Ekebe Mbụme

◼ Ndi odot kiet ke otu Mme Ntiense Jehovah ndika n̄kọbọ usọbọ ke ufọkibọk m̀mê ufọk mbonusọn̄ emi ido ukpono esede aban̄a?

Nsio nsio ido ukpono ẹmesiak ufọkibọk ye ufọk mbonusọn̄ emi ẹsisọbọde owo idem m̀mê ẹsisede ẹban̄a owo ke anyan ini. Ke ediwak idaha, owo isisiakke mme utọ itie oro man ẹsịn udọn̄ ẹnọ Akwa Babylon. (Edi. 18:2, 4) Ekeme ndidi se isikam inamde ẹsiak mme utọ itie oro esidi man ẹda ẹn̄wana okụk ẹnọ ufọkabasi. Mfịn, ndusụk ufọkibọk ẹnyene ebuana ye ido ukpono ke enyịn̄ kpọt, ke adan̄aemi mme ọkwọrọ ederi ẹsụk ẹnamde utom ke mbon eken.

Edieke kiet ke otu Mme Ntiense Jehovah oyomde ndika ufọkibọk m̀mê ufọk mbonusọn̄, enye enyene ndibiere ke idemesie m̀mê imọ iyaka ufọkibọk emi ekemede ndinyene ebuana ye ido ukpono. Ubieresịt owo kiet ekeme ndiyak enye aka, edi ubieresịt owo en̄wen iyakke enye aka. (1 Tim. 1:5) Enyene ndusụk n̄kpọ emi ẹkemede ndin̄wam owo ebiere se enye akpanamde, ndien ọfọn ẹkere ẹban̄a mmọ.

Ke uwụtn̄kpọ, ekeme ndidi n̄kukụre ufọkibọk m̀mê ufọk mbonusọn̄ oro odude ekpere edi enye oro ekerede enyịn̄ ido ukpono. Mîdịghe edieke ufọkibọk efen odude ekpere, ekeme ndidi enye oro enyenede ebuana ye ido ukpono ke ẹsisọbọ owo idem ọfọn akan. Onyụn̄ ekeme ndidi ufọkibọk oro enyenede enyịn̄ ido ukpono do edi n̄kukụre ufọkibọk emi ẹkemede ndinọ utọ usọbọ oro afo oyomde, mîdịghe ekeme ndidi enye edi n̄kukụre ufọkibọk emi abiausọbọ m̀mê owo emi edisiakde fi idem ekemede ndinam oro. N̄ko, ndusụk ini ufọkibọk oro enyenede ebuana ye ido ukpono ekeme ndinyịme ye se afo nte Christian etịn̄de aban̄a edikịm iyịp nsịn ke idem, ke adan̄aemi ndusụk ufọkibọk eken mîdinyịmeke. Ntre, emi edi ndusụk n̄kpọ oro afo ekemede ndikere mban̄a ke ini ebierede ufọkibọk oro afo oyomde ndika.

Edieke ebierede ndika ufọkibọk m̀mê ufọk mbonusọn̄ emi enyenede ebuana ye ido ukpono, afo emekeme ndida enye nte ndikpe owo okụk ke utom oro enye anamde ọnọ fi. Emekeme ndida enye nte ido ukpono ndinam mbubehe, ndien afo ndibọ mmọ n̄kpọ ndep iwọrọke ke etịp n̄kpọ ke unyịmesịt esịn man ẹda ẹn̄wam nsunsu ido ukpono. Afo ekpe okụk ke n̄kpọ emi edepde m̀mê ke se ẹnamde ẹnọ fi.

Nte ededi, ke mme utọ idaha oro, ana afo nte Christian okụt ete ke imọ ibuanake ke edinam nsunsu ido ukpono ekededi. Afo n̄ko unyeneke nditiene n̄kot mbon oro ẹnamde utom do m̀mê mbon oro ẹdide do utọ udorienyịn̄ ido ukpono nte “Father” m̀mê “Sister.” (Matt. 23:9) Afo enyene ndikụt ete ke unamke n̄kpọ efen ukan usọbọidem oro akadade fi aka do.

Ke ini akade ufọkibọk, emekeme ndinam mmọ ẹfiọk ke imọ idi kiet ke otu Mme Ntiense Jehovah ye nte ke ikpama mbiowo mmimọ ẹdi ẹdise imọ. Emi ayanam afo ekeme ndibọ un̄wam ke n̄kan̄ eke spirit ke ini odude do.—1 Thess. 5:14.

Mbonubon oro ẹnịmde ke akpanikọ, mbiowo n̄kann̄kụk, ye mbon eken ke esop ẹkpenyene ndinen̄ede n̄n̄wam eyenete oro ama ọkọsọn̄, emi odude ke ufọk mbonusọn̄ ese aban̄a nsọn̄idem esie ke n̄kan̄ eke spirit, akpan akpan ke ini enye odude ke ufọk mbonusọn̄ emi ido ukpono esede aban̄a. Ndinọ ntịn̄enyịn ke afan̄ emi eyenen̄ede esịn udọn̄ ọnọ utọ mbonusọn̄ oro, idinyụn̄ iyakke ẹdue ẹsịn mmọ ke mme usọrọ m̀mê mme edinam ido ukpono eken emi ẹsinamde ke ufọk mbonusọn̄.

Se inemede mi ayan̄wam owo kiet kiet ekere aban̄a kpukpru n̄kpọ emi ẹbuanade ke afan̄ emi onyụn̄ anam ubiere idemesie aban̄a ufọkibọk m̀mê ufọk mbonusọn̄ oro enye edikade.—Gal. 6:5.