Nte Unamke Okwo Kan̄a?
Ndinam nso? Ndiwet n̄kpọ nyọhọ kad DPA (durable power of attorney) emi ẹnọde Mme Ntiense oro ẹma ẹkena baptism. Sia ‘mûfiọkke se uwem fo edidide n̄kpọn̄,’ enen̄ede edi akpan n̄kpọ ndibem iso mbiere nnyụn̄ n̄wet orụk ibọk ye mme usụn̄ usọbọidem oro edinyịmede edieke ọdọn̄ọde. (Jas. 4:14; Utom 15:28, 29) Ẹsio vidio Transfusion-Alternative Health Care—Meeting Patient Needs and Rights man an̄wam fi. Se vidio emi, ekem bọn̄ akam nnyụn̄ da mme mbụme oro ẹdude ke idak emi dụn̄ọde se ekpepde.—Tịm fiọk: Sia vidio emi esịnede n̄kpri itie oro ẹsiakde owo idem, mme ete ye eka ẹkpenyene ndibiere m̀mê akpana iyak n̄kpri nditọ mmimọ ẹtiene ẹse vidio emi.
(1) Ntak emi ndusụk mbiausọbọ ẹfiakde ẹnam ndụn̄ọde ẹban̄a edikịm iyịp nsịn ke idem-e? (2) Nọ uwụtn̄kpọ ita emi ẹban̄ade awak-n̄kukọhọ usiakidem oro ẹkemede ndinam ye unana edikịm iyịp nsịn ke idem. (3) Mbiausọbọ ye mme asiak-owo-idem ifan̄ ke ofụri ererimbot ẹwụt ke imenyịme ndisọbọ mbon udọn̄ọ ye unana edikịm iyịp nsịn mmọ ke idem? Ntak emi mmọ ẹnyịmede ndinam ntre? (4) Ndụn̄ọde oro ẹnamde ke ufọkibọk ke ndondo emi ayarade nso aban̄a edida iyịp nsọbọ owo idem? (5) Mme n̄kpọndịk ewe ẹsan̄a ye edikịm iyịp nsịn ke idem? (6) Nso ubiere ke ediwak mbiausọbọ ẹsịm kaban̄a mme ufọn ibọkusọbọ efen oro ẹnọde utu ke edikịm iyịp nsịn ke idem? (7) Nso idi ntak udọn̄ọ unana iyịp? Owo ekeme ndidu uwem mbịghi adan̄a didie edieke ananade iyịp? Nso ke ẹkeme ndinam man ẹn̄wam owo oro ananade iyịp? (8) Didie ke ẹkeme ndinam owo udọn̄ọ enyene ndatndat nsen iyịp? (9) Mme usụn̄ usọbọidem ewe ke ẹda man ẹsụhọde uwọrọiyịp ke ini usiakidem? (10) Nte ibọkusọbọ efen oro ẹnọde utu ke edikịm iyịp nsịn ke idem ẹkeme ndifọn ye n̄kpri nditọ m̀mê ye mme owo oro ẹsobode mbabuat idaha oro ẹkemede ndiwot mmọ? (11) Nso idi akpan edumbet ido uwem kiet oro aban̄ade eti ibọkusọbọ? (12) Ntak emi ọfọnde mme Christian ẹbem iso ẹmek utọ usọbọ oro owo mîsịnke iyịp oro mmọ ẹdinyịmede? Didie ke ẹkeme ndinam emi?
Ndinyịme ndusụk usọbọ oro ẹwụtde ke vidio emi edi ọkpọkpọ ubiere nte ekemde ye ubieresịt owo kiet kiet oro Bible ọnọde ukpep. Nte afo emebiere m̀mê ewe ibọkusọbọ efen utu ke edikịm iyịp nsịn ke idem ke imọ ye nditọ imọ idinyịme ndibọ? Edieke oyomde ndifiọk se ẹnemede ọyọhọ ọyọhọ ẹban̄a n̄kpọ emi, se “Mme Mbụme Ẹtode Mme Andikot” ke nsiondi Enyọn̄-Ukpeme eke June 15, 2004, ye October 15, 2000 ye esịne-esịt Utom Obio Ubọn̄ Nnyịn eke December 2006 oro ọdọhọde ete: “Didie ke N̄kpese N̄kpri N̄kpatan̄a N̄kpọ Emi Ẹdade Ẹto Iyịp ye Mme Usụn̄ Usọbọidem Oro Ẹbuanade Iyịp Mi?” Ekpenyene nditịm nsian owo oro emekde nte anditịn̄ ikọ ke ibuot fo ye mbonubon fo oro mîdịghe Mme Ntiense mban̄a mme ubiere fo.