Nso ke Afo Edida Uwem Fo Anam?
1 Ndusụk ini ẹsibụp nditọwọn̄ ẹte, “Nso ke afo akpama ndidi ke ama okpon?” Ke ini afo ekedide ekpri eyeneren, ndi ọkpọkọdọhọ ke ikpama ndidi ebre bọl? abiausọbọ? esenyịn circuit? Mîdịghe nte ekpri eyenan̄wan, ndi ọkpọkọdọhọ ke ikpama ndidi ekpepn̄wed? nurse? owo Bethel? Emi afo ama okokpon ọwọrọ owo mi, enyene mbụme efen oro anade obụp idemfo, ‘Nso ke ndida uwem mi nnam?’ Nte emeben̄e idem ndibiere?
2 Man ẹn̄wam fi anam eti ubiere, esop Jehovah ama osio DVD oro ẹkotde Young People Ask—What Will I Do With My Life? Mbọk se nyụn̄ nen̄ede kere ban̄a se idude ke vidio oro, esịnede drama, mme ndụn̄ọde, ye mme ikpehe eken. Ẹwet se isịnede ke vidio emi ke ekebe oro ẹkotde “Main Menu.”
3 Drama: Nte afo esede drama oro, kere ban̄a mme mbụme emi: (1) Mme n̄kpọ ewe ke André ada ebiet Timothy oro ẹtịn̄de ẹban̄a ke N̄wed Abasi Christian Usem Greek? (Utom 16:1; 1 Tim. 4:8; 2 Tim. 1:5) (2) Didie ke ẹkekpek André enen̄ede esịn idem ke ufehe itọk, ndien mmanie ẹkekpek enye? (3) Mmanie ẹken̄wam Timothy ye André ẹnam nti ubiere, ndien ke mme usụn̄ ewe ke mmọ ẹkenam emi? (2 Tim. 1:1-4; 3:14, 15) (4) Didie ke item oro ẹnọde ke Matthew 6:24 ye Philippi 3:8 okotụk André, ndien didie ke item emi otụk fi?
4 Ndusụk Ikpehe Edinam: Ke ama ekese drama emi ama, fiak bre mme ikpehe oro ẹtienede mi, nyụn̄ bọrọ mme mbụme emi. “Paul ye Timothy”: Nso ikedi akpatre item oro Paul ọkọnọde Timothy? (2 Tim. 4:5) “Ndida Ofụri Ukeme Fo Nnam N̄kpọ Jehovah”: Nso idi mme utịtmbuba eke spirit fo? “Ndisọn̄ọ Nda ye Jehovah”: M̀mọ̀n̄ ke ẹkeme ndinyene ata inemesịt? “Item Eka Eka”: Nso ikwan̄a ke ndiyom ndidi ọwọrọiso owo ke ererimbot Satan? (Matt. 4:9) “Ntuaha N̄kpọfiọk”: Nso ikeme ndinam fi okop uyụhọ ke uwem?—N̄ke 10:22.
5 Mme Ndụn̄ọde: Nte esede ikpehe kiet kiet oro etienede mi, nso ke afo okụt emi afo ekemede ndinam man ada ofụri ukeme fo anam n̄kpọ Jehovah? (1) “Edisịn Idem ke Ikpîkpu N̄kpọ M̀mê ke N̄kpọ Abasi?” (1 John 2:17); (2) “Ndikpep Ndikop Inem ke Utom Ukwọrọikọ Fo” (Ps. 27:14); ye (3) “Ifet Ndinam Utom.”—Matt. 6:33.
6 Ndifiak Nse Edem: Nte emekeme ndibọrọ? (1) Nso ikedi ubọkọkọ eyenete eren ye eyenete an̄wan oro, ndien ntak mmọ ẹkemekde ubọkọkọ oro? (2) Mmọ ẹkekụt unen adan̄a didie? (3) Nso ukpụhọde ke mmọ ẹkenam ke uwem mmọ? (2 Cor. 5:15) (4) Nso ubọkọkọ eke spirit ke mmọ ẹkedinam, ndien ntak emi mmọ ẹkekerede ke mmimọ ikemeke ndika iso nnam ubọkọkọ mbiba emi ini kiet? (5) Nte mmọ ẹtua n̄kpọfiọk ẹban̄a ukpụhọde oro mmọ ẹkenamde ke uwem mmọ? (6) Nso ke mmọ ẹketịn̄ emi enen̄ede anam fi ekere se akpadade uwem fo anam?
7 Mme Ndụn̄ọde Eken: Nso ke afo ekekpep ke mme ndụn̄ọde emi, oro ekemede ndinam fi enen̄ede esịn idem ke utom Jehovah? (1) “Ufọn Ukpepn̄kpọ Idemowo,” (2) “Usụn̄ Efen Oro Ẹkemede Ndikwọrọ Ikọ,” (3) “Utom Bethel,” (4) “Ufọkn̄wed Unọ Mme Asan̄autom Ukpep.”—Dụn̄ọde “Mme Ibuot Nneme Ẹban̄ade Mme Utọ Ibuotikọ Emi,” nyụn̄ nen̄ede kot enye oro amade akan.
8 Ntre, nte emebiere se edidade uwem fo anam? Paul eketeme Timothy ete: “Tie kere mme n̄kpọ emi; sịn idem ke mmọ ofụri ofụri, man kpukpru owo ẹkpekụt n̄kọri fo.” (1 Tim. 4:15) Nnyịn imesịn udọn̄ inọ fi ite anam ukem se afo okokụtde onyụn̄ okopde ke vidio emi. Ben̄e Jehovah an̄wam fi anam eti ubiere emi edinamde fi okop inemesịt ye uyụhọ ke uwem idahaemi ye ke ini iso.
[Ekebe ke page 6]
MAIN MENU
Play Drama
Scenes (11 selections)
Interviews
Play All
Sections (3 selections)
Looking Back
Supplementary Material
Supplementary Interviews
Index to Published Information on Related Subjects
Subtitles
Hearing Impaired
None
Man ekeme ndibre enye oro oyomde, fịk ebiet oro ẹwetde Next ▶, ◀ Back, ye Main Menu.