Ndi Eyen Fo Ekeme Ndinam Akpan Ubiere?
1. Nso idi idaha mme uyen oro ẹdide Mme Ntiense kaban̄a iyịp? Nọ uwụtn̄kpọ.
1 Akpan ubiere kaban̄a nso? Edikịm iyịp nsịn ke idem. Nte ẹwụtde ke nsiondi Enyọn̄-Ukpeme eke June 15, 1991, ke ibuotikọ oro ọdọhọde, “Ẹsan̄a Nte Jehovah Etemede,” nditọ Mme Ntiense Jehovah ẹnyene ndisọn̄ọ nda man ẹwụt ke udọn̄ mmimọ ndinịm ibet Abasi kaban̄a iyịp edi akpan n̄kpọ ọnọ mmimọ ukem nte edide ọnọ mme ete ye eka mmimọ. Nte ekpri eyen fo ekeme ndinam utọ ubiere oro?
2. Ewe idaha oro ekemde ye ibet ke esopikpe kiet akada anam n̄kpọ ye eyenọwọn̄ oro ekesịnde edikịm iyịp nsịn ke idem, ndien nso ke ete ye eka ẹdide Christian ye n̄kpri nditọ mmọ ẹkeme ndikpep nto emi?
2 Nso ke Ibet Ọdọhọ? Ke United States, n̄kponn̄kan esopikpe oro ọdọhọde ke eyenọwọn̄ enyene unen ndisịn edikịm iyịp nsịn ke idem edi N̄kponn̄kan Esopikpe Illinois. Ke ini ẹkefiakde ẹdụn̄ọde ikpe eyenete an̄wan kiet emi edide isua 17, esopikpe oro ama owụk ete: “Edieke in̄wan̄-in̄wan̄ uyarade odude nte ke eyenọwọn̄ okpon ekem ndidiọn̄ọ mme utịp edinam esie [onyụn̄] ekeme ndibiere n̄kpọ nte akwa owo, eyenọwọn̄ emi enyene unen ndinyịme m̀mê ndisịn usọbọ.” Ke ntre, man ẹdiọn̄ọ m̀mê eyenọwọn̄ okpon ekem ndinam ubiere idemesie, mbiausọbọ m̀mê mbon ufọkibọk ẹkeme ndinam ndụn̄ọde ye eyen oro man ẹkop nte enye etịn̄de ntak oro imọ mîdibọhọ iyịp. Oyoyom eyen oro enen̄ede ọdiọn̄ọ se ibiakde enye ye mme utịp usọbọ oro enye emekde, onyụn̄ ọsọn̄ọ etịn̄ in̄wan̄-in̄wan̄ se enye enịmde ke akpanikọ aban̄a Ibet Abasi kaban̄a iyịp.
3. Mme mbụme ewe ke mme ete ye eka ẹkpenen̄ede ẹkere ẹban̄a, ndien ntak-a?
3 Nso ke Eyen Fo Ekpetịn̄? Ndi nditọ fo ẹkeme nditịn̄ se idide ibet Abasi kaban̄a iyịp? Ndi mmọ ẹnịm ke ofụri esịt ete ke Abasi ọdọhọ nnyịn, ‘ibet iyịp’? (Utom 15:29; 21:25) Ndi mmọ ẹkeme ndida N̄wed Abasi nnam se mmọ ẹnịmde ke akpanikọ an̄wan̄a? Ndi mmọ ẹkeme ndinam an̄wan̄a uko uko ntak mmọ ẹnamde utọ enyene-iwụk ubiere oro kaban̄a iyịp edieke mbiausọbọ ẹkerede ke uwem mmọ odu ke itiendịk, idem edieke mme ete ye eka mmọ mîdụhe? Sia “ini ye unọmọ ẹtịbede ẹnọ [nnyịn] kpukpru,” didie ke afo ekeme nditịm nditọ fo idem nnọ n̄kpọ-ata unana idotenyịn ekededi oro edidomode nsọn̄ọnda mmọ?—Eccl. 9:11; Eph. 6:4.
4, 5. (a) Nso mbiomo ke mme ete ye eka ẹnyene, ndien didie ke mmọ ẹkeme ndinam emi? (b) Nso idi mme n̄kpọ un̄wam oro ẹdude ẹnọ mme ete ye eka ke afan̄ emi?
4 Mme Ete ye Eka, Nso ke Mbufo Ẹkeme Ndinam? Edi mbiomo mbufo ndikpep nditọ mbufo mban̄a nte Abasi esede iyịp. (2 Tim. 3:14, 15) Ẹnen̄ede ẹnam emi an̄wan̄a ke n̄wed Reasoning, page 70-74. Nen̄ede kpep enye ye ubon fo. Da ikpehe oro “If Someone Says—” ke page 74-76 nam ndomonse ye nditọ fo man mmọ ẹfiọk ndinam se mmọ ẹnịmde ke akpanikọ ye ntak oro mmọ ẹnịmde ke akpanikọ, an̄wan̄a. (1 Pet. 3:15) Mme n̄kpọ un̄wam efen oro ẹkpepde nnyịn ẹban̄a iyịp ẹsịne ediye uduot ekpri n̄wed oro How Can Blood Save Your Life? ye Enyọn̄-Ukpeme eke June 15, 2004, page 14-24. Ke adianade do, vidio oro Transfusion-Alternative Health Care—Meeting Patient Needs and Rights ye No Blood—Medicine Meets the Challenge, emi ẹdude idahaemi ke DVD oro ẹkotde Transfusion Alternatives—Documentary Series, ẹnọ nti ntak ndinam ẹdiọn̄ọ nte owụtde eti ibuot onyụn̄ enyenede ufọn ndida ibọkusọbọ nnyụn̄ nsiak idem ye unana edida iyịp. Nte ubon fo ẹse ẹnyụn̄ ẹneme ẹban̄a vidio oro ke ndondo emi?
5 N̄wam nditọ fo ‘ẹdomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama’ kaban̄a iyịp. Do, mmọ ẹkeme ndinam akpan ubiere oro edidade edidiọn̄ Jehovah edi.—Rome 12:2.