Ẹbuana N̄kpọ ye Mbon En̄wen nte Ekemde ye Unana Mmọ
1 Jehovah anam ndutịm man ọnọ se inanade nnyịn ke n̄kan̄ eke spirit ebe ke “asan̄autom” emi anamde akpanikọ. (Matt. 24:45-47) Ediwak ke otu ndutịm emi ẹdi ke uduot n̄wed, Bible, mme eboho Enyọn̄-Ukpeme ye Awake!, mme vidio, mme kaset oro ẹmụmde ikọ ẹdọn̄, ye mme ọkpọ umụm-ntọt kọmputa ndida nnam ndụn̄ọde Bible. Se Jehovah ọnọde esiwak ndikem ye unana edibaha n̄kpọ. Enye oyom nnyịn inọ kiet eken n̄kpọ, ikụtde ite ke kpukpru owo ẹbọ ufọn ukem ukem.
2 Ẹda ediwak okụk ẹtịm kpukpru utọ enọ oro. Nditọete ofụri ererimbot ẹse ẹban̄a ubiatokụk emi. Emi edi ntre akpan akpan tọn̄ọ nte esop ọkọtọn̄ọ ndutịm edisuan n̄wed ye unana ekọmurua, eberide edem ofụri ofụri ke mme enọ unyịmesịt ndise mban̄a ubiatokụk.
3 Nte Nnyịn Ikemede Ndin̄wam: Nnyịn imekeme ndinam item Paul nte inọ mbon en̄wen n̄kpọ nte ekemde ye “se inanade mmọ.” (Rome 12:13) Ke ini nnyịn itịpde okụk kaban̄a utom ofụri ererimbot, nnyịn ibuana se nnyịn inyenede nnennen nnennen ye nditọete nnyịn ke ofụri ererimbot. Ye emi ke ekikere, ndusụk owo ẹbiere ndisio akpan ibat okụk nnịm nnọ utom ofụri ererimbot ke ọfiọn̄ kiet kiet, kpa nte mmọ ẹnamde kaban̄a ubiatokụk Ufọkmbono Obio Ubọn̄. Mmọ ẹfiọk ẹte ke owo idaha okụk emi ise iban̄a umịn̄n̄wed kpọt edi n̄ko kpukpru ikpehe utom. Kere ban̄a akwa ufọn oro nditọete nnyịn eke ofụri ererimbot ẹkpebọde edieke ediwak owo efen efen ẹkpebuanade n̄kpọ ke usụn̄ emi ofụri ini.
4 Ke adianade do, nnyịn imekeme ndibuana n̄kpọ ye mmọ ebe ke ndiwụt ukpeme kpukpru ini ke ini iben̄ede mme n̄kpọ oro ẹsisọpde ẹsịm nnyịn. Nditobo se nnyịn inen̄erede iyom anam nditọete nnyịn ke mme ebiet en̄wen ẹbọ mme n̄kpọ eke spirit oro mmọ n̄ko ẹyomde man ẹkop nsọn̄idem ẹnyụn̄ ẹnam edikwọrọ eti mbụk aka iso ke ikpehe n̄kan̄ mmọ.—Heb. 13:16.
5 Akpana nnyịn inyene emi ke ekikere akpan akpan ke ini iben̄ede mme n̄kpọ oro N̄ka abiatde ata ediwak okụk ndisio. Emi esịne mme vidio, mme usan umụm-ntọt kọmputa, ikpọ n̄wed ndụn̄ọde, mme eboho Enyọn̄-Ukpeme ye Awake!, ye mme ọkpọ umụmikọ. Utu ke ndiben̄e n̄kpọ nnọ owo kiet kiet ke ubon, nte ofụri ubon ekeme ndinyene kiet kpọt? Edieke nnyịn inịmde adan̄a ke se nnyịn ibọde inọ idem nnyịn, oro ayayak mbon en̄wen ẹnyene ukem nti n̄kpọ oro nnyịn inyenede.—Phil. 2:4.
6 Ẹkeme ndida ubak etịbe oro nnyịn itịpde kaban̄a utom ofụri ererimbot N̄ka ke Ufọkmbono Obio Ubọn̄ ye eke mbon oro ẹnyenede udọn̄ emi ẹbọde n̄wed nse mban̄a ekọmurua n̄wed oro nnyịn inịmde ke an̄wautom. Nte ededi, kaban̄a mme n̄wed oro nnyịn ibọde ndida nnam n̄kpọ ọkpọkpọ, esịnede n̄wedikwọ, Yearbook, ndiye uduot Bible, ye ntre ntre eken, nnyịn ikemeke ndidori enyịn mbonan̄wa ndise mban̄a se nnyịn iyomde. Mme asan̄autom Jehovah oro ẹma ẹkeyak idem ẹnọ ẹdi akpan mbon oro un̄wam okụk emi otode. Ye emi ke ekikere, ediwak asuanetop ẹsikere ekọmurua oro ẹkpenyamde mme n̄kpọ emi edieke ẹkpesiode mmọ ndinyam ke urua, ndien ekem mmọ ẹnọ etịbe nte ekemde. Ke uwụtn̄kpọ, ediye uduot Bible oro enyenede nsemnsem mben ekeme ndikpa n̄kpọ nte ₦900 m̀mê akande oro, n̄wed ndụn̄ọde ekeme ndikpa ₦1,300 m̀mê akande oro, ẹkeme ndinyam ediye uduot n̄wed usenọfiọn̄ emi ẹkọn̄de ke ibibene ke nsụhọde n̄kaha ₦50, ekọmurua n̄wed ofụri orụk ifiọk kiet ke usan umụm-ntọt kọmputa ọtọn̄ọ ke ₦1,000 esịm ₦2,300 m̀mê akande oro, nsemnsem usanikwọ esiwak ndikpa se ikperede ₦300 ndien ẹsiwak ndinyam ndusụk vidio ọsọn̄ urua akan oro. Ndikpu nditịp n̄kpọ awak ekem ndise mban̄a mme ekọmurua ke akpatre oyosụhọde se esop ekpekemede ndiyọhọ ke ndinam utom ofụri ererimbot aka iso.
7 Jesus ọkọdọhọ ete ke ẹdida ima oro mmọ ẹnyenede ẹnọ kiet eken ẹdiọn̄ọ mme ata mbet imọ in̄wan̄în̄wan̄. (John 13:34, 35) Ntatubọk nnyịn ke ndinọ n̄kpọ ke n̄kan̄ eke obụk ye unana ibụk ke ndibuana n̄kpọ ye mbon en̄wen nte ekemde ye unana mmọ ẹnen̄ede ẹdi nti usụn̄ ndiwụt ke nnyịn idi mme ata Christian.