Obufa Ndutịm Kaban̄a Mme Itie Ubon N̄wed Ufọkmbono Obio Ubọn̄

Ke ediwak isua idahaemi, mme esop ke ofụri ererimbot ẹbọ ufọn ẹto itie ubon n̄wed Ufọkmbono Obio Ubọn̄ oro ẹkesikotde itie ubon n̄wed Ufọkn̄wed Utom Ukara Abasi. Ke ini edem, ama oyom esop kiet kiet enyene itie ubon n̄wed esiemmọ. Nte ededi, sia ediwak Ufọkmbono Obio Ubọn̄ idahaemi ẹnyenede se iwakde ibe esop kiet, emi ndusụk ẹdide esop usem esenidụt, etie nte enen̄ede ọfọn kpukpru otu oro ẹsemde ukem usem ke Ufọkmbono Obio Ubọn̄ kiet kiet ẹnyene eti itie ubon n̄wed Ufọkmbono Obio Ubọn̄ kiet kpọt oro ekemde. Ke mme Ufọkmbono Obio Ubọn̄ oro ẹnyenede se iwakde ibe itie usopidem kiet, itie usopidem kiet kiet akpana enyene itie ubon n̄wed ọnọ usem kiet kiet oro esisopde idem do.

Ẹdori enyịn nte ke ndutịm emi ayan̄wam ndinam ufan̄ odu onyụn̄ etre ubiat okụk. Akan oro, editọ itie ubon n̄wed esop iba m̀mê akande oro ndọn̄ kiet ayanam ẹnyene nti n̄wed. Ke ẹma ẹketọ mme itie ubon n̄wed emi ẹdọn̄, ẹyebon nyọhọ-nsụhọ n̄wed ke itie ọfọnde man ẹda mmọ ẹnam n̄kpọ ke ini ẹbọpde mbufa Ufọkmbono Obio Ubọn̄. Edieke Ufọkmbono Obio Ubọn̄ oro enyenede kọmputa emi Watchtower Library ke CD-ROM odude, ndusụk owo ẹkeme ndinen̄ede mbọ ufọn nto n̄kpọ utom emi.

Eyenete kiet, ọkpọfọn edi kiet ke otu mme esenyịn Ufọkn̄wed Utom Ukara Abasi, edise aban̄a itie ubon n̄wed Ufọkmbono Obio Ubọn̄ kiet kiet. Enye ekpenyene ndika iso ndọn̄ mme n̄wed oro ẹdotde ke otu n̄wed oro, ewetde n̄kpọ ediye ediye ke esịt ikpaedem n̄wed kiet kiet ndiwụt nte ke emi enyene itie ubon n̄wed Ufọkmbono Obio Ubọn̄. Ke nsụhọde n̄kaha ini kiet ke isua, enye ekpenyene ndise m̀mê mme n̄wed ẹkem ke itie ubon n̄wed onyụn̄ okụt ete ke mmọ ẹdu ke eti idaha. Owo ikpenyeneke ndimen n̄wed ke mme itie ubon n̄wed emi n̄wọrọ n̄kpọn̄ Ufọkmbono Obio Ubọn̄.

Kpukpru mbon oro ẹbuanade ye esop ẹsụk ẹwowụt esịtekọm ẹban̄a itie ubon n̄wed Ufọkmbono Obio Ubọn̄. Nnyịn ikpakam iwụt nte ke nnyịn owo kiet kiet imada ndutịm emi ke akpan n̄kpọ ebe ke ndise mban̄a enye ye ke ndida enye nyom “ifiọk Abasi.”—N̄ke 2:5.