N̄KPARAWA OWO ẸBỤP
Nso ke N̄kpanam Edieke Mmemmaha Ufọkn̄wed?
Ọkpọdọhọ ke imọ imaha ufọkn̄wed ekeme ndin̄wan̄a owo sia ediwak mme andikpep ẹsisọn̄ ido tutu. Ndusụk nditọ ufọkn̄wed ẹkeme ndinyịk fi anam se mîfọnke. Udomo edi emi, ekeme ndibek fi ibuot. Owo itịn̄ke-tịn̄ iban̄a utomufọk, enye oro ọkọkụbọ.a Uyen kiet emi ekerede Rachelb ọdọhọ ete:
“Utu ke n̄ka ufọkn̄wed, nyom ebiet en̄wen ekededi n̄ka. Mmekeme ndika mbre ke esụk, ndu ye mme ufan mi mîdịghe n̄n̄wam ete ye eka mi ntem udia m̀mê nnam ufọk asana!”
Edieke etiede fi ke idem nte etiede Rachel emi, ọwọrọ mme isua osụk akade ufọkn̄wed mi ẹkeme nditie nte ẹsịn fi ke ufọk-n̄kpọkọbi ndien ẹdisana fi iyak usen okụrede ufọkn̄wed. Ndi enyene usụn̄ en̄wen emi ekpesede ini emi osụk akade n̄wed mi?
Ndi ama ọfiọk? Edieke okpụhọrede nte adade ufọkn̄wed idahaemi, ọyọdiọn̄ọ nte anamde n̄kpọ ke ufọkn̄wed udûnyụn̄ ukaha n̄wed ke nnam-didie. Oyokụt ke ufọkn̄wed edikam in̄wan̄wam fi ekpep ndusụk n̄kpọ emi ẹdinyenede ufọn inọ fi ama okpon owo.
Nam n̄kpọ ifan̄ emi man ada ufọkn̄wed nte akpanade ada:
Sịn idem kpep n̄wed. Ama esịn idem ekpep n̄wed, ke ini iso eyekeme ndise mban̄a mme mfịna emi edinyenede ke itieutom ye mme mfịna en̄wen emi edinyenede utu ke ndisụk nyom mbon en̄wen ẹn̄wan̄wam fi ke kpukpru n̄kpọ. Bụp idemfo ete, ‘Idem ekpededi enyene ndusụk n̄kpọ emi mmemmaha ke ufọkn̄wed, ndi enyene mme ufọn emi ndiade nto ufọkn̄wed?’
Se Bible etịn̄de: “Kpeme ata ọniọn̄ ye ukeme ukere n̄kpọ.”—Mme N̄ke 3:21.
Edieke oyomde ndidiọn̄ọ n̄kpọ en̄wen mban̄a se inemede emi, kot ibuotikọ emi “What if I’m Failing at School?”
Kpep nti ido. Se ẹsinamde ke ufọkn̄wed ekeme ndinam ọdiọn̄ọ nte akpadade ekpri ini oro enyenede anam n̄kpọ, anam okpokpono idem onyụn̄ ekpeme se anamde, onyụn̄ an̄wam fi esisịn idem anam utom—mme n̄kpọ emi ẹyen̄wam fi ama okpon owo. Bụp idemfo ete: ‘Didie ke se ẹsinamde ke ufọkn̄wed an̄wam mi n̄kpono idem nnyụn̄ n̄kpeme se nnamde onyụn̄ an̄wam mi nsịn idem nnam utom? Nso ye nso ke oyom mfiak nnam ọfọn akan ke mme afan̄ emi?’
Se Bible etịn̄de: “Kpukpru orụk utom ẹnyene ufọn.”—Mme N̄ke 14:23.
Edieke oyomde ndidiọn̄ọ n̄kpọ en̄wen mban̄a se inemede emi, kot ibuotikọ emi “Didie ke N̄kpada Ini Mi Nnam N̄kpọ?”
Sidu uwem ọfọn ye mme owo. Nte esinamde n̄kpọ ye nditọ ufọkn̄wed mbufo ke ufọkn̄wed ayan̄wam fi esikere aban̄a mme owo onyụn̄ esikpono mme owo. Akparawa kiet emi ekerede Joshua ọdọhọ ete: “Ndikpep nte ekpesinemede nneme ye mme owo edi akpan n̄kpọ ukem nte ndikpep history ye science. Ndikpep nte ekpesinemede nneme ye mme owo edi se ediyomde ke ofụri eyo uwem fo.” Bụp idemfo ete, ‘Nso ye nso ke n̄kpep ke ufọkn̄wed emi an̄wamde mi ndu ke emem ye mbon en̄wen—inamke n̄kpọ m̀mê mmọ ẹto m̀mọ̀n̄, ẹsinam n̄kpọ didie, m̀mê nso ke mmọ ẹnyụn̄ ẹnịm ke akpanikọ?’
Se Bible etịn̄de: “Ẹyom emem ye kpukpru owo.”—Mme Hebrew 12:14.
Edieke oyomde ndidiọn̄ọ n̄kpọ en̄wen mban̄a se inemede emi, kot ibuotikọ emi “How Can I Improve My Conversation Skills?”
Kere ban̄a ini iso fo. Ufọkn̄wed ekeme ndinwam fi ọdiọn̄ọ mme n̄kpọ mme n̄kpọ emi ekemede ndinam onyụn̄ ebiere se edinamde etiene se ọdiọn̄ọde oro. N̄kaiferi kiet emi ekerede Brooke ọdọhọ ete: “Emekeme ndikpep akpan ubọkutom kiet ke ufọkn̄wed nte ami n̄kekpepde, ndien ama okokụre n̄wed eyenyene se anamde.” Bụp idemfo ete: ‘Nso ke ndinam nda n̄n̄wam idem mma n̄kụre ufọkn̄wed? Nso ke n̄kpanam man n̄kụt ete ke se n̄kpepde edi se nduakde ndinam?’
Se Bible etịn̄de: “Kere ban̄a n̄kpọn̄.”—Mme N̄ke 4:26, Contemporary English Version.
a Mme n̄kpọ ẹnemede ke ibuotikọ emi eyetiene an̄wam mme uyen emi mîsikaha ufọkn̄wed, emi ẹsikpepde mmọ n̄kpọ ke ufọk.
b Ẹkpụhọ ndusụk enyịn̄.