Mme Ete ye Eka—Ẹnịm Eti Uwụtn̄kpọ ẹnọ Nditọ Mbufo
1 Ikọ Abasi asian nnyịn ete ke “esịt eyenem ete [ye eka] eti eyen etieti.” (N̄ke 23:24, 25) Nso edidiọn̄ ke emi edi ntem ọnọ mme ete ye eka oro ẹnịmde eti uwụtn̄kpọ ẹnọ nditọ mmọ! Andibuana ke otu Kọmiti N̄kọk Itieutom kiet ọkọdọhọ aban̄a ete ye eka esie ete: “Akpanikọ ekedi ofụri uwem mmọ, ndien ami n̄koyom ndinam enye edi ofụri uwem mi n̄ko.” Nso ke nditọ ẹkpenyene ndikụt ke idem ete ye eka mmọ?
2 Nti Edu ye Ntotụn̄ọ Ukpono: Edi mbiomo mme ete ye eka ndisịn nti edu ke esịt nditọ mmọ. Owo ikpepke nti edu n̄kukụre ito item inua, edi ke ndikokụt ye ndikpekpebe. Ke ntre, nso edu ke mbufo ẹsiwụt? Nte nditọ mbufo ẹsikop ẹdọhọde “fen mi,” “mbọk,” ye “sọsọn̄ọ”? Ke ubon, nte mbufo ẹmesinam n̄kpọ ye kiet eken ye ntotụn̄ọ ukpono? Nte mbufo ẹmesikpan̄ utọn̄ ke ini mbon en̄wen ẹtịn̄de ikọ? Nte mbufo ẹmesikpan̄ utọn̄ ke ini nditọ mbufo ẹtịn̄de ikọ ẹnọ mbufo? Nte ẹmesiwụt nti edu ẹmi ke Ufọkmbono Obio Ubọn̄ ye ke esịt ufọk?
3 Nsọn̄idem eke Spirit ye Ifịk Ifịk Utom: Eyenete emi abiatde se ibede isua 50 ke utom uyọhọ ini eti ete: “Ete ye eka mi ẹkedi utịbe utịbe uwụtn̄kpọ ke esịtekọm oro mmọ ẹkenyenede ẹnọ mme mbono esop ye ke ifịk oro mmọ ẹkenyenede ẹnọ utom ukwọrọikọ.” Didie ke mbufo ẹnam ẹwụt nditọ mbufo nte ke ẹmekere ẹban̄a edimụm idaha eke spirit mbon oro ẹdude ke ufọk mbufo n̄kama? Nte mbufo ẹmesineme itien̄wed eke usen ke usen ọtọkiet? Nte mbufo ẹmesinyene ukpepn̄kpọ ubon ofụri ini? Nte nditọ mbufo ẹsikụt mbufo ẹkotde Bible ye mme n̄wed N̄ka? Nso ke mmọ ẹsikop ke ini mbufo ẹbọn̄de akam ke ibuot ubon? Nte ẹmesinyene nneme eke spirit oro ọbọpde-bọp ye nditọ mbufo, ẹnemede in̄wan̄în̄wan̄ n̄kpọ ẹban̄ade akpanikọ ye esop? Nte mbufo ẹmenyene ọkpọsọn̄ udọn̄ ndidụk kpukpru mbono esop ndinyụn̄ mbuana ke an̄wautom nte ubon?
4 Mme ete ye eka, ẹtie ẹkere uwụtn̄kpọ oro ẹnịmde ẹnọ nditọ mbufo. Ẹnam enye edi ata eti uwụtn̄kpọ, ndien mmọ ẹyema enye ke ọfụri uwem mmọ. N̄wan esenyịn kiet oro asan̄ade-san̄a, oro odude idahaemi ke iduọk isua 70 esie, ọkọdọhọ ete: “Ke nsụk mbọbọ ufọn nto eti uwụtn̄kpọ ima ima ete ye eka mi ẹkedide Christian. Ndien edi akam ofụri esịt mi nte ami n̄kpakam n̄wụt ọyọhọ esịtekọm nnọ n̄kpọ-akpa emi ebe ke ndida enye nnam n̄kpọ nte odotde ke ofụri ini uwem mi.”