Ibọrọ Oro Aduaide Owo Idem!
1 Mme ubon Christian ke kpukpru itie ẹwụt ufiop ufiop esịtekọm ẹban̄a vidio oro Young People Ask—How Can I Make Real Friends? Ete kiet ke United States ọkọdọhọ ete ke mmọ ẹma ẹkese vidio emi ẹma, nditọiren imọ ẹma ẹsụhọde ẹtetie sụn̄-n̄—kpukpru n̄kpọ ke vidio emi ama an̄wan̄a mmọ! Ntọt kiet otode Malawi ọdọhọ ete ke enye an̄wan̄a n̄kparawa iren ye iban do n̄ko koro mmọ ẹsobode ukem mfịghe emi ẹto ubọkn̄ka mmọ ke ufọkn̄wed. Ete kiet ke Germany ama etịn̄ aban̄a vidio emi ete: “Ami nda enye nte ibọrọ akam mi.” Uyen kiet ọkọdọhọ ete: “Ẹsọsọn̄ọ ke nditi mi nte ke Jehovah ke ekere aban̄a mi.” Ebiowo kiet ke New Zealand ọkọtọt ete: “Enye ama an̄wam kiet ke otu n̄kpri nditọ nnyịn ndifiak ndụk usụn̄ oro adade esịm uwem.” Akwa owo kiet oro edide ọdọ ndọ ama ese enye onyụn̄ ọdọhọ ete: “Ubaha-e nte kpukpru n̄kparawa owo emi ẹdude ke akpanikọ ẹkpekemede ndise vidio emi man enye onụk mmọ ndinam akpanikọ edi ekemmọ!” Mme ubon, ntak emi mbufo mîfiakke ise enye? Ke ini ẹsede ẹma, ẹneme mme mbụme oro ẹtienede mi ọtọkiet.
2 Ntọn̄ọikọ: Anie edi ufan akpanikọ?—N̄ke 18:24.
3 Mme N̄kpọ Ẹsibiọn̄ọde Itie Ufan: Didie ke afo ekeme ndikan ekikere oro nte ke mme owo ẹsịn fi? (Phil. 2:4) Ntak anade afo enyịme ndikpụhọde edu fo, ndien anie ekeme ndin̄wam fi anam oro? Nso idiberede mme ifet inọ edinyene ufan efen efen, ndien ke m̀mọ̀n̄ ke ẹkeme ndikụt mmọ?—2 Cor. 6:13, NW.
4 Itie Ufan ye Abasi: Didie ke afo ekeme ndikọri itie ebuana ye Jehovah, ndien ntak emi ukeme oro esịnde odotde? (Ps. 34:8) Anie enen̄ede ekeme ndisọn̄ọ itie ufan fo ye Abasi?
5 Ndiọi Ufan: Mmanie ẹdi ndiọi nsan̄a? (1 Cor. 15:33) Didie ke ndiọi ufan ẹkeme ndibiat idaha eke spirit owo? Nso ke mbụk Bible aban̄ade Dinah ekpep fi?—Gen. 34:1, 2, 7, 19.
6 Drama Eyomfịn: Ndidu ikpọn̄ okotụk Tara didie? Didie ke enye okowụt ke idiọkke ndidụk nsan̄a ye mme uyen ererimbot? Mme n̄kpọndịk ewe ke mmọ ẹkenam enye osobo? Ntak emi ete ye eka esie mîkekwe itiendịk oro enye okodude, edi ye nso edu ke mmọ ẹkeda ẹn̄wam enye ndifiak nsọn̄ idem ke n̄kan̄ eke spirit? Didie ke eyenete an̄wan oro ekedide asiakusụn̄ okowụt ke idi ata ufan Tara? Ntak anade mme Christian ẹnam se ẹtịn̄de ke Mme N̄ke 13:20 ye Jeremiah 17:9? Nso akpan ukpepn̄kpọ ke Tara ekekpep?
7 Utịtikọ: Mme ukpepn̄kpọ ewe ke afo ekpep oto vidio emi? Didie ke afo ekeme ndida enye n̄n̄wam mbon efen?—Ps. 71:17.