Di Uwụtn̄kpọ Nti Utom
1. Ntak emi oyomde nnyịn inen̄ede inọ ntịn̄enyịn ke edu uwem nnyịn ke mbono district?
1 Ke ini nnyịn isopde idem ke akwa otu ke mme mbono district, mbon oro mîdịghe Mme Ntiense ẹsinen̄ede ẹkụt usụn̄ uwem nnyịn ye nte nnyịn inamde n̄kpọ ye mbon en̄wen. Mmọdo, oyom owo nnyịn kiet kiet ọnọ akpan ntịn̄enyịn ke item Bible emi: “Ẹnyene eti ibuot: ke kpukpru usụn̄ kama idem fo ke iso mmọ nte uwụt-n̄kpọ eti utom.” (Titus 2:6, 7) Ekeme ndiyom san̄asan̄a ukeme ‘mbak nnyịn idise n̄kpọ eke idem nnyịn kpọt, edi ikam ise n̄kpọ owo en̄wen.’ (Phil. 2:4) Ẹyak nnyịn ikere iban̄a ndusụk usụn̄ oro nnyịn ikemede ndida nsịnudọn̄ emi nsịn ke edinam ke Mbono District “Ẹnọ Abasi Ubọn̄” oro edide.
2. Nso ke nnyịn ikpeti ke ebuana ye ndutịm ufọkidụn̄?
2 Ndutịm Ufọkidụn̄: Edi akpan n̄kpọ kpukpru nnyịn ndibere ye mme ndutịm mbono. Ẹyom emi akpan akpan ke ini inamde ndutịm itieidụn̄ nnyịn. Ẹnen̄ede ẹyom ediwak ufọkidụn̄ ke mbono kiet kiet. Ata ediwak nditọete nnyịn inyeneke ediwak okụk ndien ke ntre ẹyom mme ufọkidụn̄ emi mîsọn̄ke urua. Ẹsịn akamba ukeme ndiyom mme ufọkidụn̄ oro ẹmemde urua ẹkan. Nnyịn inyene ndiwụt ima ima edikere mban̄a nnọ mme udọn̄ mbon en̄wen inyụn̄ itre ‘ndise n̄kpọ eke nnyịn, edi ikam ise n̄kpọ mbon en̄wen.’—Phil. 2:4.
3. Didie ke nnyịn ikeme ‘ndifọn ido ye kpukpru owo’ ke ufọkidụn̄?
3 Edieke edide ididụn̄ ke ufọkisen, ọkpọkpọ udọn̄ oro nnyịn inyenede ke idem mbon en̄wen ekpenyene ndiwụt idem ke nte nnyịn idade ufọkisen inam n̄kpọ. Ẹsiwụt esịtekọm ke ini iwụtde mbon en̄wen edikere mban̄a ebe ke nditiene mbet ufọkisen ketket. Ke mme usụn̄ emi “nnyịn ifọn ido ye kpukpru owo” ndien ke ntem inọ mbon en̄wen eti ikọ ntiense.—Gal. 6:10.
4, 5. Didie ke nditọwọn̄ ẹkeme ndida itoro nsọk Jehovah, ndien nso mbiomo ke mme ete ye eka ẹnyene?
4 Mme Ete ye Eka ye Nditọ: Ke ererimbot emi akpakịp nditọwọn̄ mînyeneke ido mi, nditọ nnyịn ẹsiwọrọ ẹda san̄asan̄a, ndien emi esida itoro ọsọk Jehovah ye esop esie. Nte ededi, ndusụk ini mfịna esidu ke ini owo mîsehe nditọwọn̄ enyịn nte odotde. (N̄ke 29:15) Mme ete ye eka ikpenyeneke ndidaha n̄kpọn̄ nditọ mmọ ye unana ukpeme ke ufọkidụn̄ m̀mê ke itiembono.
5 Mbemiso ẹkade mbono, ndusụk ete ye eka ẹsikụt ke ọfọn ndineme ye nditọ mmimọ orụk edu uwem oro ẹyomde ẹto mmọ. (Eph. 6:4) Mmọ ẹsin̄wam nditọ ẹfiọk ẹte ke ata ima Christian “inamke ido eke mîdotke” inyụn̄ “iyomke ufọn esiemmọ.” (1 Cor. 13:5) Mbono District edi ini oro ẹsiode ẹnịm man Jehovah ekpep nnyịn n̄kpọ, ndien nditọwọn̄ ọkọrọ ye ikpọ owo ẹkeme ndiwụt ukpono nnọ ndutịm emi ebe ke edu uwem mmọ ke itiembono ye ke ebiet en̄wen.—Isa. 54:13.
6. Nso utịp ke edu uwem nnyịn ekeme ndinyene ke idem mbon en̄wen?
6 Eti edu uwem nnyịn ekeme ndinam ekese ndibiat ukwan̄ ekikere oro ẹnyenede ẹban̄a nnyịn onyụn̄ odụri mme owo ẹdi utuakibuot akpanikọ. (Matt. 5:16; 1 Pet. 2:12) Kpukpru mbon oro nnyịn isobode ke mbono district nnyịn ẹkpekam ẹbọ eti ikọ ntiense ebe ke edinam nnyịn ye ke usụn̄ nte nnyịn inamde n̄kpọ ye mmọ. Ntem ke nnyịn idiwụt idem nnyịn nte “uwụt-n̄kpọ eti utom” inyụn̄ inọ Jehovah ubọn̄.—Titus 2:7.
[Ekebe ke page 4]
Kere Ban̄a Mbon En̄wen
▪ Mụm mme ubet oro afo oyomde ndidụn̄ kpọt nịm
▪ Nyene ime ke ini edidụk ye ediwọrọ
▪ Kûnam n̄kpọ ke ufọkidụn̄ m̀mê ufọkisen nte mîdotke
▪ Tiene mbet ufọkisen ketket
▪ Se nditọ fo enyịn nte odotde