Kpep Mbon En̄wen Usụn̄ Udori
1 Jehovah oyom kpukpru owo ẹnyene udori. (Isa. 48:17) Enye ọfiọk se idade ata inemesịt isọk nnyịn. Ọkpọsọn̄ udọn̄ esie edi nte mme owo ẹfep afanikọn̄ ẹnyụn̄ ẹdara uwem ebe ke ndinịm mme ewụhọ esie. Nnyịn inyene udori akamba akamba ebe ke ndidu uwem ekekem ye usụn̄ Abasi. (Ps. 34:8) Didie ke nnyịn ikeme ndikpep mbon en̄wen ndinam ukem ntre?
2 Nso ke Mme Owo Ẹyom? Nso ibehe mme enyeneufọk ke ebiet oro afo odụn̄de? Ndi idịghe ifụre ufọk mmọ, mbọbọ ndọ mmọ, ini iso nditọ mmọ, ye mme ukem n̄kpọ oro? Ke ini mmọ ẹnyenede mme mfịna, m̀mọ̀n̄ ke mmọ ẹsika ẹkeyom un̄wam? Mmọ ẹkeme ndiberi edem ke idemmọ, ke ndutịm unọ idem un̄wam, m̀mê ke ndausụn̄ mbon en̄wen. Ke ndinam ntem, mme ekikere ẹmi mîdụhe ke n̄kemuyo ẹmi mînyụn̄ inyeneke ufọn ẹsiyon̄ ediwak owo ibuot kaban̄a nte ẹkemede ndibọ ufọn. Ana nnyịn inam mmọ ẹnịm ke akpanikọ nte ke se Ikọ Abasi ọnọde nte ndausụn̄ enen̄ede ọfọn akan. (Ps. 119:98) Nnyịn imekeme ndinam emi ebe ke ndiwụt mmọ nte mmọ ẹkemede ndifori uduot uwem mmọ idem idahaemi edieke mmọ ẹsịnde ukeme ndikpep Bible nnyụn̄ nda se enye ọdọhọde nsịn ke edinam.—2 Tim. 3:16, 17.
3 Uwem Ubon Oro Ọfọnde Akan: Ibat ibat owo ẹfiọk nte item eke odudu spirit ke Ephesus 5:22–6:4 enen̄ede enyene ufọn ke ndikọk mme mfịna ubon. Emi ekedi ntre ye ebe ye n̄wan ẹmi, ke ẹma ẹkedọ ndọ ke isua duop, ẹkebierede ẹte ke mmimọ imọn̄ idian̄ade itie. Nte ededi, ẹma ẹtọn̄ọ ukpepn̄kpọ Bible ye n̄wan, emi ẹkekpepde enye mme edumbet N̄wed Abasi ẹban̄ade uwem ndọ. Ebe ama ọsọsọp okụt mme ukpụhọde oro enye akanamde nte enye akadade mme edumbet Bible esịn ke edinam, ndien enye ama abuana ke ukpepn̄kpọ oro. Enye ọkọdọhọ ke ukperedem ete: “Idahaemi nnyịn imokụt isọn̄ kaban̄a ata inemesịt uwem ubon.”
4 Ata Uduak ke Uwem: Ke ini uyen ekedide enyene-mbumehe uda n̄kpọsọn̄ ibọk okoyomde un̄wam oto Mme Ntiense, ẹma ẹkpep enye ẹte ke Jehovah ekere aban̄a enye ọkpọkpọ. Enye ọkọdọhọ ete: ‘Mma n̄kpep nte ke Andibot enyene uduak aban̄a owo onyụn̄ ọn̄wọn̄ọ nsinsi uwem ọnọ mbon oro enye enyịmede. Afo ukemeke ndifiọk nte n̄kokopde inemesịt mban̄a emi. Mfịn, mmenyene eti nsọn̄idem, ifụre ekikere, ye n̄kpet n̄kpet itie ebuana ye Abasi.’
5 Kpukpru owo ẹkeme ndibọ ufọn nto eti un̄wam oro odude ke Ikọ Abasi. Ebede ke ndida enye nte ndausụn̄ nnyịn, nnyịn isọn̄ọ ite ke usụn̄ Jehovah enen̄ede ọfọn akan mme usụn̄ ererimbot. (Ps. 116:12) Edi ifet ọnọ nnyịn ndida etop emi nsọk mbon en̄wen, ikpepde mmọ usụn̄ udori. Nte nnyịn inamde oro, nnyịn iyokụt ediwak nti utịp.