Ukpepn̄kpọ Oro Adade Esịm Uwem
1 Ọfọn didie ntem ndikụt nte enyịn an̄wan̄ade mme owo ke ini mmọ ẹdiọn̄ọde akpanikọ otode Ikọ Abasi! Ndinam mbon en̄wen ẹnyene ifiọk Abasi ẹnyụn̄ ẹfiọk uduak esie kaban̄a ubonowo enen̄ede ọnọ uyụhọ. Utọ ukpepn̄kpọ emi ekeme ndida owo nsịm nsinsi uwem.—John 17:3.
2 Ntak Ọfọnde Akan: Mfịn, ẹnọ ukpep ke kpukpru usụn̄ oro ẹkemede ye ke kpukpru ibuot nneme oro owo ekemede ndikere mban̄a. (Eccl. 12:12) Edi owo ikemeke ndimen utọ ifiọk emi ndomo ye ufọn oro mme “ikpọ n̄kpọ Abasi” ẹdade ẹdi. (Utom 2:11) Ndi ukpep oro ẹnọde ke ererimbot ekeme ndidụri ubonowo n̄kpere Andibot nnyụn̄ nnam mmọ ẹfiọk uduak esie? Ndi enye an̄wam mme owo ẹfiọk se isitịbede ke ini nnyịn ikpade m̀mê ntak emi ekese ndutụhọ ẹdude? Ndi enye ọnọ mme owo idotenyịn? Ndi enye anam ubon ọfọn akan? Baba-o. Ukpepn̄kpọ Abasi kpọt ekeme ndinọ nnyịn nnennen ibọrọ ke mme ata akpan mbụme oro ẹban̄ade uwem.
3 Ukpepn̄kpọ Abasi ọnọ n̄kpọ oro enen̄erede anana ke ererimbot mfịn—eti ido uwem. Ikọ Abasi osio usua eke orụk, usua eke ekpụk, ye ufreidụt efep ofụri ofụri ke esịt mbon oro ẹnyịmede ẹnyụn̄ ẹdade mme ukpepn̄kpọ esie ẹsịn ke edinam. (Heb. 4:12) Enye onụk mme owo ndisịn kpukpru orụk afai, onyụn̄ an̄wam mmọ “ẹmen obufa owo ẹsịne.” (Col. 3:9-11; Mic. 4:1-3) N̄ko-n̄ko, ukpepn̄kpọ Abasi ọnọ ediwak miliọn owo ukeme ndikan mme edinam ye edu oro Abasi asuade, emi ẹma ẹkenen̄ede ẹdọn̄ n̄kam ke esịt mmọ.—1 Cor. 6:9-11.
4 Ntak Edide Usọp Usọp Idahaemi: Akwa Anditeme nnyịn anam nnyịn idiọn̄ọ utọ ini emi nnyịn idude uwem mi. Ubiereikpe oro enye ekebemde iso etịn̄ aban̄a esịne ekemini ntọt oro anade ẹtan̄a ke ofụri ererimbot. (Edi. 14:6, 7) Christ ke akara ke heaven, ibịghike ẹyesobo ukara ererimbot eke nsunsu ido ukpono, ndien Obio Ubọn̄ Abasi eben̄e idem ndisobo kpukpru ukara oro ẹdude ke isọn̄ mfep. (Dan. 2:44; Edi. 11:15; 17:16) Ntre, ana mme owo ẹsọsọp ẹdiọn̄ọ Edidem Abasi emi akarade idahaemi, ẹwọn̄ọ ẹkpọn̄ Akwa Babylon, ẹnyụn̄ ẹkot enyịn̄ Jehovah ke mbuọtidem. (Ps. 2:11, 12; Rome 10:13; Edi. 18:4) Nnyịn ikpakam ibuana ọyọhọ ọyọhọ ke ndinọ mbon en̄wen ukpep oro adade esịm uwem.