Nnyịn Idikpep N̄wed Inemesịt Ubon

Afo ayadat esịt ndifiọk nte ke ọtọn̄ọde ke urua eke October 6, 1997, nnyịn idikpep n̄wed oro Ukpọhọde Inemesịt Ubon ke Ukpepn̄kpọ N̄wedesop. Owo ndomokiet idiyomke nditaba eti ndausụn̄ N̄wed Abasi ẹnọde kaban̄a inemesịt uwem ubon oro ẹdikpepde ke otu mi. Ndutịm ukpepn̄kpọ ọyọnọ ifet nditịm ndụn̄ọde ikpehe ekikere kiet kiet ye itien̄wed Bible ke n̄wed oro.

Ẹyekpep akpa ibuotikọ ofụri ofụri ke akpa urua ukpepn̄kpọ oro, sia ọdọn̄ọde ibat ibat itien̄wed Abasi oro owo mîkotke-kot isịn. Ke ukem ntak oro, ẹdikpep ibuot 15 ini kiet. Nte ededi, ẹdibahade kpukpru ibuot eken ẹsịn ke ikpehe iba, ẹkpepde n̄kpọ nte ubak ibuot kiet ke urua kiet kiet. Ntem, ini oro ekemde oyodu ndikot nnyụn̄ nneme kpukpru itien̄wed Abasi oro ẹsiakde-siak ẹsịn ọkọrọ ye editịm ndụn̄ọde ebuana oro kpukpru itien̄wed Abasi oro ẹdude ke ikpehe ekikere kiet kiet ẹnyenede.

Akpan ikpehe ke ukpepn̄kpọ oro edidi edineme n̄kpọ oro odude ke ekebe ukpepn̄kpọ ke utịt ibuot kiet kiet. Ke ntre, ẹkpenyene ndinịm ini oro ekemde ndida nneme mme mbụme ye mme itien̄wed Abasi oro ẹsiakde-siak ẹsịn ke ekebe oro.

Ẹsịn udọn̄ ẹnọ mme ada Ukpepn̄kpọ N̄wedesop ndinen̄ede ntịn̄ enyịn ntịm idem nnọ ukpepn̄kpọ nnyụn̄ nsịn udọn̄ nnọ kpukpru mbon oro ẹdude ke otu mmọ, esịnede mbufa owo, ndisitịm idem mfọn mfọn, ndụk kpukpru ini, nnyụn̄ mbuana.—om-EF 74-76.