Mmemmem Usụn̄ Ọfọn Akan
1 Ntak emi n̄kpri asuanetop ẹsiwakde ndimụm ntịn̄enyịn mbon emi mmọ ẹbuanade etop Obio Ubọn̄? Ntak kiet edi nte ke mme ikọ mmọ ẹsidi mmemmem. Ndusụk mme asuanetop ẹkeme ndikere ke ndinọ ikọ ntiense uforo uforo oyom udọn udọn nneme. Nte ededi, ifiọkutom owụt nte ke nneme oro edide mmemmem onyụn̄ an̄wan̄ade ọfọn akan.
2 Jesus akatan̄a Obio Ubọn̄ Abasi ke mmemmem ye in̄wan̄-in̄wan̄ usụn̄ onyụn̄ ekpep mme mbet esie ndinam ukem oro. (Matt. 4:17; 10:5-7; Luke 10:1, 9) Enye akada ntọn̄ọikọ, mme mbụme ye mme uwụtn̄kpọ oro mîwakke n̄kukọhọ ndimụm ntịn̄enyịn mme andikpan̄ utọn̄ nnọ enye nnyụn̄ nsịm esịt mmọ. (John 4:7-14) Ọkpọfọn nnyịn ndikpebe uwụtn̄kpọ esie nnyụn̄ nnyene nneme oro edide mmemmem ndifiọk se ọwọrọde.
3 “[Eti mbụk, NW] Obio Ubọn̄ emi” edi etop emi nnyịn inyenede nditan̄a. (Matt. 24:14) Ndida Obio Ubọn̄ nte akpan ibuotikọ fo ayan̄wam ndinam nneme fo edi mmemmem. Tịn̄ mme ikọ oro ẹbehede mme andikpan̄ utọn̄ nnọ fi. Iban ẹsiwak nditịm nnyene udọn̄ ke ubon mmọ ẹkan mme ibuot nneme ẹban̄ade ukaraidem. Ete esisọp ekere aban̄a utom ye ifụre ubon esie. N̄kparawa owo ẹnyene udọn̄ ke ini iso mmọ; n̄kani owo ẹnyene udọn̄ ke nsọn̄idem ye ifụre mmọ. Mme owo nte ido edide ẹsinen̄ede ẹnyene udọn̄ ẹban̄a n̄kpọntịbe n̄kann̄kụk ẹkan se itịbede ke nsannsan idụt. Ke ama ekeneme mme n̄kpọ oro ẹmụmde udọn̄ edem mbiba, dụri ntịn̄enyịn wụt mme edidiọn̄ oro okopitem ubonowo edinyenede ke idak ukara Obio Ubọn̄ Abasi. Mmemmem ikọ ifan̄ oro ẹtịmde ẹmek adianade ye itien̄wed Abasi kiet ekeme ndidi mfọnn̄kan usụn̄ ndidemede udọn̄ andikpan̄ utọn̄ nnọ fi.
4 Afo Emekeme Nditọn̄ọ Nneme ke Ndidọhọ:
◼ “Nte eyịghe mîdụhe, afo emenyịme nte ke ubonowo osobo ediwak udọn̄ọ emi owo mîkemeke ndikọk. Edi nte afo ama ọfiọk nte ke Abasi ọn̄wọn̄ọ ke imọ iyosio kpukpru orụk udọn̄ọ, ọkọrọ ye n̄kpa, ifep ke mîbịghike?” Bet ibọrọ, ndien ekem kot Ediyarade 21:3, 4.
5 Mbufo ẹkpakam ẹda mmemmem nneme emi an̄wan̄ade ẹsịm esịt ye ekikere ediwak owo ke efakutom mbufo, ẹn̄wamde mmọ ndikpep mban̄a Jehovah ye idotenyịn edinyene nsinsi uwem.—John 17:3.