United by Divine Teaching—Ndikụt Ata Edidianakiet Nditọete
Esenyịn circuit kiet ama abuana ke ukpepn̄kpọ Bible emi ekenịmde ye n̄wan emi mîkọtọn̄ọke kan̄a ndidụk mme mbono esop. Enye ama ọdọhọ n̄wan oro ese vidio United by Divine Teaching. Ke urua oro, n̄wan oro ama odụk mbono esop onyụn̄ ọdọhọ ete ke ima inen̄ede ikop inemesịt ndidu do. Ntak emi vidio emi ekenyenede utọ usọp usọp utịp oro? Ama otụk enye ke idem ndikụt nte vidio oro okowụtde ọsọn̄urua edidianakiet nditọete nnyịn ke edinam ke ererimbot emi ọyọhọde ye afai ye usua.—John 13:35.
Se vidio emi man okụt onyụn̄ enyene emem ye ima emi Mme Ntiense Jehovah ẹnyenede ke ofụri isọn̄. Ndien kere ban̄a mme mbụme emi:
(1) Ntak emi “Ukpepn̄kpọ Abasi” ekedide ibuotikọ emi odotde ọnọ ikpọ mbono eke 1993-1994?—Mic. 4:2.
(2) Nso ke akpanikọ Bible ọwọrọ ọnọ ndusụk ubon? Nso ke enye ọwọrọ ọnọ ubon fo?
(3) Ntak emi edide akpan n̄kpọ ndidi se Jehovah etemede?—Ps. 143:10.
(4) Mme n̄kpọ-ata ewe ke ẹnyene ndisobo man ẹdiomi ikpọ mbono ofụri ererimbot?
(5) Didie ke afo okụt nte Psalm 133:1 ye Matthew 5:3 ẹkesude ke ikpọ mbono Christian oro afo odụkde?
(6) Nso an̄wa-an̄wa uyarade idu iban̄a odudu emi ukpepn̄kpọ Abasi enyenede?—Edi. 7:9.
(7) Nso ikedi n̄wakn̄kan ibat mme ata Christian oro akanam ẹnade baptism?
(8) Mme ikọ Micah, Peter, ye Jesus ewe ẹsu ke otu Mme Ntiense Jehovah?
(9) Nso inọ fi uyarade nte ke ubon emi okopde inemesịt oro adianade kiet idịghe ikpîkpu ndap?
(10) Anie ke afo ediwụt vidio emi, ndien ntak-a?
Ke ama ekese vidio emi, eyenete an̄wan kiet ama etịn̄ nte ọfọnde ete: “Vidio emi ayan̄wam mi ke akamba udomo nditi nte ke ediwak nditọete Christian iren ye iban ke ofụri ererimbot ke ẹnam n̄kpọ Jehovah ata idahaemi. . . . Edidianakiet nditọete nnyịn ọsọn̄ urua didie ntem!”—Eph. 4:3.