Se Ikan̄wamde Mbon Ufọkibọk Emi Esịt Eketịmerede
Brọda Bryn emi odụn̄de ke North Carolina, ke U.S.A. edi owo Kọmiti Unyene Nneme ye Mbon Ufọkibọk. Kọmiti emi ẹsidian ubọk ye mbon ufọkibọk ẹse nte ẹkemede ndin̄wam Mme Ntiense Jehovah emi ẹkade ndisọbọ idem ke mme ufọkibọk ke obio oro.
Ke ntak udọn̄ọ COVID-19, ediwak ufọkibọk ikayakke ẹsidụk ẹse mbon udọn̄ọ. Edi mme ufọkibọk ẹnyene owo emi esinamde yak mbon ido ukpono ẹda Ikọ Abasi ẹdọn̄ mbon udọn̄ọ ye mbonubon mmọ esịt. Ntre Bryn ama okot ete kiet emi edide akamba owo ke utọ itie oro ke ufọkibọk kiet oyom ndibụp nte imọ ikemede ndin̄wam Mme Ntiense Jehovah emi ẹdude ke ufọkibọk mmọ.
Ẹma ẹnam Bryn eneme nneme ye udiana ete oro. Edi sia owo mîkayakke ẹdụk ufọkibọk ẹse owo aba, Bryn ama ọdọhọ m̀mê ẹkeme ndinọ Mme Ntiense Jehovah emi ẹdude do nọmba fon imọ yak itịn̄ ikọ ye mmọ. Ẹma ẹnyịme.
Bryn ama ekere n̄ko nte imọ ikpasan̄ade in̄wam mbon emi ẹnamde utom ke ufọkibọk oro. Enye ama ọdọhọ udiana akamba owo oro ete ke imọ imama nte ufọkibọk mmọ ẹn̄wamde mme owo, onyụn̄ obụp enye nte n̄kpọ etiede ye mbon ufọkibọk oro. Enye ama ọdọhọ n̄ko ke imọ ima ikot iban̄a nte udọn̄ọ oro okponde editịmede esịt ọnọ mme owo ke kpukpru itie, akpan akpan mme anamutom ufọkibọk.
Udiana akamba owo oro ama ọdọhọ enye ke editịmede esịt emi udọn̄ọ COVID-19 emende ọsọk mbon ufọkibọk idịghe ekpri.
Bryn ama ọdọhọ enye ete: “Mme n̄kpọ do ke ikpehe Intanet nnyịn emi ẹkemede ndin̄wam mbon emi esịt etịmerede. Edieke akade jw.org akataip ‘editịmede esịt,’ oyokụt nsio nsio n̄kpọ emi ẹwetde ẹdọn̄ do, emi ẹkemede ndida n̄n̄wam mbon ufọkibọk mbufo.”
Nte Bryn okosụk enemede nneme ye ete oro, ete oro ama aka ikpehe Intanet nnyịn akataip “editịmede esịt” onyụn̄ okụt nsio nsio ibuotikọ emi ẹnemede n̄kpọ oro. Ete oro ama ọdọhọ ete: “Omokụt n̄kpọ? Nyowụt akamba owo nnyịn. Se n̄kụtde emi ayan̄wam mbon ufọkibọk nnyịn ye mbon en̄wen. Mmọn̄ mmịn̄ ndeme mmọ.”
Ke urua ifan̄ ama ekebe, Bryn ama eneme nneme ye akamba owo emi ekesede aban̄a itie oro. Ete oro ama ọdọhọ ke mmimọ ima ika ikpehe Intanet oro ikemịn̄ mme ibuotikọ emi ẹban̄ade editịmede esịt ye mme ibuotikọ en̄wen emi ẹkemede ndin̄wam inọ mme nurse ye mbon eken emi ẹnamde utom ke ufọkibọk oro.
Bryn ọkọdọhọ ete: “Akamba owo oro ama ọkọm mi ke se inamde, afiak ọkọm mi nte isịnde mme ibuotikọ emi ẹban̄ade editịmede esịt ke ikpehe Intanet nnyịn. Mme ibuotikọ oro ẹma ẹnen̄ede ẹn̄wam mmọ etieti.”