Mme Ete ye Eka—Ẹkpep Nditọ Mbufo N̄kpọ Toto ke Uyen
1 “Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.” (N̄ke 22:6) Mme ete ye eka, edieke mbufo mîyomke nditọ mbufo ‘ẹkpọn̄’ usụn̄ akpanikọ, ini ewe ke utọ ukpep oro ọkpọtọn̄ọ? Toto ke uyen!
2 Ke ini Paul ọkọdọhọde ke ukpep eke spirit Timothy ekedi “toto ke uyen,” nte an̄wan̄ade ikọ esie ọkọwọrọ tọn̄ọ ke nsek. (2 Tim. 3:14, 15) Nte utịp, Timothy ama ọkọri akabade edi ata eti owo eke spirit. (Phil. 2:19-22) Mme ete ye eka, mbufo n̄ko ẹnyene nditọn̄ọ “toto ke uyen” n̄kpep nditọ mbufo se mmọ ẹyomde man mmọ ‘ẹkọri ke iso Jehovah.’—1 Sam. 2:21.
3 Ẹnọ Mmọn̄ Oro Mmọ Ẹyomde Man Ẹkọri: Kpa nte n̄kpri eto ẹyomde mmọn̄ kpukpru ini man ẹkọri ẹkabade ẹdi ikpọ eto, oyom kpukpru nditọwọn̄ emi ẹdude ẹyọhọ ye mmọn̄ akpanikọ Bible man ẹkabade ẹdi mme asan̄autom Abasi oro ẹkọride ẹsịm ọyọhọ idaha. Akpan usụn̄ ndikpep nditọwọn̄ akpanikọ nnyụn̄ n̄n̄wam mmọ ẹnyene n̄kpet n̄kpet itie ebuana ye Jehovah edi ke ukpepn̄kpọ Bible ubon ofụri ini. Edi mme ete ye eka, ẹkere ẹban̄a udomo ini emi eyen kiet kiet ekemede ndinọ n̄kpan̄utọn̄. Ye n̄kpri nditọ, eyedi mbio mbio ini ukpepn̄kpọ emi ẹnịmde ndien ndien ẹyenyene uforo ẹkan ibat ibat oro ẹnịmde ke anyan ini.—Deut. 11:18, 19.
4 Ẹkûdede ẹse ukeme oro eyen mbufo enyenede ndikpep n̄kpọ ke usụhọde. Ẹnọ mmọ mbụk ẹban̄ade mme owo eke Bible. Ẹdọhọ mmọ ẹwet mme ndise Bible m̀mê ẹnam mme n̄kpọntịbe Bible ẹwụt. Ẹda mme vidio ye ọkpọ umụmikọ nnyịn, esịnede mme drama Bible, ẹnam n̄kpọ. Ẹkpụhọde ukpepn̄kpọ ubon ekekem ye isua ye ukeme ukpepn̄kpọ nditọ mbufo. Akpa ukpep edidi ke n̄kpri n̄kpọ, ke ibio ibio; edi nte eyen ọkọride okpon, ukpep esie ekpenyene nditịm ntara nnyụn̄ nnyene n̄kọri. Ẹnam item Bible enyene uwem ẹnyụn̄ ẹnọ enye ke nsio nsio usụn̄. Mbufo ẹyeyom nditọ mbufo ‘ẹkọri ọkpọsọn̄ udọn̄ ẹnọ’ Ikọ Abasi, ntre ẹnam ukpepn̄kpọ enyene inem nte ẹkekeme.—1 Pet. 2:2, NW.
5 Ẹnam Mmọ Ẹbuana ke Esop: Ẹnịm mme utịtmbuba oro ẹnyenede n̄kọri ẹnọ nditọ mbufo man mmọ ẹbuana ọyọhọ ọyọhọ ke esop. Nso ikeme ndidi akpa utịtmbuba mmọ? Ete ye eka n̄kpri nditọ iba ẹkedọhọ ẹte: “Mmọ mbiba ẹketọn̄ọ ndibọ ukpep nditie sụn̄ ke Ufọkmbono Obio Ubọn̄.” Ekem, n̄wam nditọ ndinọ ibọrọ ke ikọ idemmọ ke mme mbono esop nnyụn̄ nnam edi utịtmbuba mmọ ndisịn enyịn̄ ke Ufọkn̄wed Utom Ukara Abasi. Ke utom an̄wautom, nti utịtmbuba oro ẹkemede ndisịm edi ndinọ tract ke enyịnusụn̄ mme owo, ndikot itie N̄wed Abasi kiet, ndineme mban̄a magazine, ye ndibuan mme enyeneufọk ke nneme oro enyenede ufọn.
6 Ẹnịm Uwụtn̄kpọ Oro Aduaide Owo Idem: Nte nditọ mbufo ẹsikop mbufo ẹtịn̄de ikọ ẹban̄a Jehovah ke usen ke usen ye nte ẹbọn̄de akam ẹnọ enye? Nte mmọ ẹsikụt mbufo ẹkpepde Ikọ esie, ẹdụkde mme mbono esop, ẹbuanade ke an̄wautom, ẹnyụn̄ ẹkụt mbufo ẹmade ndinam uduak Abasi? (Ps. 40:8) Edi akpan n̄kpọ mmọ ndikụt, mbufo ndinyụn̄ nnam mme n̄kpọ emi ọtọkiet. Eyenan̄wan oro ọkọride ọwọrọ owo eketịn̄ aban̄a eka esie, oro ọkọbọkde nditọ itiokiet ẹkabade ẹdi mme anam-akpanikọ Ntiense ete: “Se ikotụkde nnyịn ke idem ikan ekedi uwụtn̄kpọ Mama—emi ama etịn̄ ikọ ọsọn̄ uyo akan mme ikọ.” Eka nditọ inan̄ ọkọdọhọ ete: “‘Jehovah edi akpa’ ikedịghe sụk ọsọ ikọ edi ekedi usụn̄ oro nnyịn ikodude uwem nnyịn.”
7 Mme ete ye eka, ẹbak ẹtọn̄ọ ndikpep nditọ mbufo n̄kpọ, ẹkpep mmọ akpanikọ otode Ikọ Abasi, ẹnịm mme utịtmbuba oro ẹnyenede n̄kọri, ẹnyụn̄ ẹnọ mfọnn̄kan uwụtn̄kpọ oro ẹkemede. Mbufo ẹyekop inemesịt ndikanam mme n̄kpọ emi!