Ndibọ Ufọn Ọyọhọ Ọyọhọ nto Mbono District “Ifịk Ifịk Mme Anditan̄a Obio Ubọn̄”
1 Ndutịm Oro Edemerede Udọn̄: Nso ndutịm oro edemerede owo udọn̄ ke nnyịn ikenyene ntem ke mbono district eke ndondo emi! Nnyịn ikosop idem ọtọkiet kaban̄a akpan uduak, man ẹnen̄ede ẹtịm nnyịn idem nditan̄a Obio Ubọn̄ Abasi ifịk ifịk. Ndi afo emeti nte akpa etịn̄ikọ akanamde ikọ oro “nditan̄a” an̄wan̄a? Ndi emeti ndụn̄ọde emi ẹkesịnde udọn̄ ẹnọ nnyịn ndinam ke utịn̄ikọ oro “Ẹkûfehe Ndịk Sia Ẹfiọkde Ẹte ke Jehovah Odu ye Nnyịn”? Ewe ata mbụk eyouwem ke afo odụn̄ọde kan̄a?
2 Nneme oro “Nsio Nsio Idomo Ẹdomo Uduot Mbuọtidem Nnyịn” ama ọnọ akpan ntak ita oro Jehovah ayakde ukọbọ odu. Nte afo emekeme ndisiak mmọ? Nso idi isọn̄ N̄wed Abasi kaban̄a edida san̄asan̄a Christian nnyịn? Nso ke ẹkesịn udọn̄ ẹnọ nnyịn ndinam ke ndiben̄e idem nnọ mme n̄kpọ-ata eke edida san̄asan̄a nnyịn? Didie ke nnyịn ndisọn̄ọ nda nyọ idomo ada itoro ọsọk Jehovah?
3 Mme ikpehe edinam ewe ke drama oro “Sọn̄ọ Da Ke Ini Afanikọn̄” ẹkesọn̄ọ fi idem? Didie ke nnyịn ikeme ndibiet Jeremiah?
4 Utịn̄ikọ an̄wa oro, “Ido Ererimbot Emi ke Ebebe Efep” eketịn̄ aban̄a ikpọ ukpụhọde ewe emi ẹdide ke iso, ẹdinyụn̄ ẹdade ẹkesịm enyene-ndịk usen Abasi? Ke adan̄aemi akakpan̄de utọn̄ ọnọ akpatre utịn̄ikọ oro, “Ẹyọhọ ye Nti Utom nte Ifịk Ifịk Mme Anditan̄a Obio Ubọn̄,” didie ke afo akabuan se ẹkenemede ye ọkpọkpọ utom ukwọrọikọ fo?
5 Mme Akpan N̄kpọ Ndida Nsịn ke Edinam: Nte ẹkenamde an̄wan̄a ke utịn̄ikọ oro, “Ẹwụt Esịtekọm,” didie ke nnyịn ikeme ndiwụt ntotụn̄ọ esịtekọm nnọ Jehovah? Ke utịn̄ikọ ibuotikọ mbono oro, “Mme Anditan̄a Obio Ubọn̄ Ẹnen̄ede Ẹnyene Ifịk,” ẹkesịn udọn̄ ẹnọ nnyịn ndikpebe ifịk mmanie? Nso ndụn̄ọde ke ẹkedọhọ owo nnyịn kiet kiet anam?
6 Nneme oro “Ntịn̄nnịm Ikọ Micah Ọsọn̄ọ Nnyịn Idem Ndisan̄a ke Enyịn̄ Jehovah” okosio nso n̄kpọ ita owụt oro anade nnyịn isịm man inyene unyịme Jehovah? Nte ẹkeme ndisịm mmọ? (Mic. 6:8) Nte ekemde ye utịn̄ikọ oro “Mụm Edisana Ido Kama ebe ke Ndikpeme Esịt Fo,” ke mme usụn̄ ewe ke ana nnyịn isana ke ido uwem? Ke mme usụn̄ ewe ke utịn̄ikọ oro, “Kpeme Idem ke Abian̄a” okodụri nnyịn utọn̄ mbak ẹdibian̄a nnyịn, nnyịn ikûnyụn̄ ibian̄a mbon efen?
7 Mme akpan n̄kpọ ewe oro ẹnyenede ufọn ke utịn̄ikọ oro, “Mme Anditan̄a Obio Ubọn̄ Oro Ẹsọn̄ọde Ẹkpono Itieutom Mmọ” ke afo ọtọn̄ọ ndida nnam n̄kpọ ke utom ukwọrọikọ fo? Ẹma ẹdụn̄ọde Philippi 4:8 ke utịn̄ikọ oro, “Nneme eke Spirit Ọbọbọp.” Didie ke itie N̄wed Abasi oro an̄wam nnyịn ndinam nneme nnyịn esịne mme n̄kpọ eke spirit, ndien ini ewe ke ikpanam oro?
8 Utịn̄ikọ oro “Buọt Idem Ofụri Ofụri ke Jehovah ke Mme Ini Afanikọn̄” ama etịn̄ nte nnyịn ikemede ndiyọ mme n̄kpọ mmọn̄eyet, unana okụk, unana nsọn̄idem, mme mfịna ubon, ye uyịre uyịre mmemidem. Didie ke nnyịn ikeme ndiwụt mbuọtidem ke Jehovah ke ini isobode utọ mme idaha emi?
9 Mbufa N̄kpọuto eke Spirit: Nnyịn ima inem esịt ndikop edisio obufa n̄wed oro Tuak Ibuot nọ Ata Abasi Kierakiet. Didie ke ntọt oro akanamde uduak n̄wed oro an̄wan̄a okotụk fi? Ntak emi enye edinyenede ufọn ke utom edinam mbet nnyịn nte udiana n̄wed ukpepn̄kpọ?
10 Ekem nnyịn ima ikop edisio ediye n̄wed oro San̄a Kpere Jehovah. Nso idi ndusụk n̄wọrọnda ikpehe esie? Mmanie ẹdikeme ndibọ ufọn nto enye?
11 Mbono District “Ifịk Ifịk Mme Anditan̄a Obio Ubọn̄” ama ọnọ nnyịn nsịnudọn̄ eke spirit emi iyomde man iyọ n̄kpọsọn̄ ini emi. Man ibọ ufọn ọyọhọ ọyọhọ ito n̄wọrọnda ndutịm eke spirit emi, nnyịn ikpakam isịn ofụri ukeme nnyịn nditi se ẹketịn̄de, iwụt esịtekọm iban̄a se ikọbọde, inyụn̄ ida se ikekpepde isịn ke edinam. (2 Pet. 3:14) Ndinam ntre ọyọsọn̄ọ nnyịn idem ndimụm nsọn̄ọnda nnyịn n̄kama nnyụn̄ ndi ifịk ifịk mme anditan̄a Obio Ubọn̄ ke ndikpebe Ọbọn̄ nnyịn Jesus Christ, nnọ Jehovah ubọn̄.—Phil. 1:9-11.