Nso ke Afo Enịm Akpa?
1 Didie ke afo ọkpọbọrọ mbụme oro? Ke akpanikọ, ọdọn̄ kpukpru nnyịn ndinịm mme n̄kpọ Obio Ubọn̄ akpa. (Matt. 6:33) Edi nnyịn imekeme ndibụp idem nnyịn ite, ‘Ndi mme n̄kpọ oro mmekde ẹwụt ke ami mmenịm mme n̄kpọ Obio Ubọn̄ akpa?’ Bible esịn udọn̄ ọnọ nnyịn ete: “Ẹka iso ẹwụt se mbufo ke idem mbufo ẹdide.” (2 Cor. 13:5) Didie ke nnyịn ikeme ndiwụt ke imenịm Obio Ubọn̄ akpa?
2 Ini Nnyịn: Nnyịn imekeme nditọn̄ọ ke ndidụn̄ọde nte nnyịn isibiatde ini nnyịn. (Eph. 5:15, 16) Nnyịn isibiat ini ebịghi adan̄a didie kpukpru urua idia uwem, ise ekebe ndise, iyom n̄kpọ ke Intanet, m̀mê ke mme edinam ini nduọkodudu? Idem ekeme ndikpa nnyịn edieke iwetde ini oro isibiatde ke mme utọ n̄kpọ oro inyụn̄ imende enye idomo ye ini oro isibiatde ke mme edinam eke spirit. Ndi nnyịn imesinam utom ibe ini inyụn̄ ifụmi edisana utom man ikeme ndinyene mme ọsọn̄urua n̄kpọ? Ikafan̄ ke nnyịn isifiak mbono esop m̀mê an̄wautom ke utịt urua ke ntak edinam ini nduọkodudu?
3 Nịm Mme Ebeiso N̄kpọ: Ata ediwak nnyịn inyeneke ini oro ọniọn̄de ekem ndinam kpukpru se ikpamade ndinam. Ntre man inịm mme n̄kpọ Obio Ubọn̄ akpa, oyom idụn̄ọde se inịmde nte mme ebeiso n̄kpọ inyụn̄ inam ndutịm inọ “se idide akpan n̄kpọ ikan.” (Phil. 1:10) Mmọ ẹsịne edikpep Ikọ Abasi, edibuana ke an̄wautom, edise mban̄a ubon, ye edidụk mme mbono esop Christian. (Ps. 1:1, 2; Rome 10:13, 14; 1 Tim. 5:8; Heb. 10:24, 25) Mme edinam eken, utọ nte uke uke edisịn̄ede idem ye eti edinam ini nduọkodudu ẹnyene ufọn. (Mark 6:31; 1 Tim. 4:8) Edi inaha mme n̄kpọ oro mînen̄ekede idi akpan n̄kpọ mi ẹbiọn̄ọ mme n̄kpọ Obio Ubọn̄.
4 Akparawa kiet oro okoyomde ndinịm mme n̄kpọ Obio Ubọn̄ akpa ama odụk utom ukwọrọikọ uyọhọ ini utu ke ndika ufọkn̄wed ntaifiọk man enyene utom. Enye ama ekpep usem en̄wen onyụn̄ ọwọrọ aka ebiet oro udọn̄ okponde akan. Enye ọkọdọhọ ete: “Mmenen̄ede n̄kop inem uwem mi. Utom ukwọrọikọ enen̄ede enem mi! Ubaha-e kpukpru n̄kparawa owo ẹkpenamde utọ utom emi ẹnyụn̄ ẹkụt se n̄kụtde. Idụhe se ifọnde ikan ndida kpukpru se inyenede nnam n̄kpọ Jehovah.” Ih, ndinịm Obio Ubọn̄ akpa anam nnyịn ibọ mme edidiọn̄, edi ke edide akpan n̄kpọ akan, enye enem Ete nnyịn eke heaven, Jehovah, esịt.—Heb. 6:10.