Obufa Ndutịm Usen Akpan Mbono
1 Ke adan̄aemi ndutịm usuanetop ye mme andikpep ke ererimbot ẹsịnde udọn̄ ẹnọ inyene obụkidem, Ikọ Abasi esịn udọn̄ ọnọ nnyịn ete: “Ẹnam Nti Utom Uwak Uwak.” (1 Tim. 6:18) Oro edi ibuotikọ ndutịm usen akpan mbono emi editọn̄ọde ke March 2003. Nso nsịnudọn̄ ke nnyịn idibọ ke mbono emi?
2 Esenyịn circuit eyetịn̄ se ibuotikọ oro “Nyene Inyene ke N̄kan̄ Abasi” ọwọrọde, ndien enye ayanam ndụn̄ọde ye ndusụk owo oro ẹsịnde idem man ẹnyene inyene ke n̄kan̄ eke spirit. Ke akpa utịn̄ikọ esie ke usen oro, etịn̄ikọ oro otode-to edi oyowụt nte ikọt Abasi ẹnamde “Nti Utom ke Ini Idọk Emi.” Ẹyesịn udọn̄ ẹnọ nnyịn owo kiet kiet ndikere nte nnyịn ikemede ndibuana ọyọhọ ọyọhọ ke utom idọk emi Abasi owụkde ete ẹnam mfịn.
3 Nnyịn isikop idatesịt didie ntem ke ini ikụtde mme uyen Christian ẹbịnede mme inyene eke spirit! Emi ọnọ Jehovah ubọn̄ onyụn̄ an̄wam mme uyen ndisịn eti itiat idakisọn̄ nnọ mme ifetutom ke ini iso. Ikpehe oro “Ẹtoro Mme Uyen Kaban̄a Nti Utom eke Editoro Jehovah” oyowụt nti utom oro mme uyen Christian ke n̄kann̄kụk ẹnamde.
4 Nso idi mme utịp edinam nti utom? Etịn̄ikọ oro otode-to edi eyeneme emi ke akpatre utịn̄ikọ esie oro, “Ẹka Iso Ẹnam Nti Utom Ẹnyụn̄ Ẹbọ Mme Edidiọn̄ Jehovah.” Enye eyeneme ikpehe inan̄ oro ikemede ndibọ uwak edidiọn̄: (1) nte owo kiet kiet, (2) nte mme ubon, (3) nte esop, ye (4) nte esop ofụri ererimbot.
5 Mbon oro ẹma ẹkeyak idem mmọ ẹnọ Jehovah ẹyenyene ifet ndina baptism. Edieke edide afo emeben̄e idem ndinam oro, sọsọp nam esenyịn oro etiede ibuot ọfiọk aban̄a.
6 Ke ini ẹtọtde usen mbono mbufo, sọsọp nam ndutịm man okpodụk. Domo ndisịm ke ini man abuana ke ikwọ ye akam ediberede. Ndidu nnyụn̄ n̄kpan̄ utọn̄ ke ofụri ndutịm usen akpan mbono emi ọyọsọn̄ọ nnyịn idem ndika iso mbịne usụn̄ oro enen̄erede anam nnyịn inyene inyene ke n̄kan̄ Abasi nnyịn, kpa Jehovah.