Bọ se Itịmde Ifọn Ikan to Ufọkn̄wed
1 Emi edi ini ke isua emi ediwak uyen ẹsibụpde ẹte: “Ndi nnyene ndikam mfiak ndaha ufọkn̄wed?” Okposụkedi mme n̄kpọ-ata ye mme editịmede esịt ẹbuanade ye edifiak ndaha ufọkn̄wed, ediwak ufọn ẹdu n̄ko ẹnọ n̄kparawa owo ẹmi ẹsịnde idem man ẹbọ se itịmde ifọn ikan ẹto ubọ ukpep mmọ.
2 Eti akpan ubọ ukpep ekeme nditịp n̄kpọ nsịn ke n̄kọri eke spirit owo. Se owo anamde ke ini uyen enyene akpan ebuana ke se enye ekemede ndinam nte akwa owo. Idem ke n̄kpọ aban̄ade uka n̄wed, “se ededi owo ọtọde, oro ke enye edinyụn̄ ọdọk.” (Gal. 6:7) Mme uyen ẹmi ẹsịnde ifịk ẹkpep mme ukpepn̄kpọ ufọkn̄wed mmọ ẹkeme ndinyene mme usọ oro ẹdinamde mmọ ẹnen̄ede ẹnyene ufọn ẹnọ Jehovah.
3 Oyom edibem iso n̄kere ye ntịn̄enyịn edieke anade owo anam nnennen edimek ke se ẹkpepde ke ufọkn̄wed. Mme ete ye eka ẹkpenyene ndin̄wam nditọ mmọ ẹmek mme ukpepn̄kpọ oro ẹnọde ataata ukpep oro ẹnyenede ufọn ke ndisịm mme utịtmbuba eke spirit ke uwem. Ebede ke ndifori mme usọ mmọ, mme uyen ẹyenyene ifet edikeme ndin̄wam idemmọ ke utom usiakusụn̄. Akpan ukpep mmọ ekpenyene ndin̄wam mmọ nditoro Jehovah inamke n̄kpọ m̀mê m̀mọ̀n̄ ke mmọ ẹnam utom.
4 N̄kparawa owo, ẹdomo ndibọ se itịmde ifọn ikan nto mme isua ufọkn̄wed mbufo. Ke ndinam ntre, ẹwụk ntịn̄enyịn ke ndidu ọyọhọ uwem ke edisana utom, utu ke ndibịne ubọkọkọ ererimbot. Ẹdomo ndida uwem mbufo nnam uduak Jehovah. Ke ntre, mbufo ẹyekụt unen ke usụn̄ mbufo, ẹdade itoro ẹsọk Jehovah.—Ps. 1:3.