Ẹkpebe Uwụtn̄kpọ Jesus

1. Nso uwụtn̄kpọ ke Jesus ekenịm?

¹ Ke ini ibuanade ke utom edinam mbet, ana nnyịn iti ke uwụtn̄kpọ nnyịn ekeme ndinen̄ede ntụk mbon oro ẹkụtde nnyịn. Jesus akada ikọ ye uwụtn̄kpọ ekpep mme owo n̄kpọ. Mbon oro ẹkekụtde enye ẹma ẹfiọk ke enye enyene ifịk, ama mme owo, enen̄ede oyom ndinam enyịn̄ Ete esie asana, onyụn̄ ebiere ndinam uduak Ete esie.—1 Pet. 2:21.

2. Ke mme usụn̄ ewe ke uwụtn̄kpọ nnyịn ekeme nditụk mbon oro ẹsan̄ade ye nnyịn ke an̄wautom?

² Ke Ini Inamde Utom eke Ufọk ke Ufọk: Ukem nte Jesus, uwụtn̄kpọ nnyịn esitụk mbon oro ẹnamde utom ye nnyịn. Mbufa mme asuanetop ye mbon emi mîtịmke inyene mbufiọk oro ẹkụtde nte nnyịn isịnde ifịk inam utom ukwọrọikọ ẹyekere ẹban̄a orụk udeme oro mmọ ẹnyenede ke utom ukwọrọikọ. Ke ini mmọ ẹkụtde nte nnyịn ikopde idatesịt inyụn̄ inen̄erede inyene udọn̄ ke idem mbon en̄wen, oro eyeti mmọ nte ke edi akpan n̄kpọ mmimọ ndinyene ukem edu oro ke utom ukwọrọikọ. Ke ini mmọ ẹkụtde nte nnyịn itịn̄de enyịn ikot N̄wed Abasi inọ mbon en̄wen, inamde mme mfiakn̄ka, inyụn̄ inịmde mme ukpepn̄kpọ Bible, mmọ ẹyeyom ndinam kpasụk ntre.

3. Nso ke uwụtn̄kpọ nnyịn ekeme nditịn̄ nnọ nditọ ukpepn̄kpọ Bible, ndien nso ke mmọ ẹkeme ndikpep?

³ Ke Ini Inịmde Ukpepn̄kpọ Bible: Mbon oro ẹdinen̄erede ikụt nte nnyịn inamde n̄kpọ ẹdi nditọ ukpepn̄kpọ Bible nnyịn. Ke uwụtn̄kpọ, okposụkedi nnyịn ikemede ndinam an̄wan̄a mmọ ufọn editịm idem nnọ ukpepn̄kpọ, edikot mme itie N̄wed Abasi oro ẹsiakde ẹsịn, ye edidụri udịm ke mme akpan ekikere, mmọ ẹyekụt m̀mê nnyịn imesitịm idem ntre. (Rome 2:21) Edieke ikade ikekpep mmọ n̄kpọ ke ini oro ikenịmde, mmọ idinyeneke ntụhọ ediyak mme n̄kpọ en̄wen ẹsịbe ẹdụk ini ukpepn̄kpọ Bible mmọ. Nte eyịghe mîdụhe, mmọ ẹyekụt n̄ko edu n̄waidem nnyịn ke utom ukwọrọikọ ye ọkpọsọn̄ mbuọtidem nnyịn. Ntak edi oro nditọ ukpepn̄kpọ mbon oro ẹnen̄erede ẹkpebe uwụtn̄kpọ Jesus ẹsiwakde ndikabade ndi ifịk ifịk mme ọkwọrọ eti mbụk emi ẹn̄wụmde mfri.

4. Ke ini idụkde mme mbono esop, nso ke mbon en̄wen ẹkeme ndikpep nto uwụtn̄kpọ nnyịn?

⁴ Ke Ini Idụkde Mme Mbono Esop: Kpukpru mbon oro ẹdide ubak esop Christian ẹnyene udeme ke ndida uwụtn̄kpọ nnọ ukpep ke mme mbono esop. Mbon oro ẹnyenede udọn̄ ẹsibọ ufọn ẹto nti uwụtn̄kpọ oro mmọ ẹkụtde ke esop ke ini mmọ ẹtọn̄ọde ndidụk mme mbono esop. Mmọ ẹyekụt ufiop ufiop itie ebuana nditọete, edidianakiet Christian, usịnen̄kpọ ye ukamaidem emi ẹwụtde iso o-bụt. (Ps. 133:1) Mmọ n̄ko ẹyekụt uwụtn̄kpọ nnyịn ke ndidụk mbono esop kpukpru ini ye nte nnyịn iyararede mbuọtidem nnyịn an̄wan̄wa ke adan̄aemi idude do. Esenowo oro okodụkde kiet ke otu mme mbono esop nnyịn ama okụt nte ekpri eyenan̄wan ọkọsọpde okụbọde itie N̄wed Abasi oro ẹkesiakde onyụn̄ etịn̄de enyịn ese ke ini ẹkotde. Uwụtn̄kpọ eyenan̄wan emi ama anam enye ọdọhọ ẹdikpep imọ Bible.

5. Ntak oro nnyịn mîkpedehedei ise uwụtn̄kpọ nnyịn ke usụhọde?

⁵ N̄wed Abasi esịn udọn̄ ọnọ nnyịn ete ikpebe nti uwụtn̄kpọ kiet eken. (Phil. 3:17; Heb. 13:7) Mmọdo, nnyịn ikpenyene nditi nte ke edieke nnyịn inen̄erede ikpebe uwụtn̄kpọ Jesus, mbon en̄wen ẹyekụt emi, ndien emi ekeme nditụk mmọ ke eti usụn̄. Sia ifiọkde emi, nnyịn ikpakam ikere iban̄a ikọ oro odude ke 1 Timothy 4:16, “Nọ ntịn̄enyịn kpukpru ini ke idemfo ye ke ukpepn̄kpọ fo.”