Kpep Nditọ Fo Ndidi Mme Ọkwọrọikọ
1. Psalm 148:12, 13 onụk mme ete ye eka ndinam nso?
1 Jehovah ọdọhọ mme uyen ẹtoro imọ. (Ps. 148:12, 13) Mmọdo, mme ete ye eka oro ẹdide mme Christian isikpepke nditọ mmọ akpanikọ Bible ye mme ibet Abasi oro ẹban̄ade ido uwem kpọt, edi ẹsikpep mmọ n̄ko ndidi mme ọkwọrọ eti mbụk. Didie ke ẹkeme ndinam emi ke adiana ke adiana?
2. Didie ke eti uwụtn̄kpọ ete m̀mê eka editụk nditọ esie?
2 Eti Uwụtn̄kpọ: Gideon emi ekedide ebiereikpe ọkọdọhọ owo 300 esie ete: “Ẹse mi.” (Judg. 7:17) Nditọ ẹsise se mme ete ye eka mmọ ẹnamde ẹnyụn̄ ẹnam kpa ntre. Ete kiet anam utom okoneyo, edi ke ini enye ọnyọn̄de edi usenubọk Saturday, utu ke enye ndika n̄kede idap, enye esimen nditọ esie ọwọrọ an̄wautom okposụkedi emi idem esimemde enye. Ye unana enye nditetịn̄, enye ke ekpep nditọ esie nte ke ukwọrọikọ edi ebeiso n̄kpọ. (Matt. 6:33) Ndi nditọ fo ẹsikụt fi adatde esịt ndibuana ke nsio nsio ikpehe utuakibuot nnyịn utọ nte akam, edikot Bible, edibọrọ mbụme, ye edikwọrọ ikọ? Edi akpanikọ nte ke afo udukemeke ndidi mfọnmma uwụtn̄kpọ. Edi nditọ fo ẹyenen̄ede ẹnam n̄kpọ ẹban̄a ukeme oro afo esịnde ndikpep mmọ ẹtuak ibuot ẹnọ Jehovah edieke mmọ ẹkụtde nte afo esịnde ifịk anam ntre.—Deut. 6:6, 7; Rome 2:21, 22.
3. Mme ewe utịtmbuba eke spirit ke mme ete ye eka ẹkpen̄wam nditọ mmọ ẹnịm ẹnyụn̄ ẹsịm?
3 Mme Utịtmbuba Oro Ẹsịmde ke Adiana ke Adiana: Mme ete ye eka isikpaha mba ndikpep nditọ mmọ ndisan̄a isan̄, nditịn̄ ikọ, ndisịne ọfọn̄, ye ntre ntre eken. Nte nditọ ẹkọride ẹkponi, ẹsinịm mmọ obufa utịtmbuba ke iso. Edieke mme ete ye eka ẹdide mme Christian, mmọ n̄ko ẹsin̄wam nditọ mmọ ndinịm nnyụn̄ nsịm mme utịtmbuba eke spirit emi ekemde ye isua emana mmọ ye ukeme mmọ. (1 Cor. 9:26) Ndi mbufo ke ẹkpep nditọ mbufo ndibọrọ mbụme ke ikọ idem mmọ, ndinyụn̄ ntịm utịn̄ikọ oro ẹnọde mmọ ke Ufọkn̄wed Utom Ukara Abasi? (Ps. 35:18) Ndi ke ẹkpep mmọ ndibuana ke kpukpru ikpehe utom an̄wautom? Ndi ẹmemen utịtmbuba edina baptism ye edidụk utom uyọhọ ẹnịm mmọ ke iso? Ndi ẹmen̄wam mmọ ẹdụk nsan̄a ye mme ọkwọrọ eti mbụk oro ẹkopde idatesịt, emi ẹdisịnde udọn̄ ẹnọ mmọ?—N̄ke 13:20.
4. Didie ke nditọ ẹdibọ ufọn edieke mme ete ye eka ẹtọn̄ọde ndikpep mmọ ndidi mme ọkwọrọikọ ke ini mmọ ẹdide n̄kpri?
4 Andiwet psalm ọkọdọhọ ete: “O Abasi, afo emekpep mi toto ke uyen mi, ndien tutu esịm emi ami ke mbụk mme utịbe utom fo.” (Ps. 71:17) Ẹtọn̄ọ ke ini nditọ mbufo ẹdide n̄kpri ndikpep mmọ ndidi mme ọkwọrọikọ. Ke akpanikọ, itiat idakisọn̄ eke spirit oro mbufo ẹn̄wamde mmọ ẹsịn do eyenyene ufọn ọnọ mmọ ke ini mmọ ẹkabarede ikpọ owo!—N̄ke 22:6.