Ekebe Mbụme
◼ Mme n̄wed ewe ke ẹkpenyene ndidọn̄ ke itie ubonn̄wed Ufọkn̄wed Utom Ukara Abasi?
Ẹmenọ akpakịp n̄wed eke spirit ke ufọn ikọt Abasi. Sia ediwak asuanetop mînyeneke kpukpru n̄wed ẹmi ọkpọkpọ, itie ubonn̄wed Ufọkn̄wed Utom Ukara Abasi ke Ufọkmbono Obio Ubọn̄ edi itie unam ndụn̄ọde ke mme n̄wed oro ekemede ndidi owo inyeneke. Ntem, ẹkpenyene ndidọn̄ nsio nsio edikabade Bible, mme n̄wed N̄ka eke ndondo emi, mme idem Utom Obio Ubọn̄ Nnyịn, mme eboho Enyọn̄-Ukpeme ye Awake!, ye mme Watch Tower Publications Index. Adianade do, ẹkpenyene ndisịn eti n̄wed ukabadeikọ eke eyomfịn. Edieke ẹdude, ẹnyụn̄ ẹkemede ndidep, mme n̄wed ofụri orụk ifiọk, mme n̄wed ndise obio, m̀mê mme n̄wed ndụn̄ọde ke nte ẹbonde ikọ ke usem ye ukpepn̄kpọ mbụkeset ẹkeme ndinyene ufọn. Nte ededi, akpan ntịn̄enyịn nnyịn ekpenyene ndikọn̄ọ ke mme n̄wed “asan̄autom emi anamde akpanikọ, onyụn̄ enyenede ọniọn̄.”—Matt. 24:45.
Ke ndusụk idaha ẹtọt ẹte ke ẹma ẹdọn̄ mme n̄wed oro ẹtiede eyịghe eyịghe ke itie ubonn̄wed Ufọkn̄wed Utom Ukara Abasi. Ikpodotke ndisịn mme n̄wed ẹdọn̄ọde mbụk ẹkerede-kere ẹwet, mme n̄wed usiakikọ oro ẹsọn̄ọde akwa nsụkuyo, m̀mê mme n̄wed ẹban̄ade ukpepn̄kpọ akwaifiọk m̀mê ubụpekpo. Itie ubonn̄wed Ufọkn̄wed Utom Ukara Abasi ekpenyene ndidọn̄ọ mme n̄wed ẹdinamde mbon oro ẹdade enye ẹnam n̄kpọ ẹnam n̄kaiso n̄kọri eke spirit.—1 Tim. 4:15.
Esenyịn ufọkn̄wed ese n̄kpọ aban̄a itie ubonn̄wed, okposụkedi ẹkemede ndinọ eyenete efen an̄wam enye ke ndise mban̄a. Enye ekpenyene ndikụt nte ke itie ubonn̄wed oro enyene mme n̄wed eke ndondo emi, adade mbufa n̄wed edidọn̄ ndondo oro mmọ ẹdude. Ẹkpenyene ndiwet enyịn̄ esop oro enyenede enye in̄wan̄în̄wan̄ ke esịt akpa ikọn̄n̄wed kiet kiet. Ke isua ke isua, ẹkpenyene ndidụn̄ọde mme n̄wed oro man ẹse m̀mê odu ekededi oro oyomde ẹdiọn̄ m̀mê ẹsịn efen ke itie esie.
Kpukpru owo ẹkeme ndidiana kiet ke ndise mban̄a itie ubonn̄wed oro. Ẹkpenyene ndinọ ntịn̄enyịn ke ndise mban̄a nnyụn̄ n̄kama mme n̄wed oro. Owo ikpenyeneke ndiyak nditọwọn̄ ẹda mmọ ẹbre mbre, m̀mê ndikpayak owo ekededi ewet n̄kpọ ke esịt mmọ. Ẹkeme ndidian ediye idiọn̄ọ nte n̄kpọ editi nte ke owo inyeneke ndimen n̄wed ẹmi n̄wọrọ n̄kpọn̄ Ufọkmbono Obio Ubọn̄.
Ye oro ẹsiakde mbufa esop kpukpru ini mi, eyedi nte ke ediwak itie ubonn̄wed ẹdi ukeuke ke udomo. Ndusụk asuanetop ẹmi ẹnyenede n̄kani n̄wed nnyịn ẹkeme ndikere mban̄a ndiyak mmọ nnọ esop. Mbiowo ẹkeme ndiyom nditobo mme eboho Enyọn̄-Ukpeme N̄ka oro ẹfiakde ẹmịn̄. Ke mme usụn̄ ẹmi, itie ubonn̄wed Ufọkn̄wed Utom Ukara Abasi eyenyene ufọn etieti ke ndin̄wam kpukpru owo ẹkụt mme n̄kpọuto Ikọ Abasi oro ẹdịbede, ẹmi ẹnọde ifiọk, ọniọn̄, ye asian.—N̄ke 2:4-6.