San̄a ke Mbuọtidem
1 Ediwak miliọn owo ẹbọp uwem mmọ ẹkanade inyene obụkidem, ke ndisịme ẹbuọtde idem ke abian̄a abian̄a odudu inyene. (Matt. 13:22) Mmọ ẹsikpep ọkpọsọn̄ ukpepn̄kpọ ke ini inyene mmọ ẹtakde m̀mê ẹdide se ẹyịpde m̀mê ẹnyenede esisịt ufọn. Ẹsịn udọn̄ ẹnọ nnyịn ndibịne usụn̄uwem emi otịmde owụt eti ibuot, ndiyom mme n̄kpọuto eke spirit. (Matt. 6:19, 20) Emi abuana ‘edisan̄a ke mbuọtidem.’—2 Cor. 5:7.
2 Ẹkabade ikọ oro “mbuọtidem” ẹto ikọ Greek oro ọnọde ekikere uko, ibetedem, edinen̄ede nnịm. Ndisan̄a ke mbuọtidem ọwọrọ ndisobo n̄kpọsọn̄ idaha ye uko ke Abasi, iberide edem ke ukeme esie ndikpeme ikpatisan̄ nnyịn ye unyịme esie ndise mban̄a se nnyịn iyomde. Jesus ama onịm mfọnmma uwụtn̄kpọ; enye okowụt ntịn̄enyịn ke se ikenen̄erede idi akpan n̄kpọ. (Heb. 12:2) Ukem ntre, oyom nnyịn iwụk ekikere nnyịn ke mme n̄kpọ eke spirit oro enyịn mîkwe. (2 Cor. 4:18) Nnyịn inyene ndikere kpukpru ini mban̄a uwem unana iwụk nnyịn eke idahaemi ndien inyịme ndiberi edem ofụri ofụri ke Jehovah.
3 Ana nnyịn n̄ko inen̄ede inịm ke Jehovah ke ada nnyịn usụn̄ ebe ke esop esie emi ẹkụtde ke enyịn ke idak ndausụn̄ “asan̄autom emi anamde akpanikọ, onyụn̄ enyenede ọniọn̄.” (Matt. 24:45-47) Nnyịn iwụt mbuọtidem nnyịn ke ini ‘ikopde uyo mme andida usụn̄’ ke esop. (Heb. 13:17) Ndisụhọde idem nnam utom ke edidianakiet ye ndutịm ukara Abasi owụt ibetedem oro iberide ke Jehovah. (1 Pet. 5:6) Ekpenyene ndinụk nnyịn ndinọ ibetedem ofụri esịt ke utom oro esop ọnọde nnyịn inam. Emi eyenam nnyịn isịk ikpere nditọete nnyịn ke ọkpọsọn̄ mbọbọ ima ye edidianakiet.—1 Cor. 1:10.
4 Nte Ẹkpesọn̄ọde Mbuọtidem: Inaha nnyịn iyak mbuọtidem nnyịn odop ada. Oyom nnyịn in̄wana ọkpọsọn̄ man inam enye ọkọri. Ukpepn̄kpọ, akam, ye edidụk mbonoesop kpukpru ini ẹyen̄wam ndisọn̄ọ mbuọtidem nnyịn man otodo, ye un̄wam Jehovah, enye ekeme ndibe idomo ekededi. (Eph. 6:16) Nte afo emenyene eti ndutịm ofụri ini kaban̄a edikot Bible ke usen ke usen ye editịm idem nnọ mme mbonoesop? Nte afo emesiwak nditie n̄kere se afo ekpepde, nte afo omonyụn̄ esisan̄a ekpere Jehovah ke akam? Nte edi ido fo ndisidụk kpukpru mbonoesop nnyụn̄ ntiene mbuana ke mmọ adan̄a nte ifet ebererede?—Heb. 10:23-25.
5 Nti utom ẹsọn̄ọ ọkpọsọn̄ mbuọtidem. (Jas. 2:26) Kiet ke otu nti usụn̄ ndiwụt mbuọtidem nnyịn edi ke nditan̄a idotenyịn nnyịn nnọ mbon en̄wen. Nte afo emesiyom mme ifet ndibuana eti mbụk? Nte emekeme ndinam ukpụhọde ke mme idaha fo man ekeme ndinam ekese ke utom ukwọrọikọ? Nte afo emesida mme ekikere oro nnyịn ibọde esịn ke edinam man ofori uduot ye uforo utom ukwọrọikọ nnyịn? Nte afo emesinịm mme ọkpọkpọ utịtmbuba eke spirit onyụn̄ an̄wana ndisịm mmọ?
6 Jesus ama odụri utọn̄ aban̄a edisịn idem n̄kaha ke mbubehe uwem ofụri usen nnyụn̄ nyak mme udọn̄ uma inyene obụkidem m̀mê ibụk anam ekikere eke spirit nnyịn okịm. (Luke 21:34-36) Ana nnyịn itịn̄ enyịn ikpeme nte isan̄ade man ifep n̄wụre ke uwem mbuọtidem. (Eph. 5:15; 1 Tim. 1:19) Kpukpru nnyịn idori enyịn ke nnyịn iyekeme ke akpatre ndidọhọ ke ‘ima in̄wana eti en̄wan, ima ifehe mbuba ima, ima isọn̄ọ imụm mbuọtidem ikama.’—2 Tim. 4:7.