Ufan Ufan Nneme Ẹkeme Ndisịm Esịt
1 Ẹkeme ndidọhọ ke nneme ọwọrọ “edibuana mme ekikere.” Nditọn̄ọ ufan ufan nneme ke ibuotikọ oro ebehede mmọ en̄wen ekeme ndimụm mmọ udọn̄ onyụn̄ ekeme ndin̄wam nnyịn ndida etop Obio Ubọn̄ nsịm mmọ esịt. Ifiọkutom owụt ke otịm enyene uforo etieti ndibuan mme owo ke ufan ufan ye ifụre ifụre nneme akan edinọ mmọ utịn̄ikọ.
2 Nte Ẹtọn̄ọde Ufan Ufan Nneme: Nnyịn ndikeme ndinyene nneme ye mbon en̄wen iwọrọke ke ana nnyịn ikama n̄wọrọnda ekikere ye mme itien̄wed Abasi ẹmi ẹbonde ke nde ke nde. Enye n̄kukụre abuana ndinam owo enye eken etịn̄ ikọ ye nnyịn. Ke uwụtn̄kpọ, ke ini nnyịn inyenede ufan ufan nneme ye mbọhọidụn̄ odụn̄de ekpere nnyịn, isidịghe eto eto edi esidi ifụre ifụre. Nnyịn isikereke iban̄a mme ikọ efen oro nnyịn iditịn̄de edi ke ndammana usụn̄ ke isibọrọ se enye etịn̄de. Ndiwụt ata udọn̄ ke se enye etịn̄de ekeme ndisịn udọn̄ nnọ enye ndika iso nnyene nneme ye nnyịn. Ukem oro ke ekpedi ke ini inọde mbon en̄wen ikọ ntiense.
3 Ẹkeme ndida mme utọ ibuotikọ nte ubiatibet, mme mfịna uyen, mme mfịna n̄kann̄kụk, mme idaha ererimbot, m̀mê idem idaha eyo ntọn̄ọ mme ufan ufan nneme. Mme ibuot nneme oro ẹtụkde uwem mme owo nnennen ẹkụt unen etieti ke ndidemede udọn̄ mmọ. Ndondo oro ẹma ẹketọn̄ọ nneme, nnyịn imekeme ndiwọn̄ọde enye sụn̄sụn̄ nsịn ke etop Obio Ubọn̄.
4 Ndinyene nneme oro ọnọde nduọkodudu iwọrọke ke iyomke mbemiso ntịmidem. Oyom. Nte ededi, ufọn idụhe nditịm n̄wed utịn̄ikọ emi etiede eto eto m̀mê ndimomụm ukwọrọikọ nsịn ke ibuot, emi edidade ikosịm nneme oro mîkpụhọkede ikekem ye mme idaha oro ẹdude. (Men 1 Corinth 9:20-23 domo.) Mfọnn̄kan usụn̄ nditịm idem edi ndimek ibuotikọ N̄wed Abasi kiet m̀mê iba, ye ekikere edibọp nneme fo n̄kanade mmọ. Ndidụn̄ọde mme ibuotikọ oro ẹkụtde ke n̄wed Reasoning edidi n̄kpọ un̄wam ke n̄kpọ emi.
5 Mme Akpan Edu Ẹyomde ke Ufan Ufan Nneme: Ke ini nnyịn inyenede nneme ye mbon en̄wen, nnyịn ikpenyene nditie ufiop ufiop inyụn̄ inyene esịt akpanikọ. Edituak inua imam ye editie idara idara ẹn̄wam ndiwụt mme edu ẹmi. Nnyịn inyene mfọnn̄kan etop ke ererimbot; enye esinen̄ede edemede udọn̄ mbon esịt akpanikọ. Edieke mmọ ẹkerede ke udọn̄ esịt akpanikọ nnyịn ndibuana ndusụk eti mbụk ye mmọ anam nnyịn inyene udọn̄ ke idemmọ, do eyenụk mmọ ndinọ n̄kpan̄utọn̄.—2 Cor. 2:17.
6 Ndibuana ke nneme ekpenyene ndidi inem inem n̄kpọ. Ke ntre, nnyịn ikpenyene ndiwụt mfọnido ye usọ ke ndineme etop Obio Ubọn̄. (Gal. 5:22; Col. 4:6) Domo ndinam owo enye eken enyene eti ekikere ke ini ọnyọn̄de. Ke usụn̄ emi, idem edieke nnyịn mîkekwe unen ndisịm enye esịt ke akpa ini, enye ekeme ndinọ n̄kpan̄utọn̄ n̄kan isan̄ en̄wen emi Ntiense enyenede nneme ye enye.
7 Nditọn̄ọ ufan ufan nneme idịghe utịp edimehe ye awak-n̄kukụhọ ukwọrọikọ. Enye n̄kukụre edi ndinam owo enyene udọn̄ ke ibuotikọ oro ebehede enye. Ndondo oro ima ikebem iso itịm idem, do nnyịn iyeben̄e idem ndibuan mme owo ke mme ufan ufan nneme. Ẹyak nnyịn idomo ndisịm esịt mbon oro nnyịn isobode ebe ke ndibuana mfọnn̄kan mbụk oro odude ye mmọ, eke mme nsinsi edidiọn̄ Obio Ubọn̄.—2 Pet. 3:13.