Ẹn̄wam Mme Ubuene Ẹnyene Idotenyịn
1 Jesus ama enen̄ede enyene udọn̄ ke idem mme ubuene. Ama odu mme ini oro enye ọkọnọde mme owo n̄kpọ obụkidem ke utịbe utịbe usụn̄ onyụn̄ ọkọk mbonudọn̄ọ, edi enye okowụk ntịn̄enyịn ke edikwọrọ “eti mbụk” nnọ mme ubuene. (Matt. 11:5) Mfịn, utom ukwọrọikọ Christian aka iso enyene ufọn ọnọ mme ubuene ọkọrọ ye mbon en̄wen.—Matt. 24:14; 28:19, 20.
2 Ata Idotenyịn: Mme ọkwọrọ ederi Christendom ẹsiwak ndidọhọ mme ubuene ke mmọ ẹyeforo edieke ẹtatde ubọk ẹnọ enọ ke ufọkabasi. Nte ededi, Bible ekpep nte ke Obio Ubọn̄ Abasi kpọt editre unana onyụn̄ ọkọk kpukpru mfịna ubonowo. (Ps. 9:18; 145:16; Isa. 65:21-23) Nnyịn iyanam mme ubuene ẹnyene idotenyịn inyụn̄ in̄wam mmọ ẹnyene se mmọ ẹnanade ke n̄kan̄ eke spirit edieke iwụtde mmọ se Bible enen̄erede ekpep.—Matt. 5:3.
3 Mme Pharisee eyo Jesus ẹkesida mme ubuene ke usụhọde, ẹnyụn̄ ẹkot mmọ ke emiom ‘am-ha·’aʹrets, m̀mê “mbon idụt.” Edi, Jesus ekese “iyịp mmọ,” m̀mê uwem mmọ, ke “n̄kpọ-uto.” (Ps. 72:13, 14) Nnyịn imekeme ndikpebe Jesus inyụn̄ “itua” mme utọ ubuene oro “mbọm” ebe ke ndifọn ido nnyụn̄ n̄wụt ke imọfiọk nte etiede mmọ ke idem. (N̄ke 14:31) Nnyịn ikpedehedei itịn̄ ikọ ndisụhọde mme ubuene oro ẹdude ke mbọhọ nnyịn itie m̀mê ndimen̄e ndinọ mmọ ikọ ntiense. Ediwak mbon oro ẹnyịmede etop Obio Ubọn̄ ẹdi mme ubuene.
4 Ẹn̄wam Mme Ubuene Idahaemi: Ndikpep mme ubuene oro ẹdude ke efakutom nnyịn mme edumbet Bible idiyakke mmọ ẹnen̄ede ẹbuene idahaemi. Ke uwụtn̄kpọ, Bible akpan ukpammịn, mbre mfọniso, ifem, edida un̄wọn̄ m̀mê sika, ye mme edinam eken oro ẹkemede ndinam owo ebuene. (N̄ke 6:10, 11; 23:21; 2 Cor. 7:1; Eph. 5:5) N̄wed Abasi esịn udọn̄ ọnọ edinam akpanikọ ye edinam utom ke “ofụri ukpọn̄,” kpa mme edu oro ẹyomde ẹto owo emi ẹkpede utom. (Col. 3:22, 23; Heb. 13:18) Ke ndụn̄ọde kiet oro ẹkenamde, n̄wakn̄kan ibat mme eteutom ẹkedọhọ ke edinam akpanikọ ye edisọn̄ọ nda nnam utom ẹdi mme edu oro mmimọ isinen̄erede iyom ito mbon oro ikpede utom.
5 Esibiak Jehovah ndikụt mme ubuene ẹbọde ufen. Ibịghike Jesus Christ ayanyan̄a “ubuene ke ini enye esemede.” (Ps. 72:12) Mbemiso ini oro, nnyịn imenyene eti ifet ndida etop idotenyịn oro odude ke Bible ndọn̄ mbon en̄wen esịt, esịnede mme ubuene.