Nyene Usọ ke Ndikọk Ibuot ye Mbon En̄wen
1. Ewe mbụk Bible ke nnyịn ididụn̄ọde, ndien ntak-a?
1 Nte ẹwetde ke Utom 13:16-41, utịn̄ikọ apostle Paul ke synagogue Antioch emi odude ke Pisidia, ọnọ eti uwụtn̄kpọ ke nte ẹkemede ndikọk ibuot ye mbon en̄wen. Paul ama ekere aban̄a idaha ye nte mbon oro ẹkekpan̄de utọn̄ ẹnọ enye ẹsikerede n̄kpọ onyụn̄ okpụhọde usụn̄ ukwọrọikọ esie man ekekem ye mmọ. Nte nnyịn idun̄ọrede mbụk emi, ẹyak nnyịn ikere nte ikemede ndinam ukem oro ke utom ukwọrọikọ nnyịn.
2. Nso ke nnyịn ikpep ito usụn̄ oro Paul ọkọtọn̄ọde utịn̄ikọ esie?
2 Yom Se Mbufo Mbiba Ẹnyịmede: Okposụkedi ukwọrọikọ Paul ekenen̄erede ọkọn̄ọ ke akpan udeme oro Jesus enyenede ke edisu uduak Abasi, Paul ikadaha oro itọn̄ọ utịn̄ikọ esie. Utu ke oro, enye eketịn̄ aban̄a n̄kpọ oro enye ye otuowo esie emi n̄wakn̄kan ẹkedide mme Jew ẹnyịmede, kpa mbụk mme Jew. (Utom 13:16-22) Kpasụk ntre, mbon en̄wen ẹyenen̄ede ẹkpan̄ utọn̄ ẹnọ nnyịn edieke iyomde n̄kpọ oro nnyịn ye mmọ inyịmede. Emi ekeme ndiyom nnyịn ida mbufiọk ibụp mme mbụme oro ẹdinamde mmọ ẹtịn̄ se mmọ ẹkerede ndien inen̄ede ikpan̄ utọn̄ man ikeme ndidiọn̄ọ se idide ata akpan n̄kpọ inọ mmọ.
3. Ntak ọkọsọn̄de mme andikpan̄ utọn̄ nnọ Paul ndinyịme nte ke Jesus ekedi Messiah oro ẹken̄wọn̄ọde?
3 Ke ndineme mban̄a mbụk mme Jew, Paul ama eti mme andikpan̄ utọn̄ nnọ enye ke Abasi ama ọn̄wọn̄ọ ndinọ Andinyan̄a emi editode ubon David. Nte ededi, ediwak mme Jew ẹkebet okop-odudu owoekọn̄ emi edisiode mmimọ ifep ke ukara mbon Rome onyụn̄ emenede idụt mme Jew okon̄ akan kpukpru idụt eken. Ke akpanikọ, mmọ ẹma ẹfiọk ke mme adaiso ido ukpono mme Jew emi ẹdude ke Jerusalem ẹma ẹsịn Jesus, ẹyak enye ẹnọ mbon ukara Rome, ẹnyụn̄ ẹwot enye. Didie ke Paul edikeme ndinam mmọ ẹnịm ke Jesus ekedi Messiah oro ẹken̄wọn̄ọde?
4. Didie ke Paul akada usọ ọkọk ibuot ye otuowo esie emi ẹkedide mme Jew?
4 Kpụhọde Usụn̄ Nneme Fo: Paul ama ada N̄wed Abasi ọkọk ibuot ye mme andikpan̄ utọn̄ nnọ enye aban̄a se mmọ ẹma ẹkefọfiọk koro enye ama ọdiọn̄ọ se mmọ ẹkekerede. Ke uwụtn̄kpọ, enye ama etịn̄ aban̄a Jesus nte eyen David ye nte Enye emi John Andinịm Owo Baptism, emi ediwak owo ẹkedade nte prọfet Abasi, akanamde ẹdiọn̄ọ. (Utom 13:23-25) Paul ama owụt ke mme ada iso ido ukpono mme Jew “ẹkenam mme n̄kpọ emi mme Prọfet ẹketịn̄de ẹsu,” sia mmọ ẹkesịnde Jesus ẹnyụn̄ ẹbiomde enye ikpe n̄kpa. (Utom 13:26-28) Ke adianade do, enye ama anam an̄wan̄a ke mme owo ẹma ẹkụt ke Jesus ama eset ke n̄kpa, onyụn̄ odụri ntịn̄enyịn owụt mme itie N̄wed Abasi oro mmọ ẹkediọn̄ọde, emi ẹkesude ke ini Jesus ekesetde.—Utom 13:29-37.
5. (a) Didie ke Paul okokpụhọde usụn̄ nneme esie ke ini enye eketịn̄de ikọ ye mbon Greek? (b) Didie ke nnyịn ikeme ndikpebe uwụtn̄kpọ Paul ke ini inọde ikọ ntiense ke efakutom nnyịn?
5 Ke n̄kan̄ eken, ke ini enye eketịn̄de ikọ ye mbon Greek emi ẹkedude ke Areopagus ke Athens, Paul ama okpụhọde usụn̄ nneme esie. (Utom 17:22-31) Edi enye ekeneme ukem etop, ndien ukeme esie ama enyene nti utịp ke mme idaha mbiba emi. (Utom 13:42, 43; 17:34) Kpasụk ntre mfịn, nnyịn iyenyene uforo ke utom ukwọrọikọ nnyịn edieke inemede n̄kpọ oro nnyịn ye mme andikpan̄ utọn̄ nnọ nnyịn ẹnyịmede, inyụn̄ ikpụhọde usụn̄ nneme nnyịn ekekem ye idaha ye usụn̄ oro mmọ ẹsikerede n̄kpọ.