Ben̄e Idem Ndikpep Ntịn̄nnịm Ikọ Isaiah!
1 “Mme anam-akpanikọ mme andituak ibuot mfịn ẹkeme ndinyene mbuọtidem nte ke Jehovah . . . idiyakke ererimbot Satan ada usen kiet ebịghi akan nte unenikpe oyomde.” Nso ikọ nsịnudọn̄ ke emi edi ntem! M̀mọ̀n̄ ke ẹkekot enye ẹto? Ntịn̄nnịm Ikọ Isaiah—Un̄wana Ofụri Ubonowo I. Nte ntịn̄nnịm ikọ Isaiah ọnọ nnyịn ntak ndisịm utọ ọnọ-nsịnudọn̄ ubiere oro? Ih! Ke n̄wed Bible oro, ẹsọn̄ọ ẹtịn̄ ibuotikọ edinyan̄a in̄wan̄-in̄wan̄. (Isa. 25:9) Ntak edi oro edidide akwa n̄kpọ nsịnudọn̄ ọnọ nnyịn ndikpep ikpehe Ikọ Abasi enye emi ke Ukpepn̄kpọ N̄wed Esop. Nte nnyịn iyodu do ndikpep enye kpukpru urua? Ntak emi nnyịn ikpodude?
2 Ke Isaiah 30:20 (NW), ẹkot Jehovah “Akwa Anditeme” nnyịn. Christian kiet kiet ekpenyene nditịm nnọ n̄kpan̄utọn̄ nte Jehovah etemede nnyịn ebe ke Ikọ esie ye ke mme n̄wed ẹkọn̄ọde ke Bible emi “asan̄autom emi anamde akpanikọ, onyụn̄ enyenede ọniọn̄” ọnọde. (Matt. 24:45; Isa. 48:17, 18) Emi enen̄ede edi akpanikọ aban̄a n̄wed Ntịn̄nnịm Ikọ Isaiah I. Didie ke afo ekeme ndibọ ekese ufọn nto edikpep enye?
3 Tịm Idem Man Abuana: Sio ini oro ekemde ke urua kiet kiet nịm nọ editịm idem nnọ ukpepn̄kpọ n̄wed. Kot itie oro anade ẹkpep ke ikpehe ke ikpehe. Kere ban̄a mme mbụme oro kiet kiet. Nịm idiọn̄ọ ke mme ibọrọ ke n̄wed fo. Ẹmịn̄ mme ufan̄ikọ oro ẹkotde ẹto Isaiah ke ndodobi ubọkn̄wed. Kot mmọ ye ntịn̄enyịn. Amaedi mme itien̄wed Abasi eken oro ẹsiakde ẹsịn, kot mmọ man okụt nte mmọ ẹnyenede ebuana ye se ẹnemede. Tie kere se afo ekpepde. Ndien buana se afo ekekpepde ye otu ukpepn̄kpọ n̄wed mbufo.
4 Eyenete oro enịmde ukpepn̄kpọ n̄wed ekpenyene ndin̄wam kpukpru owo emi ẹdụkde ndida Bible nnam n̄kpọ ke eti usụn̄ ndinyụn̄ mfiọk ata ata ufọn oro ẹbọde ẹto se ẹkpepde. Edieke ẹbemde iso ẹkot fi ndinọ ibọrọ, nọ mmemmem, nnennen ibọrọ. Edieke owo ekebemde iso anam oro, afo emekeme ndinam mme akpan n̄kpọ oro ẹnemede ẹn̄wan̄a. Ndusụk afo emekeme ndiwụt nte akpan itien̄wed ọsọn̄ọde ibuotikọ. Domo ndinọ ibọrọ ke ikọ idemfo, nyụn̄ nyene inemesịt editiene mbuana ke nneme.
5 Ẹyak nnyịn idụn̄ọde ọsọn̄urua etop oro odude ke n̄wed Isaiah ọtọkiet ye ọkpọsọn̄ udọn̄. Enye eyesịn udọn̄ ọnọ nnyịn ndidu uwem ke usen ke usen ke idatesịt, idoride enyịn ke edinyan̄a Jehovah!—Isa. 30:18.