Ẹsana ke Ofụri Edu Uwem Mbufo
1. Ntak edide akpan n̄kpọ ndisana ke ofụri edu uwem nnyịn?
1 Nte mme asan̄autom edisana Abasi, Jehovah, nnyịn imodomo ndisana ke ofụri edu uwem nnyịn. (1 Pet. 1:15, 16) Emi ọwọrọ ke nnyịn imesịn ukeme ndisọn̄ọ mmụm mme idaha Jehovah n̄kama ke kpukpru ikpehe uwem nnyịn. Mbono district eke isua emi ọyọnọ nnyịn ata eti ifet ndisana ke edu uwem.
2. Didie ke nnyịn ikeme ndiwụt nti edu uwem ke ufọkidụn̄ ye ke ufọkisen?
2 Ke Ufọkidụn̄ ye Ufọkisen: Etubom ufọkisen kiet emi mme andidụk mbono ẹkedụn̄de isua oko ọkọdọhọ ete: “Ima inen̄ede ikop inemesịt Mme Ntiense Jehovah ndidụn̄ mi. . . . Mbufo ntem ke nnyịn iyom.” Ndinam mme n̄kpọ editi oro ẹtienede mi ẹyen̄wam nnyịn ndimụm eti enyịn̄ nnyịn n̄kama: (1) Edieke ẹdụn̄de ke ufọkisen, ẹkûbọ ubet awak akan se mbufo ẹyomde ndidụn̄, ẹkûnyụn̄ ẹwak ke ubet ẹkan ibat owo oro ẹnyịmede. (2) Edieke mûyomke ndidụn̄ aba ke ubet oro ẹkebọde, ẹsọsọp ẹsian ufọkisen oro. (3) Ẹkûtem udia ke ubet emi owo mînyịmeke ẹtem udia. (4) Ẹsion̄o mbun̄wụm spirit ke nte ẹnamde n̄kpọ ye mbon utom ufọkisen oro, akpan akpan ke ini ediwak owo ẹdụkde-dụk ẹnyụn̄ ẹwọrọde-wọrọ.—Gal. 5:22, 23.
3. Didie ke edu uwem mme uyen Ntiense ẹkeme nditụk mbon efen?
3 Nti edu uwem nnyịn ẹkeme ndinọ okopodudu ikọ ntiense. Isua oko, uyen Ntiense kiet ama ọdọhọ ewetn̄wed ufọkisen kiet ukpono ukpono ete ọnọ imọ n̄kpọ uwetn̄kpọ ekem ọkọm enye. Emi ama otụk ewetn̄wed oro, ndien ẹma ẹkop enye ọdọhọde ete: “Ukemeke ndikụt mme uyen ẹnyenede nti ido ntem aba.” Nte ededi, ke ndusụk idaha, ẹsikụt nditọ oro owo mîkpemeke nte ẹkade ẹkewọk ẹwọk, ẹbrede mbre ke udịghi ukot ufọkenyọn̄, ẹfioride n̄kpo, ẹnyụn̄ ẹfen̄ede ke usụn̄otop. Mme ete ye eka ikpayakke nditọ mmọ ẹnam se ẹmama edi ẹkpenyene ndikpeme mmọ man ẹkụt ke edu uwem mmọ ada itoro ọsọk Jehovah.—N̄ke 29:15.
4. Mmanie ẹkpenyene ndidụn̄ ke dọmitri?
4 Ufọkidụn̄ esidu ke ediwak itie mbono, edide ufọk ibio ini m̀mê dọmitri oro ẹbọpde kaban̄a uduak oro. Mbọk ẹfiọk ẹte ke esop Abasi idikemeke ndibọp dọmitri nnọ kpukpru mme andidụk mbono. Mbon oro Itieutom Unọ Ufọkidụn̄ ẹnọde unyịme kpọt ẹdidụn̄ ke ufọkidụn̄ emi. Edieke ẹnọde fi ufọkidụn̄ ke ebiet efen, afo ekpenyene ndidiana ye Itieutom Unọ Ufọkidụn̄ onyụn̄ odu ke ufọkidụn̄ fo.
5. Didie ke nnyịn ikeme ndikere mban̄a mbon efen ke ini idiade udia?
5 Ke Itie Unyamudia: Anyamudia kiet ke itie udia emi ekperede ufọkmbono kiet ọkọdọhọ ete: “Mme Ntiense ẹdi ata isio. Mmọ ẹsikpono mbon efen.” Nti edu uwem esịne nditre nditịn̄ ikọ nnyụn̄ nsak imam uyo ọsọn̄ tutu afịna mbon efen emi ẹdiade udia. Idem ke ini idiade inyụn̄ in̄wọn̄de n̄kpọ, nnyịn iyom ndinam kpukpru n̄kpọ nnọ Abasi ubọn̄.—1 Cor. 10:31.
6, 7. Nti edu uwem ke itie mbono abuana nso?
6 Ke Itie Mbono: Ẹkpenyene ndinen̄ede n̄kụt nti edu uwem nnyịn ke itie mbono. Mbọk ẹtiene ndausụn̄ mme adaidaha, ke itie ubon n̄kpọisan̄ ye ke efe mbono. (Heb. 13:17) Mme ubon ẹkpenyene nditie ọtọkiet utu ke ndiyak nditọ mmọ, esịnede mme uyen, ẹka ẹketie ke otu n̄kpri owo eken. Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itie mbono ndien ẹkeme ndida enye nnam n̄kpọ n̄kukụre ke usụn̄ oro mîdifịnake mbon efen. Edieke ẹyomde ndisio ndise, ẹkûkama emịnen̄-mịnen̄ ukwak usio ndise ke ini edinam osụk akade iso. Ẹkpenyene nditie ke itie mbufo nsio ndise ke ini edinam osụk akade iso man ẹfep ndiwọn̄ọde ntịn̄enyịn otuowo. Ẹkûkot mme osio ndise ẹdụk ẹdi an̄wa mbono ẹdisio ndise. Ana ẹsụhọde uyo urụk ukopikọ oro ẹkamade-kama ẹsan̄a ye ekpri ukwak ubọ etop mbak ẹditịmede mbon en̄wen. Edieke afo okụtde mbabuat n̄kpọntịbe ke an̄wa mbono, mbọk sian adaidaha mîdịghe sian Itieutom Akpa Usọbọ. Mbon oro ẹdotde ndinọ un̄wam ibọkusọbọ ẹdu do.
7 Ke ini edem, ndusụk owo ẹsinyan̄a mbufa n̄wed oro ẹsiode. Owo ikpenyeneke ndifefehe, m̀mê ndinụk owo ke ntak mbufa n̄wed oro ẹsiode. Ẹda ke udịm ke ido nte eyede. Ẹnam ndutịm ndikụt nte ke mme andidụk mbono ẹbọ mbufa n̄wed oro ẹsiode.—1 Cor. 14:40.
8. Didie ke edu uwem nnyịn ke itie mbono ada itoro ọsọk Abasi?
8 Edu uwem nnyịn anam nnyịn ikpụhọde ikpọn̄ mbon efen onyụn̄ ada itoro ọsọk Abasi nnyịn. (1 Pet. 2:12) Ke itie mbono, ẹyekụt edu uwem Mme Ntiense Jehovah. Ke ntre, ẹbiere ndisana ke kpukpru edu uwem mbufo.
[Ekebe ke page 5]
Ẹwụt Edisana Edu Uwem
◼ Ẹnịm kpukpru mbet ufọkisen
◼ Ẹnen̄ede ẹkpeme nditọ
◼ Ẹkere ẹban̄a mbon efen
◼ Ẹkûdan̄ ke dọmitri edieke ẹnọde fi ufọkidụn̄ ke ebiet efen
◼ Ke ini ẹkade ndibọ mbufa n̄wed oro ẹsion̄ode, ẹsan̄a sụn̄sụn̄