Kot Mmọ Ẹdi
1 Ẹnam ẹfiọk ikot oro ẹkenọde ke ediwak isua ikie ẹmi ẹkebede ke idụt 233 ke ofụri ererimbot idahaemi: “Mbufo ẹdi, nnyịn idọk ke obot Jehovah, . . . ndien enye eyekpep nnyịn ido esiemọ, nnyịn iyonyụn̄ isan̄a ke usụn̄ esie.” (Isa. 2:3) Ndida mme owo usụn̄ ndi esop Jehovah edi kiet ke otu mfọnn̄kan usụn̄ oro ikemede ndin̄wam mmọ ẹnam n̄kọri eke spirit oro adade esịm nsinsi uwem.
2 Ndusụk mme asuanetop ẹkeme ndimen̄e ndikot mme owo ẹdi Ufọkmbono Obio Ubọn̄ tutu ke mmọ ẹma ẹkenam akamba n̄kọri ke ukpepn̄kpọ Bible. Nte ededi, ndusụk ini mme owo ẹyetọn̄ọ ndidụk mme mbono esop idem mbemiso ẹkemede nditọn̄ọ ukpepn̄kpọ Bible ye mmọ. Nnyịn ikpenyeneke ndibiat ini ke ndinọ mme owo ufiop ufiop ikot ye nsịnudọn̄ ndidụk mme mbono esop.
3 Se Ẹkpenamde: Da mme n̄wedikot nam n̄kpọ nte ọfọnde ke ndisian mme owo mban̄a mme mbono esop eke n̄kann̄kụk nnyịn. Tịn̄ ete ke mme mbono esop ẹdi ke mfọn ndien nte ke akanam owo ibọhọ etịbe. Nam an̄wan̄a nte ẹsinịmde mme mbono esop. Sio wụt ete ke mmọ ẹdi mme ata ukpepn̄kpọ Bible ye nte ke mme n̄wed ukpepn̄kpọ ẹdu ẹnọ kpukpru owo nditiene. Dụri ntịn̄enyịn wụt nsio nsio idaha ke uwem mbon oro ẹdụkde. Tịn̄ ete ke mmọ ẹdi mme owo ẹtode n̄kann̄kụk ndien ke ẹdara nditọwọn̄ ẹdude ke kpukpru isua emana ndidụk. Nnyịn ikpenyene ndikot mbon oro nnyịn ikpepde n̄kpọ ye mmọ, idọhọde ke iyan̄wam mmọ ke usụn̄ ekededi ndidụk.
4 Kiet ke otu akpatre n̄kpọ oro ẹwetde ke Bible edi ufiop ufiop ikot oro ẹnọde ndibuana ke ndutịm uwem oro Jehovah anamde: “Spirit ye n̄wan-ndọ ẹdọhọ ẹte, Di. . . . Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Edi. 22:17) Ukpụhọde idụhe ke ndikot mbon efen ẹdidụk mme mbono esop nnyịn.
5 Isaiah 60:8 owụt ke ntịn̄nnịm ikọ nte ediwak tọsịn mbufa mme anditoro ẹdụkde ẹdi esop ikọt Abasi idahaemi nte ibiom eke “ẹfede (ẹdi) nte obubịt enyọn̄, ye nte ibiom ẹka ke mme window mmọ.” Kpukpru nnyịn imekeme ndikot mbufa owo ẹdi mbono esop nnyịn inyụn̄ inam mmọ ẹdiọn̄ọ ke ẹdara mmọ. Ke usụn̄ emi, nnyịn iyadiana ye Jehovah nte enye anamde utom editan̄ mbok awara.—Isa. 60:22.