Obufa Ndutịm Mbono Circuit
Edikabade kiet oro ẹnọde uten̄e edi “ntotụn̄ọ ukpono ye mbak oro ẹnyenede ẹnọ Abasi akpan akpan.” Emi etịn̄ aban̄a eti uten̄e oro ẹwụtde ke N̄wed Abasi nte “editọn̄ọ ifiọk.” (Ps. 111:10) Ke okpụhọrede ye oro, utọ mbak efen odu oro akarade ererimbot Satan emi akande nnyịn okụk. Didie ke nnyịn ikeme ndifep idiọk ekikere ke adan̄aemi ikọride ukpono ukpono mbak inọ Jehovah? Obufa ndutịm mbono circuit eke isua 2002 ọbọrọ mbụme emi. Ibuotikọ edi “Ẹten̄e Abasi, Ẹnyụn̄ Ẹnọ Enye Ubọn̄.” (Edi. 14:7) Nnyịn iyokụt ediwak usụn̄ emi uten̄e Jehovah ọnọde nnyịn ufọn nte owo kiet kiet ye nte esop.
Okposụkedi mbak ekemede ndinọ ekikere editịmede esịt m̀mê unana uko ye edimen̄e ndisobo n̄kpọsọn̄ idaha, Bible ọdọhọ ete: “Ọfọfọn ọnọ kpukpru owo eke ẹbakde Jehovah.” (Ps. 128:1) Ndutịm mbono emi oyowụt nnyịn nte ikemede ndisobo mme n̄kpọ-ata kaban̄a utuakibuot akpanikọ uforo uforo. Nnyịn iyokụt nte ikemede ndin̄wam mbufa owo ndikọri utọ eti uten̄e Abasi emi, oro editịmde edemede mmọ udọn̄ ndiyom ndinam n̄kpọ nnọ enye ke ofụri esịt, ukpọn̄, ekikere, ye odudu mmọ. (Mark 12:30) Ẹdida utịn̄ikọ esenyịn district oro “Nen̄ede San̄a Kpere Mbon Oro Afo Amade” ẹberi akpa usen. Enye ayanam an̄wan̄a nte nnyịn ikemede ndidu ke edidemede mban̄a ukeme oro Devil esịnde ndiwọn̄ọde nnyịn n̄kpọn̄ Jehovah, ubon nnyịn, ye nditọete Christian nnyịn.
“Ten̄e Jehovah, Idịghe Owo” edi ibuotikọ nneme oro enyenede ikpehe inan̄ ke ọyọhọ usen iba. Enye ayanam an̄wan̄a ntak ye usụn̄ nte anade nnyịn ikan mbak ekededi oro ọbiọn̄ọde nnyịn ndinam utom ukwọrọikọ nnyịn mma m̀mê ndimụm nsọn̄ọnda ye eti ubieresịt nnyịn ke ufọkn̄wed ye ke itieutom n̄kama. Utịn̄ikọ an̄wa oro “Bak Abasi Nyụn̄ Nịm Mbet Esie” ọkọn̄ọ ke mme n̄kpọntịbe oro ẹtịn̄de ẹban̄a ke Ediyarade ibuot 14. Ẹdida in̄wan̄-in̄wan̄ ndausụn̄ emi “Ẹka Iso Ndisan̄a ke Uten̄e Jehovah” ẹberi mbono circuit emi.
Ufọkn̄wed Utom Ukara Abasi, uwụtn̄kpọ nte ẹkpenịmde Esoputom, utịn̄ikọ baptism, ye utịn̄ikọ Enyọn̄-Ukpeme ẹdi mme akpan n̄kpọ efen efen oro mîkpanaha afo ataba. Kot nditọ ukpepn̄kpọ Bible fo ẹtiene fi ẹdụk. Owo ekededi oro ediyomde ndina baptism ekpenyene ndisian esenyịn oro etiede ibuot usọp usọp nte ekekeme. Kpukpru nnyịn iyoyom ndiwụt eti mbak oro nnyịn inyenede inọ Jehovah inyụn̄ inọ enye ubọn̄ ebe ke nditre nditaba ikpehe ekededi ke akpan ndutịm emi!