Editi—Ata Akpan Edinam!
1 Ke Sunday, March 23, ke utịn ama okosụhọde, nnyịn iyenịm Editi n̄kpa Christ. (Luke 22:19) Emi ke akpanikọ edi ata akpan edinam! Ebede ke ndimụm nsọn̄ọnda esie ye Jehovah n̄kama tutu esịm n̄kpa, Jesus ama owụt ke owo ekeme ndimụm mfọnmma uten̄e Abasi n̄kama idem ke idak ọkpọsọn̄ mfịghe, ke ntem omụmde edinen itie edikara Jehovah akama. (Heb. 5:8) Ke adianade do, n̄kpa Christ ama ọnọ mfọnmma uwa eke owo oro ẹyomde man ẹfak ubonowo, anamde mbon oro ẹnyenede mbuọtidem ẹkeme ndidu uwem nsinsi. (John 3:16) Ebede ke ndidu ke Editi, nnyịn imekeme ndiwụt ntotụn̄ọ esịtekọm ke ima oro Jehovah enyenede ọnọ nnyịn ye uwa Jesus ke ibuot nnyịn.
2 Ẹsịn udọn̄ ẹnọ kpukpru owo nditiene ndutịm edikot Bible oro ẹdiomide ẹnọ March 18-23, nte ẹwụtde ke 1997 Calendar of Jehovah’s Witnesses. N̄ko, ubon ndineme ibuot 112-116 ke n̄wed Akakan Owo Oro Akanam Odude Uwem ayan̄wam ndinọ ntịn̄enyịn ke ata akpan urua emi ke mbụk owo.
3 Nte afo emekeme ndinam ini oro abiatde ke an̄wautom ke ini Editi awak akan? Ediwak asuanetop ẹyeda utịturua ition oro ẹdude ke March ẹnam n̄kpọ nte ọfọnde ke ndinam utom nte mme asiakusụn̄ unọ un̄wam. Ntak mûsịneke ke otu mmọ? Kpukpru nnyịn imekeme ndinyene ọyọhọ ebuana ke ndisọn̄ọ ntịn̄ mban̄a ufọn edidụk Editi. Sia enye odụkde ke Sunday, eyemem ediwak owo utom ndidụk. Kụt ete ke imọnọ kpukpru nditọ ukpepn̄kpọ Bible ye mbon eken ẹmi ẹnyenede udọn̄ ikot ndidiana ye nnyịn. Buana ye mmọ se ẹwetde ke page 127, ikpehe ekikere 18, ke n̄wed Ifiọk oro aban̄ade usen kiet ke isua oro ẹnyenede ndinịm san̄asan̄a.
4 Nam n̄kpọ ban̄a akakan n̄kpọntịbe eke 1997 emi ye ntotụn̄ọ esịtekọm kaban̄a kpukpru se n̄kpa Jesus ọwọrọde ọnọ nnyịn. Du ke mbubịteyo March 23, ke ini mme ata Christian ke kpukpru ebiet ke edinam akpanikọ ẹdinịmde Editi.