Utom Oro Abasi Ọnọde Ibetedem
1 Ke otu mme asan̄autom Abasi mfịn, ibat ibat owo ẹnen̄ede ẹka n̄wed, ẹforo, m̀mê ẹdi mme ọwọrọiso ke editịm n̄kpọ emi. Ke ntak oro, ndusụk owo isibatke utom ukwọrọikọ nnyịn ke n̄kpọ. (Isa. 53:3) Nte ededi, utom unọ ukpep Bible oro nnyịn inamde ọmọnọ ediwak miliọn owo ke ofụri ererimbot ndọn̄esịt ye idotenyịn. Mme usụhọde owo ẹsan̄a didie ẹnyene utọ n̄wọrọnda utịp oro? Edi n̄kukụre sia Abasi ọnọde mmọ ibetedem. (Matt. 28:19, 20; Utom 1:8) Apostle Paul ama anam an̄wan̄a ete: “Abasi okonyụn̄ emek n̄kpọ eke ẹdide mmeme ke ererimbot man Enye esuene n̄kpọsọn̄ n̄kpọ.”—1 Cor. 1:26-29.
2 Ediwak ke otu mme apostle ye mme Christian akpa isua ikie ẹkedi “mbon emi mîkekpepke n̄wed, ẹnyụn̄ ẹdide ndisịme ke ifiọk n̄wed.” (Utom 4:13) Kpa ye oro, mmọ ẹma ẹnam utom edikwọrọ eti mbụk oro ẹkedọn̄de mmọ uko uko, ndien Jehovah ama ọdiọn̄ ukeme mmọ. Kpa ye ukọbọ m̀mê ubiọn̄ọ, ‘ikọ Ọbọn̄ ama ọkọri ọkpọsọn̄, onyụn̄ akara.’ N̄kpọ ndomokiet ikekemeke nditre utom oro sia Abasi ọkọnọde enye ibetedem. (Utom 5:38, 39; 19:20) Ntre n̄ko ke edi mfịn. Idem ọkpọsọn̄ ubiọn̄ọ otode mme okopodudu andikara ikemeke ndikpan eti mbụk ndikọri ọkpọsọn̄ nnyụn̄ n̄kara.—Isa. 54:17.
3 Abasi Enyene Kpukpru Itoro: Nte eti idaha oro inyenede nte mme asan̄autom Abasi ọnọ nnyịn ntak ndibụre mbụre mban̄a idem nnyịn? N̄wan̄ansa-o. Ke etịn̄de aban̄a utom ukwọrọikọ Christian, Paul ekewet ete: “Edi nnyịn ikama ọsọn̄-urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.” (2 Cor. 4:7) Paul ama ọfiọk ete ke odudu Abasi kpọt akan̄wam imọ ndinam utom ukwọrọikọ.—Eph. 6:19, 20; Phil. 4:13.
4 Ukem ntre, nnyịn imọfiọk ke inam utom ukwọrọikọ sia ‘inyenede edinyan̄a ke ubọk Abasi.’ (Utom 26:22) Ebede ke ndinọ utọ ntọt ofụri ererimbot oro, Jehovah ke ada nnyịn enyen̄e mme idụt ke n̄wọrọnda usụn̄—kpa idiọn̄ọ ubiereikpe nsobo oro edidide ke mîbịghike. (Hag. 2:7) Nso akwa ifet ke nnyịn inyene ntem ‘ndisan̄a ikpat kiet ndi mme anam-utom Abasi’ ke akwa idọk eke spirit emi!—1 Cor. 3:6-9.