Nso Kaban̄a Mme Iman Fo?
1 Ekese nnyịn imenyene ediwak iman ẹmi mîdụhe ke akpanikọ. Ọdọn̄ nnyịn didie ntem utọ mbonima oro nditiene nnyịn nsan̄a ke usụn̄ adade esịm uwem! Udọn̄ nnyịn kaban̄a nsinsi ini iso mmọ ekeme ndikpon n̄kan ke ini mmọ ẹdide mbonubon nnyịn. Okposụk edide nnyịn imodomo ke ediwak isua ndidemede udọn̄ mmọ mban̄a akpanikọ, nnyịn ikpenyeneke ndibiere ke idotenyịn idụhe kaban̄a idaha odude.
2 Ke ini Jesus akanamde utom ukwọrọikọ esie, “nditọ-eka Esie [ikọbuọtke] idem ye Enye.” (John 7:5) Ini kiet, mme iman esie ẹkekere ke ibuot ọbọhọ enye. (Mark 3:21) Kpa ye oro, Jesus ikakpaha mba ke idem mmọ. Nte ini akade, nditọeka esie ẹma ẹnyịme akpanikọ. (Utom 1:14) James eyeneka esie ama akabade edi adaha esop Christian. (Gal. 1:18, 19; 2:9) Edieke afo edimade ndikop idatesịt edikụt mme iman fo ẹnyịmede akpanikọ, kûtre ndidomo ndida eti mbụk Obio Ubọn̄ nsọk mmọ.
3 Nọ Nduọkodudu, Kûtịn̄ Ikọ Ukaha: Ke ini Jesus ọkọkwọrọde ikọ ọnọ mbon en̄wen, mme andikpan̄ utọn̄ nnọ enye ẹma ẹbọ nduọkodudu, idịghe esuene. (Matt. 11:28, 29) Enye ikakahake mmọ ye mme ukpepn̄kpọ oro mîn̄wan̄ake mmọ. Man ada mmọn̄ akpanikọ anam mme iman fo ẹbọ nduọkodudu, nọ mmọ kọp kiet ke ini kiet, kûnọ ọyọhọ bọket! Esenyịn kiet emi asan̄ade-san̄a ọkọdọhọ ete: “Mbon oro ẹsidemede udọn̄ mme iman mmọ ebe ke ndinọ nsịtnsịt ikọ ntiense ẹsinyene mfọnn̄kan utịp.” Ke usụn̄ emi, idem mme andibiọn̄ọ ẹkeme nditọn̄ọ ndibụp mme mbụme ndien ke akpatre ẹkop nsatitọn̄ ẹban̄a akpanikọ.—1 Pet. 2:2; men 1 Corinth 3:1, 2 domo.
4 Ediwak Christian ẹdide mme ọdọ ndọ ẹmenọ mme nsan̄a mmọ oro mînịmke ke akpanikọ ikọ ntiense uforo uforo ebe ke ndikụbọde ibuotikọ oro ekemede ndidemede mmọ udọn̄ nnịm. Eyenete an̄wan kiet emi akanamde emi ama enịm ukpepn̄kpọ n̄ko ye nditọ esie esịn ebe esie ke utọn̄, anamde mme n̄kpọ ẹn̄wan̄a nte ẹkemede ndinọ ebe esie ufọn. Ndusụk ini enye oyobụp enye ete: “Mma n̄kpep ntem ye ntem ke ukpepn̄kpọ mi mfịn. Nso ke afo ekere aban̄a oro?” Ebe esie ama enyịme akpanikọ ke akpatre.
5 Wụt Ukpono, Idịghe Unana Ime: Asuanetop kiet ọkọdọhọ ete ke “idem mme iman esie ẹnyene unen ndinọ mme ekikere ye uduak mmọ.” Ntre nnyịn ikpenyene ndiwụt ukpono ke ini mmọ ẹtịn̄de mme ekikere mmọ m̀mê ke ini ẹdọhọde nnyịn san̄asan̄a ẹte ikûneme akpanikọ ye mmimọ. (Eccl. 3:7; 1 Pet. 3:15) Ebede ke ndinyene ime ye ima onyụn̄ ebede ke ndidi eti andikpan̄ utọn̄, nnyịn imekeme ndiyom mme ifet ẹmi ẹdotde ndinọ usọ usọ ikọ ntiense. Utọ ime oro ekeme ndinyene utịp, nte ẹkekụtde ke eke Christian ebe kiet emi akadade ime ọyọ n̄wan esie emi ọkọdiọkde ido ye enye ke isua 20. Ndondo oro n̄wan ọkọtọn̄ọde ndikpụhọde, ebe ọkọdọhọ ete: “N̄wụt esịtekọm didie ntem nnọ Jehovah ke enye ndikan̄wam mi n̄kọri anyanime, koro ami mmekeme ndikụt utịp idahaemi: N̄wan mi ọmọtọn̄ọ ndisan̄a ke usụn̄ uwem!”
6 Nso kaban̄a mme iman fo? Ekeme ndito ke eti ido Christian fo ye akam oro ọbọn̄de ke ibuot mmọ, “afo emekeme ndidụri mmọ nnọ Jehovah.”—1 Pet. 3:1, 2, ikọ idakisọn̄ NW.