Nịm Mme Ata Akpan N̄kpọ Akpa
1 Nso idi ndusụk akpan n̄kpọ oro ẹdide akpan n̄kpọ kaban̄a mfọnọn̄kpọ eke spirit nnyịn? Mmọemi ke akpanikọ ẹyesịne ọkpọkpọ ukpepn̄kpọ, edidụk mme mbonoesop, edikọbọ ke akam, eti ebuana, ye utom ukwọrọikọ Christian. Nnyịn ikemeke ndinyene eti nsọn̄idem eke spirit ye unana edinịm mme akpan n̄kpọ akpa ke uwem nnyịn.
2 Nte ededi, kpukpru nnyịn imenyene en̄wan ndin̄wana ye mme udọn̄ obụkidem imonyụn̄ iyom ntụnọ. (Gal. 5:17) Nnyịn ikpedehede ikere ke ekese ufọn ẹdu ke ndibịne mme ibụk ibụk udọn̄. (Jer. 17:9) Ke ntre, edieke anade ikpeme esịt nnyịn inyụn̄ ifep ndidi se ẹtụnde usụn̄, ndụn̄ọde idemowo ofụri ini edi akpan n̄kpọ.—N̄ke 4:23; 2 Cor. 13:5.
3 Dụn̄ọde Esịt Fo: Afo emekeme ndinam emi ebe ke ndibụp idemfo ndusụk mbụme esịt akpanikọ: Ndi esidọn̄ mi ndikot Ikọ Abasi? (1 Pet. 2:2) Ndi mmọfiọk ufọn edidụk kpukpru mbonoesop? (Heb. 10:24, 25) Ndi mmesikọbọ ke akam? (Rome 12:12) Ndi mmesiyom nsan̄a mbon oro ẹkerede n̄kpọ eke spirit? (Rome 1:11, 12) Ndi mmekere ke obiomo mi ọkpọkpọ nditan̄a eti mbụk? (1 Cor. 9:16) Mme in̄wan̄în̄wan̄ ibọrọ ẹyewụt ke afo ke oyom ndinịm mme ata akpan n̄kpọ akpa.
4 Dụn̄ọde Mme Edinam Ofụri Ini Fo eke Usen ke Usen: Oyom afo anam n̄kpọ aban̄a edidụn̄ọde mme udọn̄ esịt fo ebe ke ndidiọn̄ọ mme ebeiso n̄kpọ kaban̄a edida ini nnam n̄kpọ. Emi esịne edinam ndutịm nnọ ini ndikot Bible ye nsiondi Enyọn̄-Ukpeme ye Awake! kiet kiet kpukpru ini, ọkọrọ ye editịm idem nnọ mme mbonoesop. Ẹnyene ndisio ini n̄ko nnịm nnọ ubon ndida n̄kpep n̄kpọ nnyụn̄ mbọn̄ akam ọtọkiet. Nịm adan̄a ke udomo ini oro ẹbiatde ke iso TV, kọmputa, m̀mê ikpîkpu edika n̄kese owo nnyụn̄ nneme nneme. Biere ndidụk kpukpru mbonoesop, nyụn̄ diomi kpukpru n̄kpọ efen ndidu n̄kanade mmọ. Nam ndutịm nọ ofụri ubon ndibuana ke utom an̄wautom kpukpru urua.
5 Ye unana eyịghe, ndinịm mme ata akpan n̄kpọ akpa ke uwem nnyịn ayada idatesịt edi.