk.” Ama afiak aka, neme ikpehe ekikere 4 ke page 12.
The Origin of Life—Five Questions Worth Asking
Ẹtịm enye ẹnọ mme uyen Christian emi ẹkpepde mmọ ukpepn̄kpọ edito ke unam mforo owo ke ufọkn̄wed ẹnyụn̄ ẹkeme ndida enye n̄ko n̄kọk ibuot ye mbon oro ẹnịmde ke owo okoto ke unam oforo, mbon oro ẹdọhọde ke owo idiọn̄ọke m̀mê Abasi odu m̀mê idụhe, ye mbon oro mînịmke ke Abasi odu (Owo itịmke n̄wed emi man ẹda ẹkwọrọ ikọ.)
Nte ẹkpedade n̄wed emi ẹneme nneme ye owo emi enịmde ke owo okoto ke unam oforo m̀mê owo emi mînịmke ke Abasi odu: “Ekpere ndidi kpukpru n̄wed ukpepn̄kpọ ifiọk ntaifiọk ẹkpep ke owo okoto ke unam oforo. Ndi emenịm emi ke akpanikọ? [Bet ibọrọ.] Mmenịm ke afo eyenyịme ke owo ekpenyene ndidụn̄ọde n̄kpọ emi man etịm ọfiọk se idide akpanikọ. Ediye uduot ekpri n̄wed emi ọnọ ndusụk uyarade oro ẹnamde ediwak owo ẹnịm ke ẹkebobot mme odu-uwem n̄kpọ.”
Afo emekeme ndidomo emi nse: Edieke akade ufọkn̄wed, dori ediye uduot ekpri n̄wed emi ke okpokoro fo nyụn̄ se m̀mê emi eyedemede udọn̄ ndusụk nditọ ubet ukpepn̄kpọ mbufo.
Why Should We Worship God in Love and Truth?
Ẹtịm enye man edemede udọn̄ mbon Hindu
Nte ẹdinọde n̄wed emi: “Akam mbon India emi ẹtịmde ẹdiọn̄ọ ọdọhọ ntem: ‘Nam mi mbọhọ abian̄a nyụn̄ wụt mi akpanikọ. Sio mi ke ekịm sịn ke un̄wana.’ Ndi emekere ke edi akpan n̄kpọ ndituak ibuot nnọ Abasi ke ima ye ke akpanikọ? [Bet ibọrọ.] Kop se Jesus eketịn̄de aban̄a emi.” Kot John 4:24. Ekem kot ikpehe ekikere 4 ke page 3 nyụn̄ nọ ediye uduot ekpri n̄wed emi.
Afo emekeme ndidomo emi nse: Edieke enyeneufọk ọbọde ediye uduot ekpri n̄wed emi, dọhọ ete: “Ndusụk mme ọfiọkn̄kpọ owo mbon Hindu ẹdọhọ ke akpanikọ odu ke esịt nnyịn. Mbon eken ẹdọhọ ke akpanikọ odu ke edisana n̄wed. Mma mfiak ndi, nyama ndineme mbụme kiet emi ẹbụpde ke utịt ikpehe ekikere 3 ke page 4, ẹte, ‘M̀mọ̀n̄ ke ikpokụt akpanikọ oro aban̄ade Abasi?’”
The Pathway to Peace and Happiness
Ẹtịm man edemede udọn̄ mbon Buddha
Nte ẹdinọde akwa owo emi edide owo Buddha n̄wed emi: “Ekeme ndidi esuene esuene ekikere emi ẹyọhọde ke ererimbot ye utịp mmọ ke idem nditọ nnyịn ẹtụk fi ukem nte ẹtụkde mi. Afo ekere ke nso inam ibat mme uyen oro ẹnamde oburobụt ido aka iso ndidọk ntem? [Bet ibọrọ.] Ndi afo ama ọfiọk ete ke ẹma ẹbem iso ẹtịn̄ emi ke n̄wed oro ẹkewetde ke anyan ini mbemiso ẹtọn̄ọde Ido Ukpono Christ, Hindu, ye Muslim? [Kot 2 Timothy 3:1-3.] Mme n̄kpọ emi ke ẹtetịbe okposụkedi emi mme owo ẹkade iso ndikpep n̄kpọ man ẹnyene ifiọk. [Kot ufan̄ikọ 7.] Se isịnede ke n̄wed emi anam mi mfiọk akpanikọ oro akanam ediwak owo mîkpepke. Ndi akpama ndikot n̄wed emi?”
Afo emekeme ndidomo emi nse: Ke ini edifiakde aka, ke ama akanam enyeneufọk enyene udọn̄ ke Bible, wụt mme mbụme oro ẹdude ke edem n̄wed emi nyụn̄ wụt enye ekebe oro ẹsidade ẹbọ n̄wed Bible Ekpep. Dọhọ enye ke imọ imada n̄wed emi kiet idi, m̀mê enye akpama ndikụt nte enye etiede. Wụt enye se isịnede ke n̄wed emi nyụn̄ neme ikpehe ekikere kiet m̀mê iba ke ibuot emi enye emekde.
Usụn̄ Oro Adade Esịm Nsinsi Uwem—Nte Afo Omokụt Enye?
Ẹtịm enye man edemede udọn̄ mbon Africa
Nte ẹdinọde n̄wed emi: “Nso idi ekikere fo? Ndi kpukpru ido ukpono ẹkpep akpanikọ? [Ke ẹma ẹkenọ ibọrọ, ka iso ke nneme.] Ediwak ufọkabasi ke ẹwọn̄ọ ẹdi, ndien ndusụk owo ẹkeme ndikere ke ekededi ke otu emi ekeme ndinam nnyịn inam n̄kpọ Abasi. Nte ededi, ke 1 Thessalonica 5:21, ẹdụri nnyịn utọn̄ ẹte idu ke ukpeme. [Kot.] Ntak emi kpukpru ido ukpono mîtoho Abasi? Kop se akpa udịmikọ iba ke ikpehe ekikere 3, ke Ukpepn̄kpọ 1 ọdọhọde mi ke page 5 ke ediye uduot ekpri n̄wed emi. [Kot.] Sia kpukpru ido ukpono mîkemeke ndidi akpanikọ, didie ke nnyịn ikeme ndikụt ido ukpono akpanikọ? Ediye uduot ekpri n̄wed emi ayan̄wam fi ọfiọk emi.”
Afo emekeme ndidomo emi nse: “Man Jehovah ama onyụn̄ ekpeme nnyịn, ana ituak ibuot inọ enye ke nnennen usụn̄. Ke ntak emi, mma mfiak ndi iyeneme mbụme emi ke page 19, ‘Nte Abasi Enyịme Kpukpru Ido Ukpono?’”
Spirit Mme Akpan̄kpa—Nte Mmọ Ẹkeme Ndin̄wam Fi m̀mê Ndinọ Fi Unan? Nte Mmọ Ẹnen̄ede Ẹdu?
Ẹtịm enye man edemede udọn̄ mbon Africa
Nte ẹdinọde n̄wed emi: “Ediwak miliọn owo ẹnịm ke akpanikọ ẹte ke mme akpan̄kpa ẹsibe ẹka ererimbot mme spirit, emi mmọ ẹkemede ndikụt nnyụn̄ n̄kara uwem owo ke isọn̄. Ndi se ẹnịmde ke akpanikọ emi edi akpanikọ?” [Bet ibọrọ.] Ekem kot Ecclesiastes 9:5, 10, nyụn̄ dọhọ ete: “Edieke se ẹnịmde oro mîdịghe akpanikọ, mmanie ẹdi mbon oro ẹdọhọde ke idi spirit mme akpan̄kpa? Ediye uduot ekpri n̄wed emi ọbọrọ mbụme emi.” Nọ ediye uduot ekpri n̄wed.
Afo emekeme ndidomo emi nse: Edieke enyeneufọk ọbọde ediye uduot ekpri n̄wed oro, kụbọde ka page 13 nyụn̄ dọhọ enyeneufọk okot akpa ikpehe ekikere. Dọhọ enye ke imọ iyafiak idi idineme n̄kpọ efen efen.
The Guidance of God—Our Way to Paradise
Ẹtịm enye man edemede udọn̄ mme Muslim emi ẹdụn̄de ke ebiet emi mmọ ẹkemede ndinyene ifụre ndikpep Bible
Nte ẹdinọde n̄wed emi: “N̄kop ke mme Muslim ẹnịm ata Abasi kiet ye kpukpru mme prọfet ke akpanikọ. Ndi ntre ke edi? [Bet ibọrọ.] N̄kpama ndineme ye afo mban̄a ntịn̄nnịm ikọ eke eset oro ebemde iso etịn̄ aban̄a ndinam isọn̄ akabade edi Paradise. Nte mmekeme ndikot se prọfet oro eketịn̄de nnọ fi? [Kot Isaiah 11:6-9.] Ediwak owo ẹkere nte Abasi edinamde mme utọ ukpụhọde oro ẹdu ke isọn̄. Ediye uduot ekpri n̄wed emi eneme se mme prọfet ẹtịn̄de ẹban̄a emi.”
Afo emekeme ndidomo emi nse: Edieke enyeneufọk ọbọde ediye uduot ekpri n̄wed emi, dọhọ ete: “N̄wed Abasi emi anam ifiọk nte ke editọn̄ọ, owo okodụn̄ ke Paradise. Ke ini idifiakde inyene nneme, nyama ndibọrọ mbụme emi, ‘Owo akasan̄a didie ọkpọn̄ ndausụn̄ Abasi onyụn̄ ataba Paradise?’” Ama afiak aka, neme ikpehe emi ọtọn̄ọde ke page 6.
Real Faith—Your Key to a Happy Life
Ẹtịm enye man edemede udọn̄ mme Muslim emi ẹdụn̄de ke ebiet emi mmọ ẹkemede ndinyene ifụre ndikpep Bible
Nte ẹdinọde n̄wed emi: Wụt ndise emi odude ke page 16-17 nyụn̄ dọhọ ete: “Ndise emi enen̄ede okpụhọde ye se ikụtde ke ererimbot mfịn. Ndi emekere ke ererimbot ekeme nditie ntem usen kiet? [Bet ibọrọ.] Kop se N̄wed Abasi emi ọn̄wọn̄ọde mi. [Kụbọde Bible fo kot kiet ke otu mme itie N̄wed Abasi oro ẹkotde ẹsịn ke n̄wed oro.] Ediye uduot ekpri n̄wed emi an̄wam nnyịn inen̄ede inyene mbuọtidem nte ke mme utọ un̄wọn̄ọ oro ẹyesu.”
Afo emekeme ndidomo emi nse: Ke utịt nneme fo ke akpa ediwaha, dọhọ enyeneufọk emek mbụme kiet ke edem n̄wed emi. Ekem nam ndutịm ndida ediye uduot ekpri n̄wed emi mbọrọ mbụme oro ke ini afiakde aka.
Lasting Peace and Happiness—How to Find Them
Ẹtịm enye man edemede udọn̄ mbon China
Nte ẹdinọde n̄wed emi: “Ediwak mfịna ẹdu mfịn emi ẹkemede ndinam nnyịn ikûkop inemesịt. Nso isin̄wam fi okop inemesịt kpa ye mme mfịna? [Bet ibọrọ.] Ediwak owo ẹmekop inemesịt ke nditiene item Bible. [Kot Psalm 119:1, 2.] Ndusụk owo ẹdọhọ ke Bible edi n̄wed mfia owo. Edi yak n̄wụt fi n̄kpọ mi. [Neme ikpehe ekikere 16 ke page 17.] Ediye uduot ekpri n̄wed emi eneme nte ikemede ndinyene emem ye inemesịt oro ẹbịghide.”
Afo emekeme ndidomo emi nse: Edieke enyeneufọk ọbọde ediye uduot ekpri n̄wed emi, kot akpa udịmikọ ita ke ikpehe ekikere 18 ke page 17 ye enye, nyụn̄ dọhọ ete: “Mma mfiak ndi, nyama ndiwụt fi se Bible ọdọhọde nte nnyịn ikpodoride enyịn ndikụt ke ini iso.” Ama afiak aka, neme kiet ke otu mme n̄kpọ oro ẹsiakde ke ikpehe ekikere 6 ke page 30.